The Definitive Guide to Living in the Capital , Cairo , Egypt

تقدر تشوف شريف عامر فى الكواليس وهو قاعد بـ يحضر Power Point وبـ يقرأ آخر الأخبار.. وبـ يتكلم فى التليفون.. وبـ يرد على المخرج فى (الـ Ear piece)* وبـ يبعث Emotion لصاحبه على الـ Whatsapp.. وبـ يعمل لايك لناس على صفحة البرنامج بـ تقول له: هاه هـ تقول إيه النهارده؟ وهـ تجيب مين من الناس الجامدة اللى بـ تجيبها؟.. وبـ يعمل Retweet لمعجبة بـ تقول له على تويتر: “باحب الموضوع فى برنامج الموضوع”.. وبـ يأخذ نفس عميق و3..2..1.. هوااااء.

 التتر:

خد نفس عميق واهدأ كده زى شريف عامر مقدم برنامج “الموضوع” اللى بقى واحد من أكثر الإعلاميين شعبية ونجاح بسبب مهم جدًا.. أثناء الثورة كان شريف من الناس الحيادية ولما بدأت الدنيا تروح ناحية الثوار كان شريف من المهتمين بالثورة والثوار من الأول.. وطبعًا أنتم واخدين بالكم معانا.. من أول يوم مع الثورة.. ما كانش ضد الثورة في الأول وبعدين قرر يكون مع الثورة ويركب الموجه زى ناس كثير قوى كل ما عليك أنك تفتح اليوتيوب علشان تتفرج عليهم قبل وبعد.. وتعرف يعنى وجه المهرج الحقيقى.

 فقرة:

البرنامج عبارة عن اسمه “الموضوع”، يعنى بـ يختار موضوع معين ويتكلم فيه لكن بشكل جديد.. هو قال أن الفكرة الأساسية للبرنامج الكلام بموضوعية عن الأحداث اللى بـ تمس البلد.. وما أكثرها.. شريف ممكن يكون موضوعى زى أى إعلامى محترف.. لكننا هنا لازم نقف أمام اسم البرنامج اللى أجاد اختياره.. عارفين ليه؟

لأن ببساطة لما حد يقول لك عاوز أكلمك فى …، لما تلاقى مشكلة مع ناس وأنت مش فاهم بـ تقول: إيه الـ …، لو حد أول مرة تكلمه أو مديرك مثلًا وعاوز تقول له حاجة مهمة هـ تقول فيه … مهم ولازم تعرفه.

ممكن تحط مكان النقط اللى فاتت كلمة “موضوع” بسهولة، صح؟.. من هنا بـ يكون اختيار الاسم السهل واللى بـ يتداوله الناس فى أوقات بـ يتكلموا فيها عن الحاجات المهمة فى حياتهم.. ومن أهمية الفكرة هـ تيجى أهمية البرنامج.. بالإضافة إلى رصيد عامر عند الناس من ساعة الثورة.

 تتر أخير:

شريف عامر فى لقاء تليفزيونى معاه قال: أنا عمرى ما تخيلت أن الأحداث دى كلها كانت هـ تعدى عليا أو هـ أعملها أو اتكلم عنها أو يبقى فيه ثورة وأنا قاعد بـ اتكلم عنها.. ومن هنا بـ نقول أن الحدث القوى هو اللى بـ يصنع إعلامى قوى أو بـ يوقعه.. ولأن أمامنا إعلامى محترف قدر يتواكب مع الحدث.. وعلشان نبين الموضوع تفرجوا مثلًا على العبقري يسرى فودة فى مقدماته النارية لبرنامجه..

نقول لكم تفرجوا على حلقة يوم 25 يناير 2011 ساعتها هـ تعرفوا أن شريف من مدرسة يسري فودة.. واللى خرج إعلاميين كثيرة.. لازم نقول أن المخرج بـ يتعب كثير مع برنامج “الموضوع” لأن كمية التقارير الجيدة وعروض الباور بوينت والفيديوهات واللقاءات ومداخلات التليفون بـ تعمل تأثير كبير ومش عاوزة أى مخرج دى عاوزة مخرج صاحى جدًا طوال الوقت وفاهم هو بـ يعمل إيه.. ده طبعًا جنب الإنتاج الجيد لأنه مش معتمد على المظاهر قد ما هو معتمد على التنوع والتقديم الجديد.. هاه؟ هـ تتفرجوا ولا إيه؟

avant titres*: مصطلح فرنسي يستخدم لعرض ما قبل التتر من مقدمة تحكى عن خلفية البرنامج أو الفيلم أو المسرحية.

(Ear piece)*: عبارة عن سماعات توضع فى أذن مقدم البرنامج ويتحدث فيها المخرج ليعطى بعض التعليمات للمقدم.