The Definitive Guide to Living in the Capital , Cairo , Egypt

الوش التاني

الوش التانى: تقليد رمضانى ساخر

  • محمود عزب
  • كوميدي
  • من الآن
تم التقييم بواسطة
Mohamed Hamdy
قيم
قيم الآن
الوش التانى: تقليد رمضانى ساخر

تحية كبيرة للإنسان اللى عارف حدود قدراته كويس، وعارف إمتى بـ تبدأ منطقة نفوذه بالضبط وإمتى بـ تنتهى، وعارف إزاى يستغل كل سنتيمتر من الموهبة اللى ربنا أعطاها له، وإمتى يتوقف ويعلن أنه أكثر من كده هـ يخرج بره الملعب اللى تعود يلعب فيه.

محمود عزب من الناس اللى عارفة كويس أوى أنها مش موهوبة غير فى تقليد الشخصيات العامة فى المجتمع، وأنه مش هـ يكون ناجح فى الغناء أو التمثيل على سبيل المثال، وأن نجاحه الوحيد هـ يبدأ وينتهى عند قدرته على تقمص الشخصيات مش أكثر ولا أقل من كده، أحيانًا شوفناه فى بعض التجارب السينمائية المحدودة كضيف شرف على سبيل المثال، لكن أكثر من كده مش بـ نشوف عزب، لأنه زى ما قولنا قبل كده هو عارف حدود إمكانياته كويس.

برنامج “الوش التانى” اللى بـ يخرجه سامى أبو الخير، بـ يعتمد على الشخصيات العامة اللى بـ يقوم عزب بتقليدها، بـ يبدأ البرنامج بمقطع من الشعر العامى الساخر اللى بـ يتكلم عن أوضاع البلد أو حتى أوضاع الشخصيات محل التقليد بأسلوب ساخر وفكاهى، أحيانًا بـ تكون السخرية دى “رخمة” بعض الشىء لكن يحسب للبرنامج الأسلوب المختلف فى بدايته.

بعد كده بـ يتم توجيه سؤال الحلقة، ثم بـ يظهر عزب بعدة شخصيات للإجابة على السؤال من وجهة نظره كشخصية، والشخصيات السنة دى متعددة ومختلفة، ومش بس قاصرة على رجال الفن زى ما كان عزب متخصص فى بداية ظهوره على الشاشات، المرة دى امتدت لتطول رجال السياسة كمان وتحديدًا رجال الإسلام السياسى وجماعة الأخوان المسلمين والسلفيين اللى تصدرت المشهد السياسى فى الفترة الأخيرة، وكمان رجال الليبراليين والعلمانيين وكافة التيارات السياسية فى المجتمع.

الشخصيات تنوعت واختلفت.. بـ نشوف على سبيل المثال المقدم الرياضى علاء صادق بالإضافة للشخصيات المحسوبة على تيار الإسلام السياسى زى البلتاجى أو عصام العريان، حازم أبو إسماعيل، عبد المنعم أبو الفتوح، بالإضافة لشخصيات ثانية زى محمد البرادعى، توفيق عكاشة، وائل الإبراشى وغيرهم كثير جدًا.

بـ يعيب البرنامج التطويل والإعادة فى كثير من الشخصيات، ويكفى عزب أنه يستعمل “الإفية” مرة واحدة أو اثنين بحد أقصى، إلا أننا ملاحظين أنه بـ يطول فى الكلام الخاص بكل شخصية، وده ممكن يصيبنا بالملل أو يحسسنا أن الشخصيات فيها كثير من الإعادة أو التطويل.

الوش الثانى برنامج رمضانى خفيف يصلح للمشاهدة قبل الإفطار لتسلية الصيام وضياع الوقت، وما تتوقعش أكثر من احترافية عزب فى تقديم الشخصيات السياسية والاجتماعية.

عجبك ؟ جرب

فوازير "مسلسليكو" أو برنامج المقالب "كمين فى سرايا المجانين".

نصيحة 360

البرنامج بـ يعرض على قناة المحور 1 الساعة 1 بعد منتصف الليل، و7 صباحًا، و2 عصرًا، و10 مساءً، كمان تقدر تتابع حلقاته بدون فواصل من خلال موقع اليوتيوب.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح