The Definitive Guide to Living in the Capital , Cairo , Egypt

هاني في الأدغال

بالفيديو: حلقات هاني في الأدغال متفبركة ولا حقيقية؟

  • هاني رمزيهاني رمزي
  • كوميدي
  • من الآن
  • محمد سميرمحمد سمير
تم التقييم بواسطة
Rasha Zeidan
قيم
قيم الآن
بالفيديو: حلقات هاني في الأدغال متفبركة ولا حقيقية؟

الحكاية فيها إن.. زى ما بنقول إحنا المصريين لما نحس أن الموضوع فيه حاجة، وقلبنا مش متطمن، وده اللي حاصل السنة دي على برامج المقالب ومنها رامز بيلعب بالنار، وهو الموضوع متفبرك ولا لأ، وكمان هاني في الأدغال.. وإحنا صراحةً مش عارفين إيه موضوع البرامج اللي بتتعمل بأسماء أصحابها دي، رامز وهاني، البرنامج قايم على حاجتين: اسم النجم، وضيوفه النجوم! وفي النص اضحك يا عم المشاهد بقى وعيش حياتك و اتسلى في رمضان!
 

فكرة البرنامج قايمة على أن فيه دعوة بتيجي للفنانيين لعمل رحلة ترفيهية ودعائية للسياحة في جنوب إفريقيا، وطبعًا الفنان المحبوب بيلبي الطلب ويروح يركب عربية الرحلات المفتوحة من كل ناحية لكنها متقفلة بشبك حديد، وتبدأ الرحلة الجميلة والمناظر الطبيعية اللي بجد تخليك منبهر وتخليك بتشكر الناس اللي فكرت أن البرنامج يبقى في المكان ده، علشان نشوف طبيعة مختلفة وجميلة كده، وفجأة بتبتدي الدنيا تقلب وسائق العربية يروح ضحية أسد متوحش، والنجم يلاقي نفسه في مواجهة أسود وتعابين بقى وموضوع كبير، والمفروض أن الفنان الموهوب بيصوت ويموت من الرعب، وفجأة يلاقي طيارة، يجي يروح لها تمشي وتسيبه، علشان يظهر هاني رمزي في النهاية ويقوله أنها خدعة وهزار! .. لحد هنا الدنيا تمام والبرنامج فكرته جديدة ودخول الحيوانات عليه بيدى طابع مختلف خاصة أنه في مكان مفتوح، وبيئة مختلفة، وميزانية إنتاجه ضخمة مش عادية يعني فيه تكاليف سفر طاقم العمل وكل النجوم اللي اتصور معاهم وكمان تدريب الحيوانات دي والتصوير في مكان مفتوح زي ده، إنتاج محترم يعني.. لكن..
ويا خوفي من "لكن" دي لكن يا ترى الممثلين فعلًا كانوا متفاجئين؟ ولا الموضوع كله على بعضه فبركة؟ الحقيقة قررنا ندعبس في الموضوع ونبص بعين الناقد ونتابع السوشيال ميديا، ولاقينا مجموعة مش قليلة من الناس واقفة ضد البرنامج وموضحة كمان أنه متفبرك.. وكله بالفيديو! .. الفيديو اللي فيه جايبين كمية الكاميرات اللي واقفة قدام وش الممثلين وده بيبان من قرب الكاميرا قوى من الوش، وكمان الكاميرات اللي بانت في زوايا العربية اللي بيركبوها وإزاى مش بيبصوا لها خالص، فحتى لو كانت كاميرات متركبة وواضحة على اعتبار أنهم فى حملة دعائية وكده، فيه مشكلتين الأولى أن الممثل مش بيبص لها خالص من باب تطبيق النظرية العظيمة بتاعت: "صورنى و أنا مش واخد بالي" والمشكلة التانية هي أن كل الكاميرات جوه العربية متوجهة ناحية الضيف، مع أن المفروض لو كاميرات دعائية يبقى جزء متوجه ناحية الضيف وجزء ناحية الطبيعة اللي بره علشان الموضوع مايبقاش مقفوش أوي كده..
أما بقى أكتر حاجة جننت الناس، هي الغلطة الكبيرة اللي ظهر فيها مروض الأسود من ورا إلهام شاهين في لقطة خاطفة بس ظهر، وطبعًا الدنيا قامت ومقعدتش، وهاني رمزي رد وقال أنه عادي لأن الأسد محتاج مروض، لكن اللي مش عادي أن الضيف يشوف الأسد والمروض مع بعض يا عم هاني.. مش كده ولا إيه؟

عجبك ؟ جرب

رامز بيلعب بالنار

نصيحة 360

برنامج هاني في الأدغال من تقديم هاني رمزي على قناة الحياة.. يذاع كل يوم الساعة 8:15 م، 2 صباحًا.. ومن إخراج محمد سمير.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح