The Definitive Guide to Living in the Capital , Cairo , Egypt

برنامج “بوضوح” انفرادات صحفية وحوارات غير تقليدية.. المهم عندنا هى الحقيقة وفقراتنا كلها مهنية وبوضوح.. فى الأول خالص عمرو الليثى بـ يعرفنا إيه فكرة البرنامج وأنه بوضوح هـ يناقش كل الآراء وهـ يطرح الأفكار، ويحاول يحلها أو يوصلها للمسؤولين، وهـ يكون منبر لكل الناس خصوصًا البسطاء والغلابة.. وده معروف عن عمرو الليثى من برامجه القديمة.. ممكن كمان يجمع خصوم قضية ويحاول يصالحهم، “بوضوح” برنامج مش مع حد ضد حد، وهدفه الحقيقة من غير تضليل، ولا تجميل.. وعلشان يأكد كلامه ده فى أول حلقة نزل الشارع وعمل تقرير خارجى بـ يدور حول سؤال واحد: “أنت قلقان من إيه؟” وقابل: رجل بسيط.. الغلابة.. الناس اللى مش هاممها السياسية.. الأجرية.. العمال.. الناس الطيبة اللى قاعدة على القهوة.. البياعين.. الشغالين يوم بيوم ويقبضوا يوم بيوم..

هنا بالفعل ظهرت الصورة بوضوح أن الناس فى وادى والحكومة ومؤسسات الدولة فى وادى ثانى خالص، وخد عندك إجابة السؤال كانت بـ تدور حول: (الستر والصحة والأمان والعدل) يعنى هى دى حاجة كثيرة على المصريين يعنى، يلا نقول يا رب.

ثانى فقرة من فقرات البرنامج بـ تبقى استضافة شخصية، وضيف الحلقة الأولى كان عنصر جذب للناس علشان تتفرج على البرنامج.. يعنى كان اختيار جيد جدًا وفى توقيت جيد كان الإعلامى “باسم يوسف”، وزى أى برنامج محترم عمل تقرير عن باسم فى الأول وإزاى ساب الطب واتجه للإعلام والجدل اللى سببه برنامج “البرنامج”، والحديث مع باسم كان بـ يدور حول برنامجه الجديد ورأيه فى ترشيح المشير السيسى وحرية الإعلام.

عمرو الليثى فى أول البرنامج كان بـ يتكلم أنه هـ يحاول يصلح بين أى اثنين على خلاف، وده اللى عمله مع باسم وغادة عبد الرازق، وعرض الخلاف اللى ما بينهم.

كلنا عارفين الإعلامى والصحفى د. عمرو الليثى من أيام برنامج اختراق (فاكرينه؟) وتحليلاته السياسية وآرائه الصريحة والواضحة والجريئة، وده كان من أيام نظام المخلوع وهو صراحة معروف أنه دائمًا واقف مع الغلابة.. وعاوز يجيب حق الناس، وكان من أوائل الإعلاميين اللى تكلموا فى السياسية والناس بـ تحبه وتصدقه، ودى علامة مهمة لأى إعلامى علشان يقدر يكمل، وبصراحة لازم نشكر فريق الإعداد والإخراج لأن البرنامج مصروف عليه فنيًا يعنى الديكور عادى، لكنه بـ يعمل تقارير كثير ومهمة وده من الحاجات اللى بـ تميزه، وكمان بـ يميز فريق الإعداد الأسئلة المبتكرة اللى بـ يسألها الليثى وكمية المعلومات اللى عنده عن الضيف، كمان تنوع الضيوف زى أحمد عز ومرتضى منصور وعمرو حمزاوى.