The Definitive Guide to Living in the Capital , Cairo , Egypt

أحمد الشقيرى مش مذيع عادى، لما كل الناس تتكلم عن العالم وتلف الدنيا تشوف الآثار والعادات والتقاليد وتقول إحنا عملنا برنامج جامد.. هـ تلاقى الشقيرى فى اليابان بـ يدور على أسباب النهضة هناك.. لما تلاقى فيه برامج دينية بـ تتكلم عن حب سيدنا النبى هـ تلاقى الشقيرى عامل رسم 3D لبيته وإزاى كان عايش.. لما الناس بـ تعمل برامج ثقافية هـ نلاقى الشقيرى بـ يتعرض لثقافة الأمم من خلال الناس اللى بـ يقابلهم واللى عايشة فى الدول المختلفة.

فى أول حلقة الشقيرى كان لازم يعرض منجز 9 سنين اللى فاتوا من أول ما كان برنامج عن الشباب لغاية لما بدأ يتكلم عن الثقافة وعمل حلقات “أمة اقرأ” علشان يشجع الناس على القراءة، ولما الناس انتقدته أن هو قارننا باليابان الموسم اللى بعده قارن العرب بالعرب فى فكرة عبقرية من نوعها لما قارن العرب الآن بالعرب زمان.. وقد إيه طلع حالنا وحش قوى.

ولو تكلمنا عن خواطر 10 فهى قائمة على فكرة “اهدنا الصراط المستقيم” الدعاء الوحيد اللى فى سورة الفاتحة واللى كلنا بـ نقوله كل يوم أكثر من 17 مرة فى الصلوات المفروضة ده غير السنة بقى.

طيب إزاى نبقى ماشيين على الصراط المستقيم؟ ده اللى البرنامج هـ يبينه لنا فى الحلقات المختلفة واللى هـ نبدأها بالأكل الصحى علشان نبقى ماشيين على الصراط لازم نأكل كويس ونبقى أصحاء بعيدًا عن مخاطر الأكلات السريعة اللى ممكن توصل لدرجة “السكتة القلبية”.

وثانى حاجة هى ممارسة الرياضة علشان حضراتكم تبقوا على الطريق لازم تمارسوا رياضة بشكل مستمر وحقيقى وفعال يعنى كل يوم يبقى لك حصة من الرياضة.

كمان هـ نشوف فى الحلقات الحاجات المستخبية فى أمريكا مثلًا فى لاس فيجاس اللى هـ نلاقى فيها المطارات الخاصة وملاعب الجولف وتحتها أو تحت الأرض هناك عايش المشردين واللى ما عندهمش بيوت أصلًا.. هى دى لاس فيجاس الخرافية.

وهـ نلاقى كمان موضوعات زى تجارة الموت والابتعاد عن الصراط المستقيم فى الخمر والميسر والديون القائمة على الربا وحاجات ثانية كثير.

شكل البرنامج السنة دى فيه تجديد فى شغل الجرافيك وأماكن التصوير والتشويق اللى بـ يلعبه الشقيرى بحرفية.

أول مرة نشوف تتر برنامج فيه عظة وبـ يحكى قصة سريعة لكنها مؤثرة بـ تبين اثنين شبه بعض (يمكن) لكن تصرفاتهم مش شبه بعض الأول بـ يشرب خمرة وبـ يلعب قمار والثانى بـ يجد وبـ يشتغل على نفسه لحد ما بـ يكون بيت ويعيش سعيد وناجح فى شغله والثانى بـ يموت مريض فى المستشفى من كثر اللى عمله فى حياته من سيئات أضرت بجسمه.. البرنامج دعوة لك ولنا ولكل واحد فى العالم “ابدأ بنفسك”. 

علشان تعرف مواعيد وقنوات عرض “خواطر 10” زور “دليل كايرو 360 للتليفزيون فى رمضان“.