The Definitive Guide to Living in the Capital , Cairo , Egypt

أهلًا وسهلًا بكم فى برنامج “دسك النجوم” أول برنامج حوارى دون مذيع.. الفكرة أن فيه نجم هـ يطرح سؤال ونجم ثانى هـ يجاوب.

البرنامج بـ يتعمل إزاى؟ فى الأول بـ يظهر نجم وبـ يعلن عن الضيف اللى هو برضه “نجم” وبـ يكون ممثل فى الغالب وبـ يكون هو الضيف بتاع الحلقة.

الحلقة بعد كده بـ تمشى فى خط ثابت لا يتغير، يعنى بـ يتعمل برومو سريع فيه تاريخ الضيف وبـ تبدأ الأسئلة اللى بـ تظهر على الشاشة وهى بـ تبان فى الأول كأنها كوميدية.. لكن فى الآخر بـ تبين شخصية النجم.

يعنى مثلًا سؤال سؤل للممثل هانى رمزى لو خيروك أنك تخلع سنانك كلها وده هـ يكون سبب أن السلام يملأ الأرض هـ توافق؟

ولما تكون الإجابة بالموافقة ساعتها لازم تعرف أنك أمام حد بـ يحب السلام وعنده استعداد للتضحية حتى ولو كانت التضحية غير منطقية.. ومن خلال الأسئلة هـ تعرف مين هو نجمك المحبوب ومين اللى بـ ينافسه وبـ يشوف زمايله إزاى.. ومتاعب المهنة والمشاكل اللى بـ تقابلهم فى حياتهم.

هنا الدور ييجى على النجم الثانى “النجم المذيع”، البرنامج فيه اثنين نجوم والناس عارفاهم يا ترى المذيع هـ يعرف يدير حوار؟ أو خلونا نسأل بشكل ثانى: هل علشان أنت ممثل شاطر فده معناه أنك مذيع شاطر؟

الحاجة الأساسية اللى بـ نطلع منها من البرنامج ده “ربنا ما بـ يعطيش حد كل حاجة”، يعنى مش كل ممثل بـ يعرف يدير الحوار، ساعات كثير مش بـ يعرف يقرأ السؤال أو حتى مش عارف يوصل السؤال كويس.. وده مش عيب الإعداد على فكرة لكن ده بـ يبقى عيب المذيع لأنه ما قرأش الأسئلة كويس ويتمرن عليها لأنه لو عمل كده هـ يبان طبعًا الموضوع وهـ يكون سهل بالنسبة له.. أو يمكن هى رهبة أن شكلك يبقى غير مقبول وأنت مذيع.. وطبعًا فيه ناس ثانية بـ تبقى شاطرة فى الاثنين: “الممثل والمذيع”.

ديكور البرنامج بقى مش عاوزين نقول لكم، فاكرين برنامج من سيربح المليون؟ بالضبط هو نفس الديكور، نفس الكورسيين والشاشة اللى أمام “جورج قرداحى” والإخراج فيه عيب واضح فى الحلقات اللى عُرضت وهو أن الكاميرا بـ تكون مركزة على الضيف والمذيع بس على اعتبارهم النجوم والجمهور قليل قوى لما بـ ييجى ولما الكاميرا بـ تلمحه أو لما بـ يفتكره المخرج بـ يكون المشهد من بعيد.