The Definitive Guide to Living in the Capital , Cairo , Egypt

الستوديو:

“وزى ما شوفنا فى التقرير اللى فات ومعانا الضيف الدكتور….. إيه رأيك فى الـ……..، هنا يرد الدكتور الهمام: والله الموضوع محتاج…… وعاوز…… وأنا شايف……”.

هنا لازم الكادر ينتقل بحضرتك إلى ستوديو عادى جدًا، وناس رايحة وناس جاية فى الخلفية أو فى التقارير السريعة اللى بـ تتابع كل حاجة بـ تحصل فى مصر مع تعليقات المذيع وإجابات الضيف نصف المدعمة.. ومع برنامج “ستوديو البلد”.. واللى واخد اسمه من المحطة بتاعته “صدى البلد” وفكرتها بالطبع جامدة جدًا وكأنها محطة هـ تجيب لك كل حاجة هـ تحصل فى البلد..

بـ يتناول برنامج “ستديو البلد” اللى بـ يُعرض على قناة خاصة والمفروض أنها غير محايدة لأنها مش تبع الحكومة.. المهم البرنامج بـ يعرض كل القضايا السياسية والاجتماعية اللى بـ تُهم المجتمع المصرى والعربى وده طبعًا من خلال مجموعة من الضيوف المتميزين فى المجالات المختلفة، ده طبعًا جنب التغطية الخبرية اللى بـ تحصل عن طريق التقارير اليومية وشبكة المراسلين فى الوزرات والهيئات وفى كل المحافظات داخل مصر.. لأ ومش كده بس، ده أنت عندك كمان بعض المراسلين فى الدول العربية والأوربية.

 المهم البرنامج بـ يناقش القضايا المطروحة على الساحة بشكل محايد.. يعنى تقدروا تقولوا كده.. وبـ يهتم بالمشاركات من المشاهدين علشان يوصل رأيهم مهما كان اختلافه مع القناة فى القضايا المختلفة.

واللى بـ يميز البرنامج هو مناقشة كل قضايا المجتمع من غير تمييز بين طوائفه وطبقاته وده بجد.. والانحياز الكبير بـ يكون لجانب رجل الشارع البسيط ولمصلحة الوطن.

ولو حضرتك ركزت معانا شوية هـ تلاقى كمان البرنامج بـ يهتم بإظهار الإيجابيات فى المجتمع المصرى وبـ يحاول يسلط الضوء عليها من خلال مجموعة من التقارير اللى بـ يتم تصويرها فى الشارع المصرى ومع أنها بـ تظهر الإيجابيات أحيانًا إلا أنهم غصب عنهم وعن المواطن المصرى المطحون بـ تظهر التقارير برضه معاناة رجل الشارع.. وهنا لازم ييجى دور الإعلام فى محاولة الوصول لحل.. لكن يا ترى مع كل الشغل ده وطقم العمل والمراسلين والإخراج المتوسط صراحة فى البرنامج هـ يعرفوا يلاقوا حل؟

خلونا نبص بسرعة كده على مقدمى البرنامج:

مايسة ماهر: شابة صغيرة بـ تنطق الجمل بشكل سريع تعتمد على سرعتها فى الكلام ومنطقيتها فى الحوار.. قادرة على إدارة حوار ذكى.

عزة مصطفى: فاكرين زمااان جدًا أيام “سينما الأطفال” اللى كان بـ يجيب الفيلم الكارتون فى أسبوعين وكان بـ ييجى كل يوم جمعة قبل الصلاة.. وفاكرين برنامج “اختارنا لك” اللى كان بـ يعرض كل يوم أربعاء وبرضه بـ يجيب الفيلم فى أسبوعين، أهو بقدرة قادر بقى عزة مصطفى هى المذيعة المخضرمة اللى تربى على أيديها جيل كامل من الأطفال يوم الجمعة وجيل من الشباب يوم الأربعاء ولازالت متألقة بجد على صدى البلد بخبرة السنين دى كلها فى ستوديو البلد.

رولا خرسا: مع أن طريقتها ممكن ما تعجبش ناس كثير.. لكن لازم نعرف أن رولا من مدرسة عتيدة فى الإعلام وهى مدرسة “BBC” واللى اشتغلت فيها فترة من حياتها ولو لاحظتم هـ تلاقوا أن أسلوبها فيه كثير من رزانة الإعلام البريطانى.

حمدى رزق: ثلاث ستات على راجل واحد فى البرنامج يبقى لازم يكون الراجل ده متميز، ورزق بالفعل متميز بشكله الكبير فى السن نوعًا وخبرته الواضحة فى مجال الإعلام وقدرته العالية على إدارة الحوار، لكن اللى بـ يؤخذ عليه حاجة واحدة بس وهو أن رأيه الشخصى بـ يبقى ظاهر فى التليفزيون والمفروض أنه محايد لكن يبقى أن البرنامج له مشاهدته.