-
توك شودراما
-
من الآن
-
شريف جبرانشريف جبران
Marwa Fathy
طبعًا كلنا شوفنا مسلسل “فارس
بلا جواد” اللى كان بـ يعرض زمان في رمضان وعمل ضجة كبيرة جدًا في كل وسائل
الإعلام قبل ما يذاع والانتقادات الكثيرة اللى واجهها الفنان محمد صبحي من المسلسل
لدرجة أن ناس كثيرة قالت أن المسلسل ما يستاهلش كل الضجة اللى حصلت عليه وده كان
مقصود.
لكن برنامج “صحبة على الهواء”
اللي بـ يعرض على قناة التحرير الفضائية قدر أنه يكشف لنا أسرار كثيرة عن المسلسل
وإيه اللى حصل بالضبط في حذف المشاهد والضغوط اللي تعرض لها الفنان محمد صبحي،
والبرنامج ده بـ يعرض كل يوم بعد إذاعة المسلسل مباشرة وهدفه الإساسي التحليل
الكامل لكل حلقة بـ تعرضها القناة وده طبعًا بـ يكون بمشاركة الجمهور.
الجميل فيه أن الفنان محمد صبحي
في كل حلقة بـ يبدأ بداية جذابة تعبر عن مضمونها ويظهر أكثر مشهد كان قوي ويحكي
كمان عن كواليسه وإيه اللى حصل من أحداث مختلفة وهو بـ يصور الحلقة سواء كان مع
نجوم أو كومبارس، وكمان بـ يهتم بعرض كل الانتقادات اللى كان بـ يتعرض لها المسلسل
أثناء إذاعته سواء كانت من صحف عالمية أو محلية واهتم أنه يعرض تقارير عملتها بعض
شبكات الأخبار العالمية زي شبكة سي إن إن وإزاي طُلب من صبحي أنه يحذف 45 مشهد من
المسلسل كانوا من أكثر المشاهد قوة وتأثير في المسلسل كله، وده طبعًا حصل بعد
توزيعه على أغلب القنوات الفضائية ماعدا قناة المنار، وده كان نقطة قوة للمسلسل لأن
أغلب اللى شافه على القناة دي قدر أنه يلاحظ الفرق ويعرضه على الإنترنت.
نلاحظ أن
صبحي بـ يهتم في برنامجه بعرض المشهد الذهبي لكل حلقة، وده طبعًا بـ يكون بمشاركة
الجمهور وبـ يكون له دور قوى في وجود تفاعل قوي بين صبحي والمشاهد خاصة وأنه محبوب
عند كثير من جمهوره. وبـ يحاول في كل حلقة أنه يظهر بعض الجوانب السياسية ويطرح
آرائه عن بعض المشاهد اللي صورها يعنى بـ يمزج آرائه الشخصية مع تحليله لحلقات
المسلسل.
كمان بـ يعرض
نقد ذاتي لبعض المشاهد وعلاقته بالفنانين أثناء تصوير المسلسل، زي مثلاً مشهد
تصوير حالة الوضع للفنانة ريهام عبد الغفور اللى هي المفروض والدة حافظ وإزاي كان
لازم تأدي الدور بشكل طبيعي وتلقائي وغيرها من مشاهد ثانية كثير، وكمان بـ ينوه
صبحي في كل حلقة أن هـ يكون فيه لقاءات حوارية ونقدية مع أبطال المسلسل علشان يشاركوه
البرنامج خاصة وأنه ممتع وجذاب للمشاهد.
على الرغم
من جمال البرنامج إلا أن مدة إذاعته قليلة جدًا خاصة مع فنان بحجم محمد صبحي، وكمان مشاركات الجمهور محدودة رغم ظهور العديد من أرقام
التليفون.