-
خالد الصاويخالد الصاوي...
-
دراما
-
من الآن
-
كمال منصور
Ahmed Abd El Gawad
السلطة كرباج الحياة
الأغنيا وقت الشدايد يصرخوا
أنا والطوفان أصحاب
من اللى رايح وقاطع تذكرة مش جاى
من اللى واقف على كف عفريت الحياة
على:
تعبير لطيف بـ يقولوا عليه “تعبير دارج” يعنى الناس كلها بـ تستعمله فبقى على لسانها.. وبـ يتم استخدامه بشكل كبير فى مواقف الخطر.
“حوار ما بين رجل أعمال وصديقه فى (الـ 18) يوم”
الزمان: وقت 28 يناير
المكان: “مارينا”
رجل الأعمال: وبعدين فى شوية العيال دي؟
صديقه: عادى يعنى هوجة وهـ تروح لحالها.
رجل الأعمال: لأ لأ، الموضوع ده مش هـ يعدى على خير، شفت الريس قال إيه؟
صديقه: شفت يا سيدى، مش فاهم إزاى يسمع كلام الشباب يعنى.. فين القوة بتاعته والشرطة فين؟
رجل العمال: أنا خايف مش عارف هـ أعمل إيه لازم نلاقى حل.
صديقه: خلينا بعيد وأدينا بـ نتابع.
الحوار اللى فات تقريبًا بـ يقول لكم الجو العام للمسلسل واللى فيه مجموعة من رجال الأعمال المصريين كلهم تجمعوا فى مارينا.. وخايفين على أعمالهم ودنيتهم وكارهين للثورة والثوار.. منهم اللى كان وزير ورجال شرطة سابقين واللى صاحب شركات والممثلة واللى شغال فى الميديا يعنى توليفة كده عجيبة بـ تجمعها حبها للنظام القديم بدافع المصلحة مش حاجة ثانى.. ومعاهم بـ يظهر “فاضل أبو الروس” الشخصية الغامضة.
كف:
“حوار ما بين رجل أعمال وصديقه بعد (الـ 18) يوم”
الزمان: بعد 28 يناير
المكان: “مارينا”.. برضه.
رجل الأعمال: الدنيا بايظة جدًا وبـ يقولوا الريس خلاص دى نهايته فعلًا.. والشباب جابوها الأرض.
صديقه: لازم نهرب بره مصر.
رجل العمال: بس إزاى؟ هـ نعمل إيه فى فلوسنا والسيولة والملايين دى هـ تخرج إزاى؟
صديقه: أكيد فاضل بيه أبو الروس عنده حل.. ده بـ يقولوا أنه شغال فى جهة أمنية عُليا.
فاضل أبو الروس اللى قام بدوره المبدع خالد الصاوى شخصية معقدة بـ تخليك تفكر كثير فيها وهى بـ تتعامل مع أبعاد نفسية كثير وده بـ يظهر من حوارها مع باقى الشخصيات وقدرته على مصاحبتهم أو إرعابهم أو كسب ودهم أو وقوعهم فى حبه.. يعنى توليفة برضه بـ تدور أغلبها حول فاضل أبو الروس لدرجة أنك لو سميت المسلسل “فاضل أبو الروس” هـ يمشى الموضوع عادى لأنه واخد مساحة كبيرة قوى فى المسلسل وفى نصفه كده مش هـ تعرف هو شغال فى جهة أمنية ولا نصاب ولا مهندس ولا رجل أعمال ولا إيه الموضوع بالضبط.
عفريت:
“على كف عفريت” هو التعبير الصحيح للأحداث، لأن كل رجال الأعمال بـ يحسوا بالخطر طوال الوقت واختاروا المكان ده فى مارينا واشتروا يخت علشان يقدروا يهربوا ويطلعوا بره مصر فى أى وقت يحسوا فيه بالخطر.. من هنا كانت الأدوار فيها حالات من اليأس والتكبر والعناد والمكابرة والخوف والمسلسل نسيجه متكامل لكن بـ يؤخذ على الأعمال اللى تناولت الثورة بشكل عام.. تركيزها على العلامات الكبيرة فى الثورة وبـ تبدأ تبنى عليها زى الشهداء.. موقعة الجمل.. التنحى .. هروب رجال الأعمال.. السلطة اللى وقعت.. أما الثوار فإحنا لسه ما شوفناش عمل قادر أنه يتعامل معاهم بشكل قوى وحاسم لحد دلوقت..
على كف عفريت دقت ساعة الخطر.. فيا ترى إيه اللى هـ يحصل؟