The Definitive Guide to Living in the Capital , Cairo , Egypt

بين العالم الافتراضي "الفيسبوك" والعالم الحقيقي "المتعب" اللى عايشينه بـ تدور أحداث السيت كوم "فيس أبوك".. صراحة هو حاجة كده ما بين أنه كان يبقى مسلسل جامد ويكسر الدنيا زي تامر وشوقية لما كسر الدنيا وكل الناس تفرجت عليه، أو أنه كان يبقى مسلسل ويعدي عادي من غير ما نشوفه.. لكنه حاجة كده في النص، حاجة عاوزة تقول معنى بس المعنى مش واضح.

عزيز وأبوه.. هما الحكاية كلها وعليها بـ تدور قصص الفيسبوك والسوشيال ميديا.. والد عزيز ماتت زوجته، فيعمل أكونت على الفيسبوك علشان يدور على عروسة، وبـ يدور على بنات وبـ يصاحبهم وابنه بـ يبدأ معاه المشاكل بقى من الناحية دي، إزاي أبويا بعد العمر ده كله يدخل الفيسبوك علشان "يتعرف"، يعني حالة كده صراع بين الأبناء والآباء وداخل فيها جزء كبير من التربية اللى مفتقدينها في مسلسلاتنا إلا حاجات قليلة جدًا زي "أبناء ونيس" مثلًا اللى كان عاوز يربي قيمة كبيرة في المجتمع وما نقدرش نقول حاجة ثاني على كده.. أما فيس أبوك بـ يظهر المشاكل لو والدك دخل الفيسبوك وتحول الموضوع عنده لمراهقة وبدأ يعرف بنات.. طب تبقى إيه المشكلة لو والدك بقى عرف البنات اللى عندك وبدأ يكلمهم.. موضوع غريب طبعًا ويا ترى هـ يبقى رد فعل عزيز إيه؟ أكيد هـ يستغرب جدًا وهـ يبدأ يحارب والده بطرق كثير.. كل ده هـ نشوفه في "فيس أبوك".

الفكرة حلوة لكن إيه الهدف منها؟ يا ترى هل بس أننا نضحك ولا نتعلم، صراحة مش عارفين لكن كان المفروض أن مسلسل بـ يناقش مشاكل الشباب وبـ يحاول يركز على حاجة بقيت من أساسيات الحياة وبـ تعبر عن الشباب دلوقت أنه يبقى مسلسل بـ يعرض مشاكل ويحاول يحلها، مش يبقى حاجة بـ تضحك وبس، أو ما يبقاش مستفز وبس، إحنا بـ نحاول نلاقي حاجة ثانية غير الضحك والفكرة الجديدة لكن ما لقيناش، هو الجديد فيه أنه الشباب هـ يحبوه جدًا لأنه مكتوب بلغتهم ومكتوب بطريقة تشدهم وكمان بـ يضحك.

طريقة التصوير قائمة على فكرة السيت كوم ومعمولة حلو والكادرات متاخدة بوضعيات شبه السينما وده أعطى حياة للمسلسل، والمخرج بـ يحاول يعمل شغل لكن قلة الأماكن في التصوير يمكن دي اللى عطلته علشان كده بـ يحاول يركز أكثر على تعبيرات الممثلين، والممثلين قايمين بدور حلو خاصة إسراء عبد الفتاح ونيكول سابا وبسمة ماهر.