The Definitive Guide to Living in the Capital , Cairo , Egypt

المرأة مظلومة جدًا في مجتمعات مصر والدول العربية، رغم أنها مذكورة في القرآن في مواضع كثير جدًا، لكن الظلم بـ يوصل لدرجة تحريف بعض الحقائق وتحويلها عن مسارها، ودي حاجة صعب تتحسن أو تتعدل إلا من الأجيال الصغيرة اللي لسه بـ تبدأ تعرف يعني إيه رجل وست، لذلك في رأينا مسلسل كارتون “قصص النساء” واحد من أهم مسلسلات الكارتون اللي اتعملت على مدار التاريخ، ما يقلش في أهميته عن بكار اللي لفت الأنظار للنوبة وخلاها جزء لا يتجزأ من حياة الأطفال اللي ارتبطوا به.

“قصص النساء” مش بس للأطفال، هو ممتع جدًا للكبار وللأسرة كلها تتفرج عليه، بـ يبدأ بصورة للفخراني وهو بـ يرسم هدهد، وبعدين تبدأ بصوت جميل الفنانة جنات تغني التتر، لكن لنا مأخذ على التتر وهو أنه حزين جدًا وموسيقته مقبضة شوية وكأنه بـ يربط بين الستات والحزن، شايفين أن الموسيقى واللحن ما كانش موفق ومش مناسب للمحتوى، لكن ما ننكرش جمال الكلمات والصوت، ومن الكلمات “من يؤذها مرة لم يفهم الآيات.. قرآننا يروي لنا قصص النساء والمعجزات”. 

المسلسل عاجبنا لأن أبطال كافة المسلسلات الكارتونية من ساعة ما اتوجدت ذكور، أول مرة تبقى البطلات والمغزى الرئيسي من العمل سيدات، خاصة لو كانوا مذكورات في القرآن الكريم، ده شيء محترم جدًا يتحسب لمخرج العمل ومؤلفه ومنتجه، حاجة كده شبه تعيين وزيرات في الوزارة وكون ده معيار على احترام الوزارة من عدمه.

الراوي الأساسي هو يحيى الفخراني، ومعاه أبطال ثانين زي ماجد الكدواني، وهند صبري وسوسن بدر وريهام عبد الغفور، وفيدرا، وسونيا مهدي، كل حلقة بطولة شكل جديد، بالنسبة لشغل الكارتون فهو متقن وعالي جدًا إذا قارناه بأعمال دكتور مصطفى السابقة هـ نعرف أنه أعلى تقنيًا وده يمكن بسبب الإنتاج الكبير.

المسلسل مش بـ يخجل يناقش في النصف بعض القضايا الحساسة زي العساكر اللي بـ يستغلوا مناصبهم ويسرقوا، وبـ نلاقي فيه شخصيات أساسية كل حلقة زي الفنان يحيى الفخرانى اللي بـ يقوم بدور القاضي صفي الدين اللي بـ يحكي لبنت أخوه سلمى قصص النساء في القرآن، ويعرفها على مدى تكريم الخالق للمرأة ودور الصالحات منهم علشان تأخذهم قدوة.

سلمى بقى بـ تربي بغبغان غلباوي جدًا اسمه حمص، بـ يسليها، وكمان عندها مهرة اسمها قمر، ودي لفتة حلوة أن البنت يكون عندها حصان بتاعها ودي فكرة مش مقبولة بالنسبة للبعض اللي بـ يقرنوا البنت بالانغلاق وأن كل حاجة بالنسبة لها حرام.

المسلسل كمان بـ يرفع من شأن القضاة وبـ يبين الدور الحقيقي اللي بـ يلعبوه في المجتمع، وكمان بـ يبين كم التشويه اللي بـ يتم لقصص الأنبياء ودور السيدات فيها، كفاية نقول أن الحلقة الأولى عن حواء أم البشر، اللي دائمًا يتم ذكرها على أنها السبب في خروج آدم من الجنة، وده وصف غير دقيق ومافيهوش أي تقدير.

الموسم ده هو الثالث من سلسلة مسلسلات قصص القرآن وبـ يتناول شخصيات نسائية جاءت في القرآن من أول السيدة حواء، لحد السيدة مريم وقصة السعى بين الصفا والمروة وبطلتها السيدة هاجر زوجة سيدنا إبراهيم، وامرأة فرعون اللي آمنت بالله، وقصص ثانية كثير.