The Definitive Guide to Living in the Capital , Cairo , Egypt

مسلسل البطولة النسائية من الدرجة الأولى بـ يحكى عن شلة أصحاب، ودى الحاجة الوحيدة اللى بـ تجمعهم علشان كل واحدة فيهم لها طبعها ووظيفتها وعادتها، وعلشان الحبكة الدرامية لازم يكون فيهم العاقلة والمجنونة والتنكة وكمان المسيحية من باب الوحدة الوطنية وبكل صراحة المسلسل خالى من أى حبكة درامية، يعنى مافيش في المسلسل مشكلة وعقدة فى انتظار حلها.. حلقات المسلسل مجموعة حكايات لكل شخصية.

المسلسل من بطولة علا غانم، إنجى خميس، نجلاء بدر، ريهام سعيد، وهما مجموعة أصحاب مع بعض وكل شخصية مختلفة عن الثانية.. لكن فين العقدة برضه؟ هى دى المشكلة.

قبل ما نتكلم عن المشكلة لازم نقول أن اللى لفت نظرنا فى المسلسل الديكور وهـ نلاقى فيه زحمة، أى نعم زحمة لكنها مريحة للعين، مش ديكور وحش لكنه مناسب  لطبقة معينة “الطبقة الغنية من المجتمع” يعنى بيوت من نوع خاص قريبة من أثاث القصور والطبقة العليا، وكمان ديكور ستوديو التصوير الخاص ببرنامج “آية” وديكور شركة “هبة” وشركة “هديل” وكل دى تفاصيل هـ تعرفوها فى المسلسل، لكن لازم نقول أن الموضوع اتصرف عليه بجد علشان يخرج فى أفضل شكل ويبان حقيقى وله ستايل محدد، ما ينفعش يخرج عنه.

المخرج بقى ما تعبش أوى فى الموضوع، لأنه بـ يتعامل مع ممثلات شاطرين لدرجة أنهم حسسونا أنهم أصحاب فى الحقيقة.. وعلشان نفهم الحكاية بالضبط تعالوا نسمع الراوى هـ يقول إيه.

يُحكى أن والعهدة ع الراوى أن فيه بنت اسمها هدير كل مشكلتها مع زوجها أنه بـ يعاكس بنات الناس.. أى واحدة بقى حلوة أو وحشة مش مهم.

ويزود الراوى ويقول هدير مش لوحدها معاها صاحبتها هبة اللى عقدتها أسلوب أبوها وأمها البلدى فى المعاملة مع أنهم طيبين قوى، وهى بـ تحبهم لكن على الرغم من غناهم الكبير أسلوبهم مش بـ يعجبها ومش ماشى مع الطبقة اللى عايشين فيها.

أما جان فهى صيدلانية من عائلة غنية وخطيبها من طبقة أقل منهم شوية.. بس بـ يحبها وهى وأهلها مطلعين عينيه، أما آية فهى المخرجة اللى مقضياها فى البرامج والإعلاميين المشهورين وحكاياتها معاهم، وفيه كمان إنجى الصحفية اللى بـ تجرى وراء الأخبار والناس والحقيقة مطرح ما تكون.

الفكرة قريبة من مسلسل “حكايات بنات” اللى عُرض قبل كده من فترة وكانت نهاية كل حلقة sms  بـ تكتبها بطلة المسلسل، أما “قلوب” ففى نهاية كل حلقة واحدة من أبطال المسلسل بـ تلعب بيانو فى دلالة على أن الموسيقى ممكن تحل أى مشكلة بس إحنا نسمع.