The Definitive Guide to Living in the Capital , Cairo , Egypt

نهار جديد

نهار جديد: مسخرة وتقارير على قناة النهار

  • خالد عليش وأسماء مصطفى وداليا أشرف
  • توك شو
  • من الآن
  • أحمد شفيق
تم التقييم بواسطة
Ahmed Abd El Gawad
قيم
قيم الآن
نهار جديد: مسخرة وتقارير على قناة النهار

البداية:

مش هـ نبدأ بقى بداية تقليدية ونقعد نحكى عن البرنامج وحكايته وكده.. لا الموضوع المرة دى مختلف.. إحنا بـ نتابع كثير برامج صباحية على قنوات مختلفة، وتقريبًا مافيش قناة إلا وعملت برنامج صباحى، لازم نقول حاجة مهمة فى الأول.. أن البرامج الصباحية أنواع، يعنى فيه صباحية جادة جدًا ومتابعة للأخبار وتقارير تقيلة جدًا وحاجة دسمة فعلًا، وفيه بقى اللى بـ يعمل حاجات خفيفة لكنها بـ تقرب من جو الإسفاف من كثر الخفة اللى بـ تقدمها، أما بقى كونك تعمل حاجة ميكس كده ما بين التقل والخفة، هنا لازم نقول أن فيه فكرة حلوة.

 

الجديد:

بصوا بقى، مافيش جديد صعب تجيبه فى فكرة برنامج صباحى، لازم تختار موضوعات خفيفة وتعمل تقارير وتدخل مداخلات تليفونية مع الناس، وتجيب موضوعات قريبة من الناس تخليهم يتابعوك على الصبح كده، وهما لسه بـ يقولوا: "يا فتاح يا عليم يا رزاق يا كريم".. الجديد بقى هو فى طريقة التقديم، يعنى ثلاثة مذيعين مش بـ يقولوا شعارات ولا بـ يسفوا لكنهم عاملين حالة حلوة، حالة من البهجة فى القناة على الصبح وده صراحة اللى مخلى البرنامج متميز، أنك تنبسط وتستفيد على الصبح، وإحنا عاوزين إيه بقى غير كده.

 

البرنامج:

كده نقدر نكلمكم عن البرنامج وفكرته، هو برنامج صباحى من تقديم خالد عليش وأسماء مصطفى وداليا أشرف على قناة النهار، وفيه موجز لأهم وآخر الأنباء لكنه موجز سريع وخفيف، وكمان فيه تقارير بـ تطلع تتكلم عن مبادرات شبابية كثير موجودة فى الشارع وبـ تعمل حاجة، وبـ يعملوا مداخلات تليفونية عن موضوع الحلقة اللى بـ يهتم بحاجات لها علاقة بالناس، يعنى يتكلموا عن مشاكل الناس وهمومهم، والطرق والمجتمع وكل ده بدم خفيف.

وطبعًا مش محتاجين نقول أن عليش قالب الستوديو مسخرة على الهواء، حتى وهو بـ يكلم المخرج بـ يقول له: "يا عم حرام عليك خرمت ودنى عرفت أن فيه تليفون جاى"، وخد عندك بقى ضحك السنين طوال البرنامج وهو بـ يهزر مع المخرج ومع الضيوف وكمان مع المذيعتين اللى معاه، ومن الواضح طبعًا تأثيره الطاغى على البرنامج وأنه هو اللى ماسك الدفة فيه، لكن ده مش بـ يقلل من أسماء وداليا اللى عاملين شغل حلو، وبـ ينقلوا الكلام ما بينهم بسلاسة وما حدش بـ يقطع على حد، كلهم متناغمين مع بعض وده اللى بـ يكمل الحالة الحلوة اللى فى البرنامج.

كمان الديكور بتاع البرنامج هادى ومش مكلف والصورة والكادر الواسع اللى بـ يختاره المخرج مريح للعين، ونقلته للتقارير وعدم تنقل الكاميرات كثير بـ يخلوك مش متوتر وأنت بـ تتفرج على البرنامج.. بصوا اتفرجوا عليه وانبسطوا كل يوم الصبح.. الواحد عاوز إيه غير أنه يبدأ يومه بضحك وهزار وحالة حلوة.

عجبك ؟ جرب

برنامج "نهارك سعيد" على نايل لايف.

نصيحة 360

برنامج "نهار جديد" على قناة النهار من تقديم خالد عليش وأسماء مصطفى وداليا أشرف، ومن إخراج أحمد شفيق، يعرض من الأحد إلى الخميس 8 صباحًا.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح