The Definitive Guide to Living in the Capital , Cairo , Egypt

تليفزيون
نيران صديقة

نيران صديقة: فترة 1986 – 2009 على قناة النهار

  • رانيا يوسفرانيا يوسف...
  • دراما
  • من الآن
  • خالد مرعي
تم التقييم بواسطة
Ahmed Abd El Gawad
قيم
قيم الآن
نيران صديقة: فترة 1986 – 2009 على قناة النهار

الشعلة:

الشعلة ممكن تنطفي

الشعلة ممكن تبقى نار

والنار بـ تحرق فى الصحاب

والصحاب بـ يحبوا ذاتهم

ذات مرة قولنا نحكى من البداية

 

البداية:

بـ تبدأ الحكاية بمجموعة من الأصدقاء فى “فيلا” غريبة الشكل وتصوير بـ يعطى إيحاء عبقرى بالكآبة كلهم متجمعين بدعوة بـ يكتشفوا مع الوقت أنها من شخص مجهول مش عارفينه.. وبـ يبدأوا رحلة البحث، إيه اللى جمعهم بعد العمر الطويل وإيه اللى حصل لكل واحد فيهم فى الفترات الكبيرة اللى عدت عليهم.

 

ملاحظة:

المؤلف مش بـ يسمي الحلقة الأولى والثانية وكده.. لأ بـ يسمي الشعلة الأولى، والشعلة الثانية، وكمان بـ يسمى الحلقات زى “دقة زار” وهو عنده حق فى كل حلقة فيه شعلة جديدة بـ تتوهج وتخلى الناس عاوزة تفهم أكثر.

 

الفكرة:

الفكرة قائمة على مدار 25 سنة فى عمر كل شخصية من الصحاب واللى تجمعوا مع بعض وفيه تهديد كبير لهم لأنهم دافنين سر كبير واللى بـ يهددهم عارف السر ده. وبـ يطلب منهم طلبات محددة (مش فلوس) وهنا المفاجأة بـ يطلب منهم طلبات إنسانية زى مثلًا أنهم يشوفوا أكثر حد ظلموه ويطلبوا منه السماح ويبدأ كل واحد يدور فى الذاكرة.

 

فلاش باك:

الجميل فى الموضوع هو فكرة الفلاش باك واللي بـ تتعرض لمناطق كثيرة جدًا فى حياة الشخصيات وكمان فى أحداث فى البلاد من خلال 3 مراحل عمرية فى حياة الأبطال تمر على مدار 25 سنة، وهى فترات الثمانينيات والتسعينيات من القرن اللى فات بالإضافة إلى بداية الألفية الثالثة.

 

الشخصيات:

نجوم كثير موجودين فى العمل:منة شلبي وكندة علوش ورانيا يوسف وعمرو يوسف ومحمد شاهين وظافر العابدين، وكل واحد فيهم أدى دوره بشكل جديد وده يحسب لهم وللمخرج كمان.. وحتى التصوير واضح أن فيه تقنية عالية جدًا وهو متصور بكاميرات الصورة السينمائية.. وعنيك ما تتعبكش وأنت بـ تتفرج فى قطع المشاهد واللى أحيانًا بـ يبان بشكل واضح فى بعض المسلسلات.. لكن هنا فيه عمل متكلف وإمكانياته عالية.. والفكرة هى مجموعة شباب بـ تبدأ صداقتهم من الجامعة، وفيهم تنوع كبير جدًا.. وبـ يرصد المسلسل إزاى تطورت حياتهم لحد ما يصبح كل واحد منهم نجم فى عمله ومهنته، فمنهم الداعية الإسلامي، ومنهم النجمة المشهورة، ومنهم الصحفية اللامعة، ورجل الأعمال الكبير.. وعلى الرغم من كل ده إلا أن كلهم مشتركين فى سر كبير.

 

السر:

طبعًا مش هـ نحرق المسلسل كله ونقول لكم إيه هو السر، لكن كفاية تعرفوا أن الموضوع فيه كتاب سحرى اشتروه من “المغرب” –بلد السحر– وكانوا فاكرينها لعبة وكل واحد جرح نفسه ونقطوا من دمهم على الكتاب علشان يفاجأوا أن الكتاب بـ يُكتب فيه كل اللى بـ تعمله فى حياتك من حلو وسيء وطبعًا هـ تعرفوا غن السيئات كثير جدًا فى حياتهم وبـ يقع الكتاب فى أيد شخص واثنين وثلاثة وكل شخص بـ يتعامل معاهم بشكل مختلف.. فى النهاية لو عاوز إثارة وتشويق ومتعة ومجهول وأسرار وتشغيل مخ اتفرج على “نيران صديقة”.

عجبك ؟ جرب

مسلسل "موجة حارة".

نصيحة 360

مسلسل من بطولة:منة شلبي، وكندة علوش، ورانيا يوسف، وعمرو يوسف، وظافر عابدين ومحمد شاهين، وتأليف: محمد أمين راضي، عرض فى البداية فى رمضان وبـ يعرض الآن على قناة النهار والنهار دراما، من إخراج خالد مرعى. على النهار الساعة 7 مساءً وعلى النهار دراما بـ تعرض 10 مساءً وتعاد 4 فجرًا.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح