The Definitive Guide to Living in the Capital , Cairo , Egypt

والله أعلم

والله أعلم: من قال لا أعلم فقد أفتى على قناة cbc two

  • توك شو
  • من الآن
تم التقييم بواسطة
Rasha Zeidan
قيم
قيم الآن
والله أعلم: من قال لا أعلم فقد أفتى على قناة cbc two

لو كان مدخل العلماء لما يجربوا يفتوا “من قال لا أعلم فقد أفتى.. ومن أفتى بغير علم فقد ضل وأضل”.. صدقونا كنا هـ نستريح كثير قوى.. ولأن سيدنا محمد صلى الله عليه وسلم قال “العلماء ورثة الأنبياء” فكان لازم نعرف أن اللى يتصدر للفتوى ده لازم يكون عالم جليل درس وتعلم وفهم علشان يقدر يفتى فى الناس.

تعالوا نتعرف على واحد قرر يتصدر للفتوى وكمان يعمل برنامج كامل هو الضيف الأساسى فيه.. تعالوا نتعرف على الشيخ على جمعة.. هو مفتى الديار المصرية الأسبق.. حافظ للقرآن وملم بعلوم كثيرة وحاصل على إجازات علمية فى مختلف فروع الدين واللغة.. قرر يعمل برنامج يفهم فيه الناس دينهم ويستقبل أسئلتهم.. ومع أنه واخد منهج وطريقة الشيخ الشعراوى -رحمه الله رحمة واسعة- إلا أن صراحة فيه فارق كبير جدًا.. وإن كان بـ يتكلم مع الناس ببساطة علشان الكل يفهمه العالم والراجل البسيط.

“والله أعلم” برنامج بـ يطرح فى كل حلقة حاجة مختلفة وموضوع فى الغالب بـ يبقى موضوع شائك.. يدقق ويدور فى كلام الشيوخ والعلماء والقرآن والسنة علشان يوصل لحل فى المشكلة اللى بـ تتعرض.. ولازم نحيى الإعداد على اختيارهم لموضوعات الحلقات لأنها من عوامل الجذب للجمهور فهى جديدة ومواكبة كمان للعصر زى مثلاً فكرة “التشدد” وحكم الإسلام فيه.. ده بقى غير الموضوعات الساخنة والمحيرة كمان والشيخ -نحسبه على خير- بـ يحاول يجتهد فى الموضوعات دى.. زى الجنس الثالث “الخنثى” وإيه حقوقه فى المجتمع، وصراحة دى من المرات القليلة اللى بـ نلاقى برنامج دينى بـ يناقش قضايا زى دى.

ومن الحاجات المهمة مثلًا لما ناقشوا حالة الاغتصاب -عافاكم الله- وإن من الواجب الستر على البنت اللى تأذت.. دور البرنامج المهم بـ ييجى فى فكرة تصحيح المفاهيم الخاطئة عند الناس.. ولازم نقول من المهم ظهور برامج كثيرة قائمة على الموضوع ده مش برنامج واحد ولازم اللى يقدمه يكون من الناس الثقة قوى لأن الفتوى تعرض لها ناس كثير قوى فى الفترة اللى فاتت وشربوا الناس معلومات كثير قوى غلط.

“والله أعلم” اختيار جيد لعنوان برنامج دينى من الممكن تقول أن ده رد واحد جاهل على سؤال دينى.. لكن خلينا نقول أن رد العلماء على أسئلة كثير كان “والله أعلم”.. لكن الفكرة هل فعلاً بـ نطبقها إحنا والعلماء فى حياتنا ولا لأ.

خلونا نقول أن الشيخ فاهم وعنده علم وبـ يوصل علمه ده بهدوء وبشكل يوصل لكل الناس يعنى كأنه بـ يحط نفسه مكان اللى بـ يسأل ويجاوب على قدر العقول.

أما المحاورين اللى معاه فهم برضه لهم مكانتهم فى الإعلام وتحضير الأسئلة، زى عمرو خليل وخيرى رمضان، وكمان فيه تواصل مع الجمهور عن طريق أسئلة الفيسبوك أو الاتصال التليفونى.. والديكور والإضاءة قريبين قوى من أغلب برامج cbc two يعنى الستوديو وطريقة عرض البرنامج وإخراجه وحركة الكاميرا هـ تخليك تعرف البرنامج بـ يتعرض فين وعلى أى قناة ومع أن دى ممكن تكون ميزة وبصمة للقناة لكنه فى النهاية برضه تكرار والمشاهد بـ يمل على فكرة.

عجبك ؟ جرب

برنامج "ممكن" لخيرى رمضان.

نصيحة 360

برنامج "والله أعلم" تقديم د. على جمعة، ومن إخراج أحمد ماهر، يذاع على قناة cbc two من الأحد إلى الأربعاء الساعة 10 مساءً.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح