The Definitive Guide to Living in the Capital , Cairo , Egypt

تليفزيون

6 مسلسلات كارتون لازم تتفرج عليهم في رمضان

6 مسلسلات كارتون لازم تتفرج عليهم في رمضان
بواسطة
Mohamed Hamdy

فى الموضوع ده هنستعرض معكم مسلسلات الكارتون والأنميشن اللي هتعرض في رمضان السنة دي، هنتكلم معاكم كمان عن تاريخ الرسوم المتحركة في مصر، وأهم الأسماء اللي أثرت فيه وأثرت محتواه خلال السنين اللي فاتت.. وعلى فكرة الموضوع ده للكبار والصغار مع بعض!

 

بكار

مسلسل بكار واحد من أشهر مسلسلات الأنيميشن في مصر والوطن العربي، بدأ عرضه بشكل رسمي سنة 1990 بشخصيات رئيسية هي شخصية (بكار) الطفل النوبي الأسمر الذكي، وأصدقاؤه، ومعزته (رشيدة) واللي بتكلم الناس في المسلسل عادي! وكان المسلسل بيستعرض مغامرات بكار واللي كانت بتعجب الصغار والكبار، لأن المسلسل بالإضافة لتعليمه الأطفال أخلاق مهمة زي عدم الكذب، كمان كان بيشجعهم على البحث والاستكشاف والمغامرة، شخصية بكار كان واقف وراها مخرجة رسوم متحركة عبقرية هي الدكتورة منى أبو النصر.

والحقيقة أن د. منى تستحق فقرة كاملة للكلام عنها لدورها الكبير في إثراء الأنيميشن المصري، وهي من مواليد 1952 وحصلت على دكتوراة في الرسوم المتحركة من جامعة كاليفورنيا بأمريكا سنة 1988 ورجعت مصر علشان تقدم مسلسل الأنيميشن (رحلة السندباد البحري) و(سوبر هنيدي) و(بكار)، لكن مسيرة د. منى توقفت سنة 2003 لما توفت بعد صراع مع مرض السرطان.

الموسم الجديد من بكار هيعرض في رمضان السنة دي حصريًا على قناة النهار ومن تأليف عمرو سمير عاطف.

 

عصام والمصباح

بعد توقف 4 سنوات، هنشوف السنة دي جزء جديد من الأنيميشن المصري (عصام والمصباح)، اللي بيؤدي الصوت فيه المطرب مصطفى قمر، الأنيميشن بيحكي عن مغامرات (عصام الدين) الشقيق الأصغر لعلاء الدين، واللي بينتظر الحصول على مصباح سحري زي أخوه، فقط علشان تبدأ سلسلة من المغامرات واللي بتحتل زمن المسلسل بالكامل، بيشارك في الأداء  الصوتي في الموسم الجديد من المسلسل أنجي وجدان، ونسمة محجوب، ومحيي إسماعيل.

 

سمعه آخر حاجه

من إنتاج شركة (صوت القاهرة)، ويعتبر محاولة لإعادة إحياء الفنان المتميز إسماعيل يس من خلال تقديمه كشخصية كارتونية مصممة بطريقة ثلاثية الأبعاد بنشوف في المسلسل (سمعة) وهو في أيامنا الحالية وبيستعمل سماعات البلوتوث والتليفونات المحمولة، وغيرها من المفاجآت اللي أعلن عنها برومو المسلسل واللي هيعرض يوميًا في رمضان الحالي على التليفزيون المصري.

 

كلمتين وبس

ولسه مع التليفزيون المصري، ومسلسل كلمتين وبس والمعتمد على مناقشة المشاكل الإجتماعية اللي كان بيناقشها الفنان الراحل فؤاد المهندس في برنامجه اللي كان بيحمل نفس الاسم زمان… ومن الواضح من برومو المسلسل إنه بيناقش قضايا زي الدجل والشعوذة والثقافة وضرورة وجود مكتبة في كل منزل، ومشاكل الشباب المراهق وكتير من المشاكل الإجتماعية التانية.

 

الأزهر

أما أخر المسلسلات اللى بيقدمها التليفزيون المصري السنة دي فهو مسلسل الأزهر، واللي يعتبر مسلسل رسوم متحركة، ثلاثي الأبعاد، يستعرض تاريخ الأزهر الشريف منذ تأسيسه عام 972م في عهد القائد جوهر الصقلي والدولة الفاطمية، مرورًا بدولة المماليك، وصولًا إلى الدولة العثمانية، ثم حكم محمد علي، ولحد قيام ثورة 1919م، المسلسل بطولة سوسن بدر وإياد نصار وعبد الرحمن أبو زهرة، وهو إنتاج مشترك ما بين الأزهر الشريف وأكاديمة البحث التكنولوجي.

 

عائلة رمضان كريم

ولأن الأحلى دايمًا بنخليه للآخر.. السنة دي بيشارك الفنان الجميل أشرف عبد الباقى بمسلسل أنيميشن بعنوان عائلة رمضان كريم وبيشارك (عبد الباقي) في البطولة إسماعيل معوض، وحسن حسني.

المسلسل بيحكي عن شهر رمضان والعادات الإجتماعية اللي بتحصل فيه زي الدورات الرمضانية والعزومات وموائد الرحمن وغيرها من الأحداث اللي بيناقشها المسلسل في إطار كوميدي ساخر جميل.

الأنيميشن المصري رحلة طويلة من محاولات الإبداع وتوظيف التقنية الحديثة لإنتاج أعمال قادرة على المنافسة وجذب إهتمام الكبار قبل الأطفال، بعض المحاولات بتفشل لكن كتير منها بينجح وبيسيب جوانا ذكريات جميلة عن أيام أجمل.. وكل أنيميشن وانتوا طيبين!

مقترح