Back to School: ورجعنا صغيرين على قناة الحياة

تليفزيون

Back to School

- 09/12/2014

Back to School: ورجعنا صغيرين على قناة الحياة

عمرو يوسفعمرو يوسف
توك شو
من الآن
باسم كريستو

تم التقييم بواسطة

Rasha Zeidan

قيم

قيم الآن

Back to School: ورجعنا صغيرين على قناة الحياة

الدرس انتهى لموا الكراريس.. "صلاح جاهين"

زى ما أتحفنا الراحل صلاح جاهين بقصيدته "الدرس انتهى".. وكانت ملحمة وطنية عظيمة.. جاءت لنا برامج جديدة مرتبطة بأيام المدرسة والواجب والمذاكرة والحساب والألعاب وكل الحاجات الحلوة اللى بـ تفكرنا بأحلى أيامنا.

مين مش فاكر أيام المدرسة؟ مين ما يعرفش أستاذه ولا ناسى أصحابه ساعتها كانوا عاملين إزاى؟ مين ما بـ يحنش لأيام الدراسة واللعب والجد والهزار والخروج مع الشلة.

أهلًا بكم فى برنامج فكرته "أجنبية" كالعادة لكنه معمول بشكل عربى حلو ومصروف عليه كويس وفى النهاية بـ يرجعنا كلنا للمدرسة.. برنامج "Back to School" أو "العودة إلى المدرسة".

كل حلقة بـ يكون فيها اثنين من الفنانين (ممثل وممثلة أو مغنى ومغنية) أو ميكس ما بين الاثنين زى حلقة "هند صبرى ومحمد فؤاد" أو "نيللى كريم وهانى رمزى"، فى بداية الحلقة بـ يتعمل تقرير حلو فعلًا للفنان من وقت طفولته ولحد دلوقت.

والبرنامج بـ يعتمد على المفاجآت والشكل الاحتفالى كمان زى ما عمل مع هند صبرى وجاب والدها من السفر علشان يحتفل معاها بالحلقة.. وكل نجم لازم يجيب له حد هو بـ يحبه قوى، "وده معناه أنه معاه فريق معدين قوى جدًا".

المدرسة لازم يكون لها ناظر، واللى بـ تمثل دوره "تاتيانا" واللى بـ تكون معانا على مدار الحلقات المختلفة وهى اللى ماسكة الدرجات.. وتعالوا نشوف بقى التعليم تطور قد إيه؟

فى حصة الموسيقى بـ تكون عبارة عن واحد بـ يحرك شفايفه ويغنى من غير صوت ولازم يعرفوا إيه هى الأغنية دى.. وحصة التاريخ بـ تعرض مادة علمية عن حاجات تاريخية وفيها معلومة خطأ وعلى التلميذ اكتشافها.. وفيه العلوم اللى قائمة على نظريات علمية عجيبة صراحة.. لكنها من أكثر الفقرات اللى بـ تشد فى البرنامج.. واللى قائم عليها اثنين توأم وهما "هبة وربا" وكل واحدة معاها نظرية عكس أختها.

كلاكيت ثانى مرة فى استخدام النجوم، زي ما ذكرنا برضه فى برنامج الفنان أحمد فلوكس "المهمة 5/5"، وكأن مافيش حد غيرهم ينفع ييجى فى برامج ويعمل مسابقات وكأنهم هما اللى لازم يطلعوا فى التليفزيون.. ودى لعبة إعلامية قديمة علشان يقدروا يبيعوا الإعلانات ويعملوا نسبة مشاهدة.. لكن إحنا ضد الفكرة دى شوية.

أما عن التقديم فصراحة المذيع/ الفنان عمرو يوسف رائع فى تقديمه وعنده مقدرة على إدارة الحوار بشكل هائل والبرنامج عائلى باقتدار تقدر تقعد أنت وأطفالك تتفرجوا عليه.

عجبك ؟ جرب

برنامج الفنان أحمد فلوكس "المهمة 5/5".

نصيحة 360

برنامج "Back to School" العودة إلى المدرسة يعرض على قناة الحياة، من تقديم عمرو يوسف، وإخراج باسم كريستو، كل خميس 10 مساءً، الإعادة يوم السبت 2: 3 ظهرًا.