The Definitive Guide to Living in the Capital , Cairo , Egypt

إعلامية لبنانية من أشهر الإعلاميات في العالم دلوقتي، وده بسبب برنامجها (سكوب) بدأت مسيرتها الفنية كصحفية في بيروت، وبعدين راحت تدرس في لندن، ومن هناك بدأت في تقديم برامج فنية مع قنوات (MBC) وتألقت لما قدمت برنامج (Arab Got Talent) ومن بعده قدمت برامج كتيرة تميزت كلها باهتمامها بالنجوم والفن، وقدمت كتير من المهرجانات والمسابقات.

وتعتبر ريّا أول محاورة عربية تدخل كواليس السينما والفن في هوليود، وحصلت على ماجستير في الصحافة المرئية من لندن، ومن بعدها انطلقت علشان تعمل برنامج (سكووب).

سكووب:

فكرة البرنامج بسيطة قايمة على مقابلة نجوم هوليود وحضور افتتاح المهرجانات، وحفلات إطلاق الأفلام، البرنامج بيهتم بنجوم السينما بشكل كبير، وتقريبًا مافيش نجم معروف إلا وريّا عملت معاه حوار وقابلته، سواء بقى في مكان تصوير الفيلم، أو في حفل افتتاحه، أو استضافته في الأستوديو، البرنامج بيتقسم لثلاثة أجزاء بتتبدل، لقاء مع نجم أو أكتر، أجزاء ومقاطع من الفيلم محور الكلام، وفي الغالب طبعًا بتبقى أجزاء بتشدك للفيلم جدًا، وتقرير سريع عن الفيلم، أو أسئلة سريعة لممثلين.

الفكرة:

أحيانًا الفكرة البسيطة بتجيب نتائج مبهرة، بمعنى أن فكرة البرنامج مافيهاش تعب قوي، هي بس مقابلة مع النجوم، لكن في المقابل البرنامج من أكتر البرامج اللي متشافة في الوطن العربي، ومقدمة البرنامج بقت واحدة من المشاهير برضه (ما هو طباخ السم بيدوقه) لدرجة أن واحدة من أكبر شركات مستحضرات التجميل خلتها السفيرة الخاصة بيها، وواحدة من أكبر شركات المحركات خلتها الوجه الإعلاني بتاعها.

البرنامج ديكوره بسيط مجرد كراسي وترابيزة بسيطة وفي الخلفية إعلان كبير للفيلم اللي بيتكلموا عليه، أو بيبقى خارجي في اللقاء مع الفنانيين بره الأستوديو، بتحاول دايمًا تجدد في أنواع النجوم اللي بتستضيفهم، وهي محاورة شاطرة بتعرف تجيب أسئلة منها العادي ومنها اللي بيبين أنها مذاكرة كويس، وكمان معاها فريق إعداد شاطر، يعني مش نوعية أسئلة وإيه كان إحساسك لما فزت بالجايزة، وإنما بتلعب على نفسية الممثل وبتحاول تطلع منه ليه عمل الأداء الفلاني في المشهد الفلاني، ويمكن دراستها ساعدتها كتير في ده، كمان الفترة اللي عاشتها في لندن خلتها بتتكلم وتفكر زيهم، يمكن علشان كده مابيحسش الممثل أنه قدام حد عربي وإنما نص عربي نص أجنبي، وإن كان الاهتمام بفكرة تصدير الهوية العربية كان ممكن يبقى جانب مهم تلعب عليه ريّا من خلال برنامجها، يعني لو أنت عندك المقدرة على إدارة الحوار بشكل جيد، وعندك القدرة على الوصول إلى كل الكم ده من المشهورين، من الممكن توصلي حاجات إيجابية كتير عن العرب وتحسني صورتهم، بس صراحة ده مابيحصلش، إلا لو مثلًا قالت للمثل (أنك محبوب قوي في الوطن العربي) أو لو مثلًا (فتحت باب الأسئلة على تويتر لممثل معين وقالت بعضها) غير كده البرنامج لطيف.