The Definitive Guide to Living in the Capital , Cairo , Egypt

صحة ولياقة

في زمن “كورونا”.. تعمل إيه لو محتاج دعم نفسي ليك ولأفراد عائلتك؟

الأطفال خط ساخن دعم نفسي كبار السن كورونا وزارة الصحة
في زمن “كورونا”.. تعمل إيه لو محتاج دعم نفسي ليك ولأفراد عائلتك؟
    بواسطة
    Mohamed Talaat

    الأكيد إن فيروس “كورونا” المستجد مسبب ضغط نفسي لناس كتير، وعلشان كده اعلنت وزارة الصحة والسكان المصرية أن الخوف والقلق اللي بيحصل بسبب انتشار الفيروس أمر طبيعي، وده خلى الوزارة تعلن عن مجموعة من النصائح النفسية للمواطنين، للتغلب على الشعور بالخوف والقلق خلال فترة الإجراءات الاحترازية اللي انتهجتها الدولة لمواجهة الفيروس، وكمان خصصت رقمين للدعم النفسي المجاني.

    الوزارة بتنصحكم تتبعوا نظام غذائي صحي ومتوازن، وكمان النوم فترة كفاية، وتلعبوا رياضة، وتمتنعوا عن التدخين والكحوليات، ولازم تتواصلوا مع الأصدقاء والأقارب من خلال التليفون ومواقع التواصل الاجتماعي علشان تخففوا الضغوط عليكم.

    الوزارة قالت كمان إن تمارين التنفس والتأمل وأي تمارين عقلية هتساعدكم على الهدوء النفسي، مع الإنشغال بأمور إيجابية والتقارب الأسري، وممارسة أنشطة مشتركة مع أفراد الأسرة، وطبعًا ماتنسوش تتخذوا إجراءات الوقاية كاملة.

    كمان بتنصح الوزارة أولياء الأمور بمساعدة أبناءهم للتغلب على شعور الخوف، علشان ده ممكن ينتج عنه اضطرابات في السلوك زي الحركة الزائدة وكثرة التساؤل، ولازم تدوا أولادكم وقت واهتمام أكتر، وتتكلموا معاهم بلطف، وتخصصوا وقت للعب والراحة وممارسة الأنشطة، وتتجنبوا عزلهم عنكم، ولازم يكون فيه تجاوب مع ردود أفعال الأطفال وتقديم الدعم لهم.

    وكمان لازم تحافظوا على روتين أطفالكم اليومي، ويكون فيه جدول زمني جديد للدراسة والتعلم عن بعد، مع توضيح حقيقة فيروس “كورونا” لهم وتعليمهم كيفية الوقاية بعبارات سهلة، وحمايتهم من تلقي الأخبار والمعلومات الكتير لو ده هيأثر على نفسيتهم بالسلب.

    كمان وزارة الصحة والسكان بتطالبكم بالدعم النفسي لكبار السن وخاصة اللي عندهم أمراض مزمنة، ونصحهم بالتواصل المستمر مع الأصدقاء والأسرة من خلال التليفون، لانهم أكتر فئة هتشعر بالقلق والضغط النفسي، خاصة مع العزلة وتوقف نشاطتهم اللي كانوا بيعملوه، ولازم يتم تشجيعهم على استمرار أنشطتهم داخل المنزل، واستشارة طبيب متخصص لو لزم الأمر.

    وخصصت وزارة الصحة خطين ساخنين للصحة النفسية هما (8880700- 080)، و (0220816831) ودول لتقديم الدعم النفسي لكل المواطنين المتواجدين بالمنازل خلال فترة العزل والإجراءات الاحترازية، وهيرد عليكم متخصصين مدربين لتقديم الدعم النفسي.

    مقترح