Omar Abd-elmaqsoud
صرح جديد وعلم كبير لمصر هيترفع في مجال جراحة القلب، كشف عنه طبيب القلوب السير “مجدي يعقوب” واللي هيبقى عبارة عن توسعة هي الأكبر لمركز ومستشفى جراحة القلب في أسوان، لكن المرة دي التوسعة هتكون في قلب القاهرة، وجمب الأهرامات، علشان يبقى الهرم الرابع اللي هنفخر بيه كلنا كمصريين.
مركز ومستشفى جراحة القلب في أسوان شهد نجاح عالمي غير مسبوق ساهمت فيه التبرعات اللي بيستقبلها يوميًا من جميع أنحاء العالم، واللي بيروح 95% منها فعليًا للمرضى، وده الكلام اللي أكده الدكتور “مجدي يعقوب” في كلامه لقناة “العربية” لما كشف ولأول مرة عن المركز الجديد في القاهرة.
المركز الجديد اللي وصفه الدكتور “مجدي يعقوب” بإنه مش هيقل عالمية عن مركز أسوان، هيكون أكبر وأوسع 5 مرات من مركز أسوان، وتصميمه هيكون على إيد مجموعة من أكبر مهندسي العالم العربي وأوروبا، ومن المتوقع إن البناء هيبدأ في شهر أكتوبر الجاي.
رواندا، وموزمبيق هتكون محطات جديدة كمان على خريطة مركز ومستشفى جراحات القلب، ده غير مجموعة كبيرة من الدول العربية اللي هتكون على الخريطة سواء بإنشاء مراكز أو التعاون مع المراكز الموجودة بشكل كبير، وكلها هتكون تابعة بشكل مباشر لمركز القاهرة.
الدكتور “مجدي” أكد إن الفترة اللي جاية هيكون في أطباء وكفاءات من كافة الدول العربية، لتغطية كافة الحالات الموجودة، مع توفير مراكز للتدريب ليهم.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
