The Definitive Guide to Living in the Capital , Cairo , Egypt

فن وثقافة

القرية الفرعونية: رحلة سريعة فى تاريخ مصر في الجيزة

القرية الفرعونية: رحلة سريعة فى تاريخ مصر في الجيزة
بواسطة
Mona Abu Amer

لو عاوز ترجع 7000 سنة وتشوف أجدادنا قد إيه كانت حياتهم بسيطة وممتعة رغم بدائيتها، يبقى لازم تزور القرية الفرعونية فى الجيزة، فى الرحلة دى تقدر تختصر آلاف من السنين، وهـ تتعرف على تفاصيل حياة الفراعنة وطريقة معيشتهم وإنجازاتهم.

القرية عبارة عن جزيرة وسط النيل في بداية شارع البحر الأعظم فيها 9 متاحف، متحف لكل مرحلة بماكيتات توضح كل التفاصيل وبعض المقتنيات الأصلية لبعض الشخصيات الفرعونية، ده غير الجزء الترفيهي في القرية وهو عبارة عن إفطار وغذاء ويخت للتجول داخل القرية، وقت الرحلة بـ يمتد من ساعة حتي 4 ساعات وده علي أساس عدد المتاحف اللي تحب تدخلها أو البرنامج اللي بـ تختاره، واللى بـ يختلف فى تفاصيله وسعره كمان.

أول العروض عبارة عن جولة في القرية وزيارة 5 متاحف مع ركوب اليخت بالإضافة إلى الغداء، ودى تكلفتها 125 جنيه للكبار و95 جنيه للأطفال، وسعر التذكرة بـ يزيد للأجانب وبـ يكون 195 جنيه و155 جنيه للأطفال.

أما البرنامج الثاني فبـ يتضمن زيارة القرية و5 متاحف وركوب اليخت، وتكلفته للكبار 85 جنيه و70 جنيه للأطفال (الأجانب 150 جنيه والأطفال 120 جنيه).

البرنامج الثالث يتضمن زيارة القرية مع 9 متاحف وتكلفته للكبار 85 جنيه و70 للأطفال (الأجانب 155 والأطفال 125).

أما البرنامج الرابع فبـ يتضمن زيارة القرية و5 متاحف وتكلفته للكبار 60 جنيه وللأطفال 50 جنيه (الأجانب 125 والأطفال 100)، البرنامج الخامس بـ يتضمن زيارة القرية ومتحف واحد فقط، وتبلغ تكلفته للكبار 40 جنيه والأطفال 30 جنيه.

أما البرنامج السادس والأخير فـ يتضمن التجول فى القرية فقط، وتكلفته للكبار 30 جنيه و20 للأطفال، أما فى حالة اختيار برنامج لا يشمل زيارة المتاحف تقدر تضيف على التذكرة زيارة أى متحف بـ 5 أو 10 جنيه فقط، أما المجموعات والشركات فبـ يكون لهم عروض خاصة.

الرحلة بـ تبدأ بالقناة الأسطورية بمصاحبة أحد المرشدين، والقناة الأسطورية عبارة عن عوامة علي شكل  استراحة بها بعض محلات الهدايا والبازارات، وبـ تستغرق حوالي ربع ساعة، بعد كده رحلة نيلية داخل القرية تبدأ بمشاهدة بعض التماثيل لأهم آلهة الفراعنة، ومنهم أوزيريس، أيزيس، حورس، آمون، تحتمس الثالث، أخناتون، رمسيس الثاني، أبو سمبل، بداية من مشهد سيدنا موسى هـ تحس أنك داخل الأحداث وده من خلال تمثيل الأشخاص لبعض المشاهد التاريخية، بالإضافة لمشاهدة الحياة الزراعية للفراعنة وأهم الأدوات المستخدمة، بعد الرحلة النيلية تدخل معبد الكرنك بمصاحبة المرشد المختص، وتبدأ بزيارة بيت النبيل، وبيت الفلاح، والستوديو الفرعوني، بعد كده تقدر تأخذ استراحة في كافيتريا القرية (اللوتس) وكمان فيها إفطار عبارة عن فطير مشلتت وعسل وجبنة وده بـ يكون اختياري خارج التذكرة 20 جنيه، وكافيتريا ثانية (حورس) للمشروبات فقط.

الجزء الثاني من الرحلة يبدأ بمقبرة توت عنخ آمون بثرواتها وكنوزها، ثم سوق المقبرة وفيه هدايا تذكارية، في حالة اختيارك لأحد البرامج اللي بـ تحتوي علي غداء هـ تكون في مطعم الملك توت عنخ آمون، وهو عبارة عن فراخ مشوية أو كفتة مع الأرز والسلاطة والخبز، بالإضافة لوجبات ثانية إضافية خارج التذكرة.

بعد الغداء بـ تكون رحلة اليخت، أما الجزء الأخير من البرنامج فبـ يتضمن زيارة المتاحف التسعة أو بعضها، الرحلة بـ تبدأ بمتحف الفن الإسلامي واللى هـ تشوف فيه فن الأرابيسك وماكيتات لمساجد محمد علي زي مسجد قبة الصخرة وبعض النماذج للخطوط العربية، والخزف… إلخ.

أما متحف جمال عبد الناصر فهو من المتاحف اللي بـ تحتوي على مجموعة من المقتنيات الأصلية للرئيس الراحل جمال عبد الناصر، بالإضافة إلى ماكيتات للسد العالي، وقناة السويس… إلخ.

أما متحف السادات فبـ يحتوي كمان علي المقتنيات الأصلية للرئيس السادات بالإضافة إلى ماكيتات لحرب أكتوبر، الجندي المجهول… إلخ.

متحف سيد رجب، وهو مؤسس القرية فبـ يضم بعض المقتنيات الخاصة، ويُمكن كمان استخدام القاعة في الندوات وأحيانًا للغداء في حالة وجود عدد كبير من الزوار، أو كصالة لعمل الأفراح.

أما متحف تاريخ مصر الحديث فبـ يشمل جزء كبير من تاريخ مصر من عهد محمد علي لحد عهد الملك فاروق مرورًا بأهم الشخصيات زي أم كلثوم، أحمد زويل… إلخ.

متحف التحنيط  ويحتوي علي بعض نماذج لعملية التحنيط وأهم الآلهة المرتبطة بفكرة التحنيط، ومتحف الأهرامات ويمثل فكرة بناء الهرم وأهم الأدوات المستخدمة في بناءه والمسلات… إلخ.

أما متحف العصر البطلمي بـ يشمل العصور من الإسكندر الأكبر وحتى الملكة كليوباترا السابعة، آخر المتاحف متحف السيارات اللى بـ يوضح طرق صناعة السيارات من بدايتها لغاية دلوقت.

غير كل اللى فات، الرحلة دى مميزة للأطفال، لأن فيها جزء ترفيهى بـ يتمثل فى الملاهى والسينما وستوديو للتصوير ومركز الفنون اللى بـ يعمل ورش فنية للزجاج والفخار.. وغيرها.

المواعيد بـ تكون كل أيام الأسبوع من 9 صباحًا لـ 5 مساءً، ماعدا يوم الجمعة اللي بـ يكون لحد 4 مساءً.

مقترح