The Definitive Guide to Living in the Capital , Cairo , Egypt

تعلُّم اللغة مش بس grammar وحفظ كلمتين، اللغة كمان محتاجة ممارسة ومحتاجة أنك تتغلب على خوفك أو كسوفك من أنك تجرب تتكلم وتغلط مرة وأتنين .

طبعًا القاهرة فيها أماكن كتير تقدر تتعلم فيها اللغة، لكن الحقيقة أن مافيش أماكن كتير تقدر تمارس فيها اللي أنت اتعلمته من اللغة دي، وعلشان مساحة التجربة قليلة جدًا في مصر، وإحنا لسه مش قادرين نتخلص من إيفيه عادل إمام الشهير "yes but sometimes no!!" اللي بيلخص قصتنا مع بداية تعلّمنا لأي لغة، "رووم آرت سبيس – Room Art Space" عملوا إيفينت لذيذ أوي بيوفرلك البيئة اللي تجرب فيها نفسك في اللغة اللي بتتعلمها من غير توتر، الإيفينت اسمه (Room Language Café) أو (مقهى رووم اللغوي)،  يوم الأربع الجاي 24 أغسطس ولينك الإيفنت هنا.

إيه فكرته وإزاي تقدر تستفيد منه؟

مقهى رووم اللغوي ده يا سيدي هو تجمُّع لتبادل اللغات، المكان هيكون عبارة عن تربيزات في الكافيه كل تربيزة عليها اسم لغة مختلفة، اللغات اللي هيبدأوا بها بشكل أساسي هي ( العربي – الإنجليزي – الفرنساوي – الألماني – الإيطالي – الأسباني )، وهيتم فتح تربيزة لكل لغة جديدة .

كل اللي عليك أنك ببساطة تروح Room Art Space & Café في 10 شارع إتحاد المحامين العرب – جاردن سيتي ( خلف قسم قصر النيل )، وأول ما تدخل هتبلّغ الإدارة بلُغتك الأم، وبعدين تروح على التربيزة اللي عليها علامة اللغة اللي بتتعلمها، هتلاقي ناس قاعدين عليها هتبدأ تتكلم معاهم لمدة 3 ساعات تقريبًا، بس أهم حاجة إن الكلام هيكون باللغة المحددة للتربيزة بس، ماينفعش أي لغة تانية، وده اللي هيديك مساحة أكبر للإستفادة، وهيخليك تضطر إن حتى مخك يفكر باللغة دي.

طبعًا مش محتاجين نقول لك إن دي أفضل طريقة ممكن تتعلم بيها أي لغة بشكل سريع وبدون قيود الجو الأكاديمي.

ماتنساش تكون هناك في المعاد من 7,00 : 11,00 علشان تقدر تستفيد بكل الوقت.

نتمنى لك تجربة مفيدة وشيقة!