The Definitive Guide to Living in the Capital , Cairo , Egypt

الجامع في الثقافة الإسلامية مش مكان للعبادة وبس.. لكنه مكان بـ يجمع العبادة والدروس ومجلس القضاء ومعاه بـ يبقى السبيل (يعني المكان اللى بـ يقعد فيه المسافرين والغرباء) وساعات كمان بـ يكون فيه مستشفى ملحقة بالجامع زي مستشفى قلاوون.

المهم أنه يكون واسع ومرتكز في وسط البلاد وكل الناس عارفاه.. وفي شارع المعز بقى هـ نلاقي جوامع كثير وسبيل ومستشفيات وحاجات كده ولا تخطر لك على بال، المهم بقى أنك تركز علشان تعرف تتصرف براحة وأنت بـ تزور الأماكن دي هناك وعلشان تعرف كمان تستمتع لازم تعرف شوية معلومات عن المكان فـ يكون الاستمتاع أكبر.

 

الأقمر

الأقمر واحد من مساجد القاهرة الفاطمية، ومكانه في شارع النحاسين اللى هو المعز لدين الله الفاطمي دلوقت.. واللى بناه الـوزير المأمون بن البطايحي بأمر من الخليفة الآمر بأحكام الله وده كان لقبه أما اسمه فهو "أبي على منصور" وده كان سنة 519 هـ (1125 م) وهـو أول جامع في القاهرة يتعمل في الوجهة بتاعته تصميم هندسي خاص.

 

المقريزي

بـ يروي المقريزي (واحد من أهم المؤرخين) أن المسجد اتبنى في مكان أحد الأديرة اللي كانت اسمها "بئر العظمة".. وبـ يرجع السبب لده أنها كانت تحوي عظام بعض شهداء الأقباط.. وتم تسمية المسجد بالاسم ده علشان لون حجارته البيضاء اللي تشبه لون القمر.. شوفتوا قد إيه الناس كان خيالها عالي وكانت بتصمم بمزاج عالي.

 

التصميم

الأقمر أول جامع  فيه الواجهة موازية للشارع بدل ما تكون موازية للصحن وعملوا كده علشان القبلة تاخد وضعها الصحيح.. ولما حضرتك تدخل الجامع هـ تلاقيه منحرف بالنسبة للواجهة شوية.. وبـ يتكون من صحن صغير مربع مساحته 10 متر تقريبًا.. وحوله رواق واحد من ثلاثة جوانب وثلاثة أروقة في الجانب الجنوبي الشرقي يعني ناحية القبلة.. ومن فوق الأورقة دي هـ نلاقي تحليات بكتابات كوفية مزخرفة ومعمولة على أعمدة رخامية قديمة.. لها قواعد مصبوبة شكلها تحفة.. وتيجان مختلفة بـ تربطها أعمدة خشبية وأجمل حاجة في الجامع صراحة هي واجهته اللي مافيش زيها في زخارفها البديعة ومافيش واجهة ثانية في جوامع القاهرة زيه..

وأول مرة في عمارة المساجد نلاقي "العقد المعشق" بتشكيلاته الهندسية الجميلة.. والشكل ده اللي انتشر في العمارة المملوكية في القرن الخامس عشر الميلادي وفوق العقد المعشق هـ تلاقي "العقد الفارسي" وهـو تشكيلات وزخرفة هندسية على شكل مروحة في وسطها دايرة.. وأهـم ميزة في تصميم الجامع استعمال المقرنصات (يعني أشكال هندسية بـ تعمل شكل المحراب وبـ تتكون من تشكيلات شبه خلايا النحل) والجميل بقى أن ما حدش استعملها في بناء المساجد إلا في مئذنة جامع الجيوشي.