The Definitive Guide to Living in the Capital , Cairo , Egypt

مسجد وسبيل سليمان أغا السلحدار (1255هجرية / 1839م)، بيرجع تاريخ الإنشاء لعصر محمد علي. المسجد بيقع عند بدايه حارة برجوان بشارع أمير الجيوش (المعز لدين الله) وملاصق له السبيل. تعالوا نتعرف أكتر على المكان.

 

سليمان أغا السلحدار

هو الأمير سليمان أغا السلحدار اللي ترقى في المناصب خلال عهد محمد علي باشا الكبير؛ علشان يوصل إلى منصب السلحدار يعني المسؤول عن السلاح.. وده منصب لو تعلمون عظيم في العهد ده.

الراجل كان بيحب البناء جدًا وكان عارف أن كل ما يكثر فى البناء اسمه هيعيش والناس هتتكلم عنه بعد ما يموت.. علشان كده اشتهر سليمان أغا السلحدار بكثرة البناء، واستولى على كثير من الكنوز التاريخية من المباني بالقاهرة واستخدمها في أبنيته الخاصة، حسب حاجته.

الجامع

واحد من المساجد اللي اتعملت في عصر محمد علي في مصر أيام المماليك، وأنتم عارفين بقى المماليك واللي عملوه في مصر، مكانه بالضبط على الوصفة القديمة عند بداية حارة “برجوان” بشارع أمير الجيوش (المعز لدين الله)، ولو حضرتك جاي من ناحية باب الشعرية.. يعني من الناحية الثانية يبقى هو في امتداد شارع النحاسين من ميدان باب الشعرية.

وأنت داخل المسجد هتلاقي مدخل كأنه مغارة طويلة وبعدين سلم جرانيت كبير يطلع لك لحد المسجد.. وأول ما حضرتك تدخل جوه هتحس أنك انتقلت بآلة الزمن لعصر المماليك بالضبط، يتكون من مستطيل مقسوم إلى مربعين، المربع الغربي فيه حرم المسجد، يعني صحنه، وهو عبارة عن صحن كبير، وحوله الأروقة من الجهات الأربعة وبتغطيها قبب صغيرة قائمة على عواميد رخامية.

وكل قبة لها زخرفة مختلفة بنقوش زيتية متعددة الألوان، وقائمة على الأسلوب الإسلامي في الرسم.. وهو بيتشكل من ثلاثة محاور رئيسية في الرسم وهي رسوم نباتية وهندسية وكتابات قرآنية، وبيغطي الصحن سقف خشبي مفتوح في وسطه فتحة (شخشيخة) للتهوية والإضاءة وحماية المسجد من الأمطار.

أما المربع الشرقي ففيه مكان الصلاة ويتكون من مكانين جنب بعض ويشمل كل منها على عمودين رخام بتقوم عليهم عقود مزخرفة على شكل دواير، وتقدر تشوف تقسيم مكانين الصلاة على هيئة ثلاثة أروقة، وكلها موازية لحائط القبلة، وبيغطي مكان الصلاة سقف خشبي مزخرف بنقوش زيتية ألوانها في غاية الروعة، وفي وسط جدار القبلة مكان الصلاة محراب من الرخام.. أول ما هتشوفه صدقني هتحب تتصور جنبه فورًا من كثر بديع النقوش والتقسيمات اللى هناك.

زوروا المكان واستمتعوا وصوروه وخلوا كل العالم يشوف قد إيه عندنا حاجات مدهشة.