The Definitive Guide to Living in the Capital , Cairo , Egypt

فن وثقافة

مهرجان ونسWANAS: مساحة مشتركة للعالم فى ساقية الصاوي

مهرجان ونسWANAS: مساحة مشتركة للعالم فى ساقية الصاوي
بواسطة
Ahmed Abd El Gawad

المهرجان زى ما هو واضح من العنوان متخصص في موسيقى الشعوب اللى هـ تحسوا معاها بالونس.. والونس هو رسالة السلام والحب اللى طالعة من الشعوب وإلى الشعوب، وهدف المهرجان هو خلق طريقة وحاجة جديدة ولغة جديدة للتواصل بين شعوب العالم.. علشان يبقى ده بعيد عن  طرق التواصل السياسية اللى بـ تتحكم فيها المصالح السياسية والحزبية وبعيد عن الشركات العابرة للقارات والاستثمار فى البلاد والعباد، هنا استثمار فى الونس وسعى لخلق تبادل معرفي وثقافي ووجداني بين البشر المختلفة ثقافيًا، أو “متنوعة” لو عاوزين الدقة يعنى.

نجح مركز المصطبة باتصالاته الشخصية وفي محاولته الأولى في اجتذاب ثلاث فرق من ثلاث دول أوربية مختلفة، وهدفه أن اسم “ونس” يبقى زخم ثقافي شعبي دولي حقيقي، هـ يخلى لمصر مكان على خريطة الدول المهتمة والراعية لثقافات الشعوب، وده الدور الحقيقى لبلد كبيرة زى بلدنا.. ومصر من حقها يكون لها الدور ده بجدارة وبلا نقاش.. لأننا أغنياء بثقافتنا وأغانينا وتراثنا وعاداتنا وتقاليدنا اللى حولناها مع الوقت لفن جميل تتناقله الأجيال.. ويكفي أن في نفس المهرجان هـ تشارك في دورته الأولى 6 فرق مصرية.. كل فرقة فيهم بـ تمثل ثقافة شعبية محلية مختلفة.

والليلة الكبيرة دى هـ تتم على مسرح الضمة فى عابدين وعلى مسرح النهر فى ساقية الصاوى فى الفترة من 17 سبتمبر لحد 20 سبتمبر 2014، وتعالوا نتعرف على الجدول:

اليوم الأول الموافق 17/9 هـ يعملوا ورشة عمل على هامش المهرجان بين أعضاء فرقة الطنبورة وأعضاء الفرقة الفرنسية Lo Core De La Planaهـ تبدأ الساعة 7 مساءًعلى مسرح الضمة التابع لمركز المصطبة للموسيقى الشعبية المصرية..

ولما تخلص الورشة دى ثانى يوم هـ يعتبروه اليوم الأول أو الافتتاح وده هـ يكون يوم 18/9 علي مسرح النهر بساقية الصاوي الساعة 7 مساءً، ومن الساعة7:15 إلى 8:00 مساءً فرقة الجركن البدوية.. وبعدين من الساعة8:15 إلى 9:00 مساءً فرقة مزامير النيل.. ومن الساعة9:15 إلى 10:15 مساءً الفرقة الفرنسيةLo Core De La Plana – France.

أما اليوم الثانى للمهرجان اللى هو يوم 19/9 على مسرح ساقية عبد المنعم الصاوي هـ يبدأ من الساعة7 إلى 7:45 مساءً فرقة نوبانور.. ومن الساعة 8 إلى 8:45 مساءً فرقة دراويش أبو الغيط.. ومن الساعة9 إلى 10 مساءً الفرقة الإسكتلندية – Scotland Ross &Jarlath.

واليوم الثالث للمهرجان 20/9 برضه علي مسرح ساقية عبد المنعم الصاوى.. وهـ يبدأ من الساعة 7 إلى 7:45 مساءً فرقة الرانجو.. ومن الساعة 8 إلى 8:45 مساءً فرقة الطنبورة.. ومن الساعة9 إلى 10 مساءً الفرقة الهولنديةTrof – Netherlands.

 

سعر التذكرة 30 جنيه، ولو عاوزين تعرفوا معلومات أكثر ادخلوا على صفحة الإيفنت على الفيسبوك، جربوا الونس بشكل جديد مع شعوب العالم وفرقهم الموسيقية.

مقترح