The Definitive Guide to Living in the Capital , Cairo , Egypt

ميرفت أمين… قطة السينما المصرية
بواسطة
Mohamed Adly

من أكتر الحواجز اللي ممكن تكون بين الجمهور وأي فنان، هو اعتماده بشكل أساسي على ملامحه الشكلية بعيدًا عن الاهتمام بتقديم أدوار مختلفة أو متنوعة يقدر يعيش بيها وسط الجمهور، شوفنا ممثلات كتير ظهروا واختفوا بعد فترة لمجرد إنهم اعتبروا إن جمالهن هو الموهبة الحقيقية، وده الحاجز اللي قدرت الممثلة ميرفت أمين إنها تكسره.

رغم إن شهرة ميرفت أمين كانت بالصدفة إلا إن حبها للتمثيل بدأ من وهي في الجامعة، اشتركت ميرفت في فريق الجامعة وقدمت مسرحية “يا طالع الشجرة” للكاتب توفيق الحكيم وبعد التخرج قدمت مسرحية “مطار الحب” مع الفنان عبد المنعم مدبولي، بعدها قدرت تقنع والدها إنها تزور استديو “جلال” مع أحد أقاربها لتحقيق حلمها ورؤية رشدي أباظة، وفعلًا ده حصل وبعدها شافها أحمد رمزي واقترح على والدها إنها تشارك في فيلمه الجديد وبالفعل حصل، لكن البداية الحقيقية لظهور نجم ميرفت أمين كان في فيلم “المراهقات” عام 1965 مع الفنان أحمد مظهر.

خلال مشوارها الفني تميزت ميرفت أمين برقتها وجمالها وأطلق الجمهور عليها لقب “قطة السينما المصرية” ومع ذلك قدرت تقدم أدوار مهمة وصعبة من الناحية النفسية زي دورها في فيلم “زوجة رجل مهم” أمام أحمد زكي وكمان دورها في فيلم “أبي فوق الشجرة” أمام عبد الحليم، ومن الأدوار اللي صرحت إنها بتحبها كان دور زوجة الرئيس الراحل أنور السادات في فيلم “أيام السادات” واللي قالت إن ترشيحها للدور كان من السيدة “جيهان السادات” نفسها.

ملامح ميرفت أمين الرومانسية مامنعتهاش تشارك في أفلام كوميدي زي “أخطر رجل في العالم” مع الفنان فؤاد المهندس و”البحث عن فضيحة” مع عادل إمام اللي قدمت معاه واحد من التجارب الكوميدية المميزة بعدها بسنين في فيلم “واحدة بواحدة” والمشهور بالفنكوش.

بداية اشتراك الممثلين في تقديم برامج كانت عند “ميرفت أمين” اللي قدمت برنامج “سينما القاهرة” وحاورت من خلال نجوم كبيرة زي سعاد حسني ونادية لطفي، وكمان البرنامج كان بيقدم كواليس الأعمال الفنية وقتها.

حياة ميرفت أمين الشخصية كانت مليئة بالأحداث، تزوجت  6 مرات، وكان أولها من المطرب السوري “موفق بهجت” عام 1970،  وبعدها صرحت أكتر من مرة إنها ندمت إنها خاضت التجربة دي، وتزوجت من عازف الجيتار الشهير عمر خورشيد، إنما أكتر فترة كانت مستقرة هي فترة زواجها من الفنان حسين فهمي وأنجبت منه بنتها “منة فهمي”.

رغم ارتباط اسمها بحسين فهمي لفترة طويلة إلا إنها صرحت أكتر من مرة إن ارتباطها الفني كان أكبر بالفنان “نور الشريف” اللي قدمت معاه حوالي 27 فيلم منهم دائرة الانتقام وسواق الأوتوبيس وآخرهم كان فيلم “بتوقيت القاهرة” للمخرج أمير رمسيس.

قدمت ميرفت أمين خلال مشوارها أكتر من 100 عمل فني، ومؤخرًا بدأت مرحلة جديدة في حياتها الفنية من خلال تقديم أدوار الأم في عدد من المسلسلات منهم “حتى لا تطفيء الشمس” مع مجموعة من الفنانين الشباب منهم محمد ممدوح وريهام عبد الغفور ومسلسل “بالحجم العائلي” مع الفنان يحيى الفخراني، ورغم تميز السينما المصرية بالجميلات من زمان، إلا أن اللي عاشوا في ذاكرتنا مش كتير، ومنهم أكيد قطة السينما المصرية “ميرفت أمين”

مقترح