The Definitive Guide to Living in the Capital , Cairo , Egypt

5 مسلسلات لازم تتفرج عليهم في رمضان

5 مسلسلات لازم تتفرج عليهم في رمضان
written by
Dina Mokhtar

فيه مليون حاجة تخليك تحب شهر رمضان في مصر؛ سواء بقى الجو العام اللي بتحس بيه في الشوارع، اللمة على الفطار وحتى حلويات ومشروبات رمضان اللي بنستناها من السنة للسنة. من ضمن الحاجات اللي بتميز رمضان في مصر هي المسلسلات؛ زمان كان آخرنا مسلسلين على التلفيزيون المصري  –واحد منهم أبطاله جامدين والثاني مسلسل ديني- وفوازير معاهم تنعنش المسائل، دلوقتي مع التطور الرهيب في الميديا الموضوع بقى مختلف، كم المسلسلات المتوزعة على كم القنوات الفضائية الكثيرة يخليك مش عارف تتفرج على إيه ولّا إيه.

ولكن مع كل الاختيارات اللي قدامنا السنة دي، نقدر نقول أن فيه مجموعة من المسلسلات حجزنا قدامها كراسينا من غير نقاش. واختيارنا للمجموعة دي مبني على كذا حاجة؛ ما بين نجوم كبار آدائهم بيبهرنا، ومجموعة عمل بنثق في شغلهم من خلال أعمال سابقة ليهم، وأعمال صناعها تعاملوا معاها على أنها عمل فني عناصره لازم تكون متكاملة؛ سواء تصوير، ملابس وديكور، أداء وإخراج، وفي النهاية وارد جدًا المسلسلات دي ما تكونش بالمستوى اللي توقعناه… خلينا ما نسبقش الأحداث ونقول لك إيه المسلسلات اللي إحنا مستنينها:

 

ونّوس:

نعتقد أن عبقرية وكاريزما الفنان يحيي الفخراني ما يختلفش عليها اثنين. وفوق موهبته وقدرته على تقمص أي شخصية الفنان يحيي الفخراني عنده خلفية ثقافية تخليه يختار العمل الفني اللي بيشارك فيه بوعي وعناية. السنة دي منتظرين مسلسل "ونّوس"، واللي بيقدم فيه الفنان دور شيطاني فكرنا بدور آل باتشينو في فيلم Devil’s Advocate ، ومع ذلك إحنا عارفين أن لمسته للدور أكيد هتكون مختلفة، وخصوصًا أن بيشاركه عدد كبير من الأسماء الكبيرة زي الفنانين هالة صدقي، نبيل الحلفاوي ولطفي لبيب.

وبغض النظر عن وجود الأسماء الكبيرة دي، لاحظنا من خلال بروموهات المسلسل أن الإخراج –لشادي الفخراني- والتصوير هيلعبوا دور كبير في توصيل العمل للمتفرج.

 

جراند أوتيل:

من المسلسلات اللي شدنا فيها مجموعة كبيرة من العناصر اللي باين فيها جهد؛ فواضح أن الخط التاريخي اللي بتدور فيه الأحداث مش الوقت الحالي، وبالتالي فيه اهتمام بتفاصيل الديكور والملابس ودي أول حاجة شدتنا للعمل. ثاني حاجة عجبتنا كانت الموسيقى التصويرية اللي ملائمة للأحداث –وهي عن واحد بيدوّر على قاتل اخته وسط مجموعة من نزلاء وعاملي فندق فخم. وثالث سبب يخلينا نتحمس للمسلسل هو ثنائي التأليف والإخراج (تامر حبيب ومحمد شاكر خضير)، واللي قدم لنا رمضان اللي فات مسلسل قوي وهو "طريقي".

ده طبعًا غير مجموعة النجوم المميزة؛ الفنان عمرو يوسف اللي هيقدم لنا السنة دي أكشن مختلف عن اللي تعودنا عليه، ومعاه أسماء  شابة ثانية ناجحة زي دينا الشربيني، أحمد داوود، محمد ممدوح وأمينة خليل.

 

ليالي الحلمية:

من أشهر الأعمال الرمضانية في تاريخ الدراما المصرية، وده سبب وجيه يخلينا نتفرج على الجزء السادس للمسلسل. ولكن بغض النظر عن شهرته، الجزء ده عاش دراما لوحده علشان يطلع للمتفرج؛ ما بين وفاة واحد من أهم أبطال المسلسل –الفنان ممدوح عبد العليم الله يرحمه- واللي لولا التعديلات اللي اتعملت في السيناريو كانت الفنانة إلهام شاهين انسحبت من العمل، وموجة الانتقادات اللي واجهها البرومو أول ما طلع، ده غير رفض الشاعر الكبير سيد حجاب لاستخدام موسيقى التتر القديم على النسخة الجديدة من العمل، واللي كانت من كلماته وألحان الفنان ميشيل المصري وغناء الفنان محمد الحلو.

كل ده يخلي عندنا فضول نعرف إزاي صناع العمل واجهوا كل الدراما دي، وهل نجحوا في تجاوزها ولا لأ. عامة إحنا مطمئنين ما دام مخرج العمل الفنان مجدي أبو عميرة ووجود ناس من ريحة الحلمية القديمة زي الفنانة صفية العمري والفنان هشام سليم.

 

سقوط حر:

 بعد النجاح الكبير لمسلسل "تحت السيطرة"، طبيعي جدًا إننا نتحمس لأي عمل جديد يكون عليه اسم من الاسمين دول: الفنانة نيللي كريم أو المؤلفة مريم نعوم؛ الثنائي ده قدم لنا مجموعة كبيرة الأعمال التلفيزيونية والسينمائية الناجحة فنيًا وجماهيريًا. متشوقين نعرف إيه الجديد عندهم السنة دي.

بيعجبنا في الفنانة نيللي كريم أن كل مسلسل بالنسبة لها تحدي جديد؛ وبالتالي متوقعين إننا هنشوف حاجة جديدة. تمنينا أن المسلسل يكون خارج إطار النكد ووجع القلب، ولكن واضح أن الموضوع هيكون جد لأن المسلسل بيتكلم عن واحدة بتعاني من اضطرابات عقلية بيتم اتهامها بقتل جوزها واختها –ربنا يستر.

 

راس الغول:

فريق العمل كفنانين مشهورين وتاريخهم غني عن التعريف –سواء الفنان محمود عبد العزيز،الفنانين فاروق الفيشاوي وميرفت أمين. إنما الفريق اللي وراء الكاميرا، فبالرغم من أن ناس كثير مش بتدوّر على مين كاتب العمل أو مخرجه، إلا أن مؤلف المسلسل وائل حمدي هو كاتب سيناريو فيلم "هيبتا" بجانب مشاركة مريم ناعوم في تأليف مسلسل "سقوط حر"، وبيشاركه في التأليف شريف بدر الدين اللي ساهم في تأليف وكتابة الجزء الأول من السيت كوم الناجح جدًا "تامر وشوقية".

أما المخرج أحمد سمير فرج،  فاشتهر بأفلام الأكشن زي "جوبا"، و"كود 36"، ولكن أشهر أعماله كمخرج هو الفيلم الكوميدي "بنات العم". كل ده يخلينا نتحمس نشوف خلطة المواهب دي هتوارينا إيه السنة دي.

#وحوي_يا_ كايرو

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح