The Definitive Guide to Living in the Capital , Cairo , Egypt

بينوس من الأماكن الهادية في شارع 9 في المعادي، ويعتبر مكان مثالي لو عاوز تذاكر أو تشتغل أو تقابل حد في هدوء، ووسط أشجار شارع 9. المكان مقسم جزء مفتوح وسط الأشجار، وجزء تاني ممنوع التدخين فيه مقفول في الدور التاني، وبرضه بيطل على الأشجار.

لاحظنا من فترة إن فيه منيو جديد للعصائر والأكل الصحي، واللي فيه كل حاجة قدامها عدد السعرات الحريرية بتاعتها، سواء عصير أو سلاطة أو كريب معمول من حبوب الدقيق الكاملة.

طلبنا سلاطة بالدجاج والتفاح واللوز بـ 63 جنيه، وطلبنا علشان نشبع جنبها مكرونة مسلوقة بـ 11 جنيه، مع صوص الـ Honey mustard، السلاطة كان فيها خيار وتفاح وجرجير وطماطم ولوز وعين جمل، والكمية كانت كبيرة جدًا، وطازة شبعتنا جدًا وكل حاجة فيها كانت متوافقة ومتجانسة قطع الدجاج كانت كبيرة ومش ناشفة برغم إنها مش مقلية، وطعم التفاح مع الخيار مع الصوص كان يستحق التجربة.

طلبنا كمان موكا بـ 45 جنيه، وسموزي ليمون بالنعناع بـ 37 جنيه، الموكا كان ناقصها شوية سكر بس غير كده تمام، لكن الليمون بالنعناع كان تحفة ومظبوط، لا مسكر زيادة ولا ناقص سكر ما يتشبعش منه كالعادة.

القعدة في بينوس ما يتشبعش منها خاصة لو وراك شغل وعاوز تقضي طول اليوم هناك، لكن واجهتنا مشكلة مع الإنترنت اللي المفروض مجاني، رفض يشتغل خالص طول فترة وجودنا هناك.