The Definitive Guide to Living in the Capital , Cairo , Egypt

كل فترة بـ تطلع تقليعة جديدة في الحلويات، الكل بـ يحاول يجذب الزبون بمنتج جديد ومبتكر، وأكيد أهم حاجة أن طعمه يبقى حلو، وده كله متوفر في "ذا مهلبية كومباني – The Mahalabeya company" اللي لسه فاتح قريب في شارع 9 في المعادي.

أول حاجة لفتت نظرنا للمحل هو الورد اللي فوق الاسم الحقيقة يعنى، مش بس علشان إحنا من عشاق الورود، لأ هو فعلًا شكله مبهج غير ألوان الكراسي الملونة بره المحل مع لوجو المكان اللي كله ألوان، تحس أنك رايح مهرجان مبهج، من قبل ما تدخل المكان حتى.

النظام هناك كالآتي بـ تدخل تختار هـ تشتري إيه ويا إما تأكله هناك ولو عاوز تشرب حاجة أو تأخد اللي أنت عاوزه وتمشي، والحقيقة أن الناس هناك كانوا ودودين جدًا شرحوا لنا مكونات كل طبق على حدة قبل ما نقرر هـ نشتري إيه، مبدأيا فيه حجمين للأرز باللبن أو المهلبية أو الكريمة، حجم صغير أكبر من حجم الكب كيك حاجة صغيرة وحجم كبير أصغر من حجم علبة الآيس كريم، المهم بعد حيرة طويلة جدًا ما بين الأصناف: كريمة نوتيلا وتراميسو وكريمة بالفواكة ومهلبية بالموز والكراميل وأرز باللبن بالقرفة والمكسرات، ده غير الحاجات اللايت زي حبوب الشيا بالفاكهة والموسلي والزبادي بالفواكة، بعد تردد كبير اختارنا تيراميسو بـ 20 جنيه حجم الكبير، وأرز باللبن قوس قزح بـ 16 جنيه، ومهلبية بالتفاح والقرفة بـ 16 جنيه وAfter Eight وده شوكولاتة بالنعناع بـ 20 جنيه.  وحطوها لنا في علبة لسه معجبين باللوجو بتاعها إلى الآن من بساطة التصميم واللي هي عبارة عن دوريات مزخرفة ملونة مستوحاة من الفنون الهندية المبهجة.

أكثر حاجة عجبتنا كانت التيراميسو من كثر جمالها مش عارفين نوصفها بإيه، كانت مضبوطة جدًا ومبهجة، أما بالنسبة للأرز باللبن قوس القزح، فلازم نعترف أنه اختراع كل طبقة منه بلون مختلف أصفر وأخضر وأزرق وأحمر وفي الآخر طبقة كريمة لونها بينك، طعمه كان عادي بس بهجته في الألوان، المهلبية بالقرفة والتفاح كانت كويسة قوي برضه برغم أننا مش من عشاق المهلبية إلا أنه كانت حلوة، آخر حاجة الشوكولاتة بالنعناع للأسف يا جماعة ما عجبتناش خالص، التوازن فيها كان مفقود ما بين الشوكولاتة المُرة وكريمة النعناع اللي مفتقدة لطعم النعناع، نتمنى أنهم يوصلوا للتركيبة الصح بتاعتها.

أكيد دي مش هـ تكون الزيارة الأخيرة لهم، نتمنى أنهم يفضلوا يقدموا لنا كل جديد مبهج ومبتكر وطعمه حلو، ودي الخلطة السرية لنجاح أي مكان.