-
ذا كيرف مول - الشيخ زايد
-
مخبوزات وحلويات
-
-
10 صباحًا - 10 مساءً -
Angie El Batrawy
أكثر حاجة بـ تسبب بقلظة في رمضان، الأكل الكثير.. والحلويات الأكثر.. خاصة جزء الحلويات، وخاصة كمان أن كل أماكن الحلويات بـ تتفنن كل سنة أنها تبهرنا بمكونات جديدة ومبتكرة علشان تحتفل مع عيلتك وأصدقائك بشكل مختلف.
من لحظة ما شفنا صوره على صفحة الفيسبوك و"رافلز هاوس – Ruffles House" كان على رأس قائمة زياراتنا ومقالاتنا النقدية في رمضان، شدونا بجمال حلوياتهم، وشكلها اللى محطوطة كمان في تغليف مختلف، في برطمانات، وبثلاثة أحجام مختلفة، ده غير أن عندهم حلويات تانية زي الكب كيك، وفوق كل ده بـ ينظموا كورسات تعليم كل فترة.
رافلز لهم فرعين في الشيخ زايد، واحد عند بيفرلى هيلز، والتاني في "ذا كيرف مول – The Curve Mall" وراء تيفولي الشيخ زايد، المول لسه بـ يتبني وهو المحل الوحيد اللى فاتح فيه وشغال، وقت ما رحنا ما كانش فيه زحمة، أول ما دخلنا سألنا على حلويات رمضان اللى عاملينها، اختارنا منها برطمانات كنافة بالمانجو (21 جنيه)، وبسبوسة بالريد فيلفيت (25 جنيه)، وجلاش كب كيك بالبلح (21 جنيه) "ده ما كانش في برطمان"، ومن الأصناف العادية اللى بـ يعملوها دايمًا اختارنا برطمان شيري تشيز كيك (25 جنيه)… وكان فيه تشكيلة من الكب كيك.
عامة الجميل في موضوع البرطمانات أنك بـ تشوف طبقات وألوان المكونات فوق بعضها وبالتالى دي حاجة بـ تفتح النفس وشكلها حلو، نبدأ بالكنافة بالمانجو اللى كانت خفيفة جدًا وطعمها جامد بس عيبها الوحيد في رأينا أن الكريمة كانت عاوزة تزيد شوية، البرطمان كان أغلبيته كنافة وبالتالي كان نفسنا نحس بطعم الكريمة أكثر من كده، البسبوسة بالريد فيلفت كانت قوية برضه، أغلب المحلات بـ تمزج البسبوسة مع الريد فيلفيت فبـ تخلي لونها أحمر، لكن هنا الموضوع طبقات زي ما قلنا لكم، البسبوسة هنا كانت غريبة شوية لأن لونها كان فاتح مش محمرة، لكن كان طعمها حلو، طبقة بسبوسة يليها كريمة وبعدين الريد فيلفيت في الآخر، وسكرها زيادة شوية.
برطمان الشيري تشيز كيك كان أحلى واحد فيهم كلهم، طبقات من البسكويت مع الجبنة الكريمي وصوص مع قطع الشيري، كانت تحفة وسكرها مضبوط، والمكونات متساوية في الكمية، على عكس جلاش كب كيك البلح اللى كان شكله حلو لكن الجلاش كان جزء منه مقرمش ولذيذ وجزء طري ومش متجانس مع كمية الكريمة القليلة اللى فيه، لكن طعم البلح نفسه كان حلو أوي.
"رافلز هاوس" شاطرين وبـ يعملوا حلويات مختلفة وطعمها حلو، البرطمانات فيه منها كمان حجمين متوسط وكبير (بس دي بالطلب)، أكيد لازم هـ نروح لهم تاني علشان نذوق الكب كيك اللى كان شكلها مغرى ووهمي.