The Definitive Guide to Living in the Capital , Cairo , Egypt

قريب من 7 Stars مول ومارينا مول لكن مش في واحد منهم، لكن هو في شارع رئيسي متفرع من التسعين وله يافطة واضحة خارج المحل مكتوب عليها Rozzana بالإنجليزي فقط، والمدخل نفسه صغير لكن المحل مساحته كبيرة من الداخل لكنها طولية كأنها طرقة أو ممر وفي نهايته مربع واسع مليان ترابيزات وفيه منطقة للعب الأطفال بباب مستقل، ومن نفس الباب ممكن تروح على الحمامات وبعض القعدات المتدارية في نهاية المحل. شكل المكان لطيف ومعتنى به جدًا، هو جديد فتح من شهور قليلة، ولاحظنا أن مدير المكان “وغالبًا المالك” وهو سوري الجنسية نشيط جدًا وبـ يتحرك في كل حتة وبـ يتكلم مع ضيوف المكان على كل الترابيزات اللي واضح أنهم اعتادوا «روزانا – Rozzana» وحبوه بسبب كرم الضيافة ومستوى الخدمة الراقي، وما فاتش دقائق قليلة قبل ما ينولنا من الحب جانب ونلاقي المدير النشيط بـ يرحب بنا وبـ يكلمنا بمنتهى الود عن المكان وعن المنيو وأنه إزاي مستعد يوفر لنا أي حاجة لراحتنا، مافيش كلام الشطارة وحسن معاملة الزبون دي مهارة ومش أي حد بـ يعرف يعملها بالطريقة دي اللي بـ تتفادى اللزوجة والتطفل وفي نفس الوقت بـ تخليك تحس أنك في بيتك وطلباتك كلها مجابة، الاحترافية مهمة فعلًا.

روزانا أقرب لكافيه منه لمطعم، والإقبال على الشيشة وعدم وجود مكان لغير المدخنين أكد لنا الملحوظة دي، ومع ذلك المنيو بتاعه كان متنوع وفيه أطباق عالمية ومعجنات وساندويتشات ومقبلات وسلاطات، بجانب المشروبات والحلويات والشيشة اللي هي أصل الموضوع. طلبنا كومبو روزانا للمقرمشات والمقليات لشخصين (40 جنيه) وكان فيه أصابع موتزاريلا عادية وسمبوسك تقليدية وبافلو وينجز أقل من العادية وصوص مايونيز ولأول مرة نشوف في طبق مقبلات بطاطس محمرة! الطبق بشكل عام كان ضعيف ومافيش فيه أي حاجة مميزة، لكن البيتزا السوبريم أو بيتزا روزانا اللي طلبناها (35 جنيه) خليتنا عاجزين عن الكلام! خبيز ومذاق وجبنة فريش ما حصلتش، وإضافات ببيروني ودجاج روعة، البيتزا هنا فخر المطعم، والمدير الودود برضه هو اللي رشحها لنا وأكيد كان عنده حق.

سألناه إيه ثاني الشيف بـ يعمله بحرفنة من منيو الأطباق الرئيسية قال لنا أن فيه رول دجاج فرنسي مش موجود في المنيو لسه لكن ممكن يجهزه لنا وعلى ضمانته. طلبنا الفرينش تشيكن رول (59 جنيه) المحشوة بالأرز وجبن البارميزان الغرقانة في كريمة دسمة من الجبن والأعشاب وبـ يتقدم معاها أرز برضه بالخضروات والذرة الحلوة، طبق رائع والكمية فيه كبيرة وما تخيلناش أنه يطلع بالحلاوة دي. بجانب المذاق الجيد للمأكولات الشكل وطريقة التقديم كانت مبهرة، بالذات في طبق الفروت سلاد بالكيت كات (20 جنيه) اللي بـ يتقدم في طبق من نصف ثمرة أناناس حقيقية وغني بالآيس كريم والشوكولاتة، والفرابيه بالكراميل (16 جنيه) كان قوامه ممتاز وسكره معقول، وبعد ما شبعنا تمامًا وأخذنا وقتنا من القعدة وبدأنا نستعد للرحيل، تفاجأنا بطبق كريب بالنوتيلا بـ ينزل أمامنا كمجاملة من إدارة المطعم! مش بـ نقول لكم أن الضيافة دي مهارة! والجميل أنه فعلًا كان أحلى من كل الحاجات اللي طلبناها قبل كده، ولقينا نفسنا بـ نقعد ثاني وبـ نلتهم الكريب وبـ نغوص في الشوكولاتة ومش لاقيين كلام نعبر به عن امتناننا لإدارة «روزانا» الكريمة اللي بـ تعرف إزاي ترشح أشهى الأطباق للزبون وإمتى تنزل الكريب كهدية رقيقة من المحل.

حبينا «روزانا» وقررنا نكرر الزيارات ونجرب أطباق أكثر ونقضي وقت أطول، ولسكان التجمع الخامس بـ نرشح لكم المكان كنقطة تجمع جديدة وأنيقة غير الداون تاون والميتنج بوينت.