The Definitive Guide to Living in the Capital , Cairo , Egypt

كافيه دو جاردان – Cafe Du Jardin

كافيه دو جاردان: مطعم وكافيه عادي، وبسيط وغير متخصص فى داندي مول

  • داخل داندي مول
  • مخبوزات وحلويات
  • 01111250509
تم التقييم بواسطة
Angie El Batrawy
قيم
قيم الآن
كافيه دو جاردان: مطعم وكافيه عادي، وبسيط وغير متخصص فى داندي مول

فى داندى مول وأنت بـ تتمشى وبـ تدور على لبس أو إكسسوارات تشتريها، أول ما بطنك تزقزق مافيش أمامك غير منطقة المطاعم اللى بره اللى بـ تطل على الجراج الخارجي أو الفوود كورت اللى فى الدور الثاني فى آخر المول، يا إما فيه كام مطعم فى نفس الدور منفصلين ومنهم اللى فتح جديد زي "كافيه دو جاردان – Café Du Jardin".

المكان بديكوراته هادئة وتشدك أنك تروح تكتشف إيه المكان ده، الديكور عاكل كأنك قاعد فى جنينة بالفعل بزرع صناعى فى الأرضية وكراسي وترابيزات بيضاء كأنك قاعد فى حتة Outdoor، المكان اسمه "كافيه" لكنه بـ يقدم أطباق رئيسية وبالتالى هو مش كافيه بس، ممكن تعرف أصناف المنيو من صفحتهم على الفيسبوك، من الأصناف –القليلة- اللى شوفناها نقدر نقول أن المكان مالوش تخصص معين، أنواع الأطباق مختلفة ومش تبع مطبخ محدد.

كانت نفسنا هفانا على شوربة وأحبطنا لما ما لقيناهاش فى المنيو، لكن لما سألنا الجرسون قال لنا فيه نوعين موجودين، هما شوربة كريمة بالمشروم (22 جنيه) وكريمة بالسي فوود، اختارنا أول واحدة، ومن الأطباق الرئيسية أخذنا دجاج صيني (60 جنيه) وده قطع دجاج مقطعة صغير مع الفلفل الألوان ومكرونة أنجيل هير والجنزبيل والصويا صوص، مع تشيكن سيزر سلاد (40 جنيه).

تحضير الأكل ما أخذش وقت طويل، جاءت لنا أول حاجة الشوربة والسلاطة، قوام الشوربة كان كويس وسخونتها معقولة، تعليقنا الوحيد بس أن قطع المشروم كميته كبيرة عن الكريمة، السلاطة كانت كميتها معقولة والخس كويس والفراخ مستوية مع قطع العيش المقرمش وشريحتين طماطم، لكن الـ Dressing بتاع السلاطة كان مملح أوى وكمان باين فيه طعم فلفل، فى رأينا سلاطة السيزر لو الصوص بتاعها مش مضبوط كلها بـ تفشل، وده اللى حصل بالفعل.

بعد كده جاء لنا الفراخ الصينية، طعمها وتتبيلتها وكمية الصوص مضبوطين، كان حاجة غريبة بس أن الطبق مالوش طلب جانبي حتى واحد، وبالتالى كميته ما تشبعش واحد أكيل، بس طعمه كان حلو، عامة تعليقنا على الأكل ببساطة أننا ممكن نعمل زيه فى البيت، وأفضل كمان.

طلبنا بعد الأكل من المشروبات عصير برتقال فريش (16 جنيه) وعصير ليمون بالنعناع (16 جنيه) ومن الحلويات كريب بالموز (32 جنيه)، العصاير كانت رائعة جدًا، السكر مضبوط، فريش، مافيهاش أى تعليق وحش، وكريب الموز كان عليه صوص كراميل مع شريحتين تفاح للتزيين، طعمه كان كويس بس عادي برضه مافيش فيه حاجة مميزة.

"كافيه دو جاردان" مكان لطيف ممكن تاكل فيه أكلة سريعة وأنت فى داندى مول، لكن المكان لازم يحط فى الاعتبار التنافس بين الأماكن اللى فى المول، علشان غير كده هـ يضيع وسطهم!

نصيحة 360

"كافيه دو جاردان" عندهم منيو للإفطار، جربوها.

أحسن حاجة

الدجاج على الطريقة الصينية.

أسوأ حاجة

الملح الكثير فى صوص السيزر سلاد.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح