The Definitive Guide to Living in the Capital , Cairo , Egypt

كيان بيكري – Kayan Bakery

كيان: كافيه ومحل مخبوزات مريح للأعصاب فى الزمالك

  • 8 شارع العادل أبو بكر - الزمالك
  • مخبوزات وحلويات
  • 0227375775
تم التقييم بواسطة
Angie El Batrawy
قيم
قيم الآن
كيان: كافيه ومحل مخبوزات مريح للأعصاب فى الزمالك

الزمالك كانت ومازالت محل دهشة وإعجاب بالنسبة لنا، بالمطاعم والكافيهات اللى كل شوية وفى لمح البصر بـ تفتح، المكان اللى رحناه المرة دي لسه افتتاحه كان من 5 أيام، فى شارع العادل أبو بكر فى الزمالك، “كيان بيكري – Kayan Bakery” هـ يشدك بلونه الأخضر الفاتح المريح للأعصاب واللون الأبيض اللى هـ يعمل لك تنويم مغناطيسي ويشدك له علشان تقعد وتجربه خاصة لو أنت بـ تمر فى وقت الإفطار.

المكان صغير نوعًا ما، فيه 3 ترابيزات تقريبًا فى المنطقة اللى على الرصيف، وترابيزتين أو ثلاثة برضه فى الداخل، كاونتر زجاجى فى المدخل فيه أنواع كب كيك ومافن وبريوش ومخبوزات بالجبنة وأنواع ثانية، وجنبها ماكينات أسبريسو وكابتشينو وعلى الحائط أرفف فيها أنواع مختلفة من العيش مغطاة بقماش لطيف: باجيت وفوكاتشيا وشيباتا وتوست وبانيني وباتون ساليه، وعلى الشمال الكاشير وجنبه فتحة بسلالم لتحت بـ تودي على المطبخ، فيه منيو صغيرة فيها جميع أنواع العيش والمخبوزات، ماعدا المشروبات والعصائر اللى لازم تسأل عليها بنفسك لأنها مش مكتوب تفاصيلها، ومن كلامنا معاهم عرفنا كمان أنهم بـ يعملوا ساندويتشات وسلاطات بس لسه المنية بتاعتها بـ تتطبع.

طريقة العرض تفتح النفس، واهتمامهم بتفاصيل الترابيزة من جراب عليه لوجو المكان فيه شوكة وسكينة ومنديل بشكل لطيف، والمناديل الخضراء اللى على الترابيزة اللى بـ ترد على لون الديكور عرفتنا أننا فى مكان بـ يهتم بالتفاصيل، وده حقيقى، صاحب المكان كمان لطيف جدًا ورحب بنا، وما بخلش علينا بالاقتراحات واهتم بطلباتنا وعرفنا أكثر بالاختيارات اللى متاحة أمامنا.

طلبنا شاي باللبن، الشاي (8.50 جنيه)، واللبن (5.95 جنيه)، أول حاجة أن ده كثير أوى أننا نشرب شاي باللبن بـ 14.45 جنيه!!، وأخذنا كمان عصير يوسفى (15 جنيه)، ومن المخبوزات اختارنا باتيه بجبن الفيلادلفيا (9 جنيه)، ومن أرفف العيش اختارنا عيش فوكاتشيا وطلبنا أننا نضيف إليه مكونات أو حشو، واقترح علينا صاحب المكان فوكاتشيا كابريس (26 جنيه) ودي فيها جبن موتزاريلا وشرائح طماطم وبصل وفلفل ألوان مع صوص لطيف ومعاها سلاطة كول سلو عليها زبيب من فوق.

الشاي باللبن كان لطيف وكميته كمان، عصير اليوسفى كان رائع بلونه وطعمه الغني، فريش على الآخر، فى حين أن باتيه الفيلادلفيا كان طعمه حلو أوى ومش مزيت ويذوب فى فمك لكن حجمه صغير جدًا، لسه بـ نبدأ نأكله ونستمتع لقيناه خلص! الفوكاتشيا كابريس بقى اللى كانت حكاية، طعم العيش الفريش مع المكونات والجبن الموتزاريلا السايحة كان وهمي لدرجة أن صديقنا اللى طلبه ما لحقش يتهنى به لأننا شاركناه وخلصنا الطبق كله.

من الحلويات جربنا كمان بريوش بالكريمة والسكر Cream & Sugar سعره 8 جنيه، ومافين بالشوكولاتة Choco Muffin بـ 7 جنيه، البريوش كان حلو قوى بس كان نفسنا السكر المرشوش على الوش يقل شوية علشان نستمتع بالكريمة اللى فى الحشو، بس كان طعمها حلو قوى، والمافين كانت رائعة لأن مش بس طعم الكيك بالشوكولاتة لأ كمان كانوا حاطين عليها من فوق قطع كبيرة شوكولاتة بـ تسيح فى فمك لما تأكلها وأضافت لطعمها الإجمالى كثير.

“كيان” بـ يضيفوا على حسابك خدمة وضريبة، الأسعار هنا عامة عالية شوية، لأن فى الآخر دفعنا فى وجبة إفطار لشخصين أكتر من 100 جنيه، وده كثير شوية، صاحب المكان اهتم برأينا بعد ما خلصنا ولما عرف أننا متضايقين من حجم الباتيه الفيلادلفيا أهدانا حاجة زي الكرواسون صغيرة خالص محشية عجينة الفستق كانت وهمية جدًا وفرحنا جدًا من تعامله الرائع معانا وكمان وعدنا أنه هـ يوصي الشيف يكبر حجمها شوية.. وأكيد دى من الحاجات اللى تخلى أى حد ييجي ثانى المكان.

نصيحة 360

اسأل على أنواع الساندويتشات والسلاطات المتاحة لحد ما يطبعوا المنيو الجديدة.

أحسن حاجة

الفوكاتشيا كابريس.. تجنن.

أسوأ حاجة

ليه شاي باللبن غالى كده؟

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح