The Definitive Guide to Living in the Capital , Cairo , Egypt

مستر مانجو – Mister Mango

مستر مانجو: عصير ممتاز وآيس كريم بالفواكة وخدمة أقل من المستوى في المقطم

  • فيلا 6 التجاريين - شارع 9
  • عصائر
  • 01158333651,01146696010
تم التقييم بواسطة
Nagla Ashraf
قيم
قيم الآن
مستر مانجو: عصير ممتاز وآيس كريم بالفواكة وخدمة أقل من المستوى في المقطم

كثير بـ نحب نعدي نشرب عصير سريع وإحنا في الطريق، وبرغم جو الأعاصير بتاع إمبارح إلا أن مافيش أجمل من عصير ينعشك وسط الجو ده.

"ماستر مانجو – Mister Mango" محل عصير في شارع 9 في المقطم، لو معاك عربية وجاء لك الشخص اللي يأخد الطلب ننصحك أنك تطلب الحاجات العادية أو تركن وتنزل لأنه مش هـ يبقى عنده أي فكرة عن كوكتيلات المحل أو تفاصيلها.

لما شفنا المنيو عجبنا لتنوعه جدًا، خاصة أنه فيه جميع أنواع وأحجام أطباق الآيس الكريم اللي ممكن تتخيلها وده غير أنواع الكوكتيل.

أصابنا حيرة كبيرة ما بين الأصناف كلها والحقيقة أن الشخص اللي بـ يعمل العصير كان صبور علينا وبـ يشرح لنا كل نوع بالتفصيل، أكثر حاجة لفتت نظرنا وكنا طلبناها هناك قبل كده الآيس كريم بالفواكة واللي هم مقسمينه في المنيو بأكثر من اسم على حسب الحجم والإضافات، يعنى مثلاًA One  بـ 15 جنيه ومكون من 3 بولات آيس كريم وفواكة ومكسرات وبلح وعصير كوكتيل وفاكهة على حسب الموسم، وحرفيًا حجمه بـ يبقى قد كرة القدم تقريبًا، العلبة قد علبة الكشري الكبيرة البلاستيك وفوقها بمتر كده الإضافات، وكل واحد ومعدته وذوقه.

كان فيه أنواع ثانية عادية زي فخفخينا وقنبلة برضه بالآيس كريم، كمان ممكن تطلب إضافة أي نوع فاكهة على الآيس كريم، أو نوع شوكولاتة زي أوريو أو تودو. وكان عنده عصائر بكل نكهات الشوكولاتة اللي تتخيلوها، زي تويكس ومارس وجلاكسي وسنيكرز وكيت كات وموكا، وبـ تترواح أسعارها بداية من 8 لـ 13 جنيه.

طبعًا لأننا بـ نحب نجرب الجديد فجربنا أكثر من كوكتيل، طلبنا كثافة بـ 7 جنيه، وللعلم هناك نوعين منه على حسب كلام معد العصير "كثافة صفراء وكثافة حمراء"، الكثافة الصفراء دي عبارة عن مانجو بالأناناس وآيس كريم فانيليا، والحمراء زيها بس بالفراولة بدل المانجو، طلبنا كثافة صفراء، بس ما استمتعناش قوي بطعم الأناناس مع المانجو، لكن اللي عجبنا جدًا عصير الفيتامين سي بـ 7 جنيه. وهو عبارة عن ليمون وبرتقال وموز وجوافة، وكان طعمه فوق الرائع ومنعش جدًا، طلبنا كمان عصير مانجو عادي جدًا، وكان طعمه حلو قوى، نظرًا أننا في الشتاء.

بصفة عامة هو بـ يعمل كل حاجة حلوة بس ابقوا اسألوا حد بـ يفهم هناك بس وهو في الأغلب الشخص اللي بـ يعمل العصير، ولا تثقوا في أي شخص ثاني، كمان هو بـ يقدم عبوات عائلية من العصير بـ 3 أحجام صغير ووسط وكبير وسعرها بـ يختلف على حسب نوع العصير اللي طلبته.

ولو عاوز تجرب تورتة الآيس كريم اللي بـ يعملها ممكن، ولو أننا نفضل أنك تشتريها من مكان متخصص آيس كريم أو حلويات، لأن ده محل عصير في المقام الأول.

مستر مانجو تجربة لطيفة في آخر اليوم، تخليك تشرب عصير ينعشك ويجدد روحك.

نصيحة 360

جربوا القنبلة بالآيس كريم حكاية، بس تكونوا جعانين علشان تقدروا تخلصوها.

أحسن حاجة

تنوع العصائر الموجودة.

أسوأ حاجة

عدم وجود شخص مدرك لمكونات الكوكتيل في المنيو في الأول.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح