The Definitive Guide to Living in the Capital , Cairo , Egypt

كتب
أداجيو

أداجيو: لحن إبراهيم عبد المجيد الحزين

  • روايات
  • من الآن
  • عربي عربي
  • 40 EGP
  • مكتبات وسط البلد
تم التقييم بواسطة
Rasha Zeidan
قيم
قيم الآن
أداجيو: لحن إبراهيم عبد المجيد الحزين

يعني إيه "أداجيو"؟ قولنا الأول ندور على المعنى علشان نعرف إيه الحكاية، الأداجيو هي مقطوعة موسيقية ألفها الموسيقي الكبير تومازو ألبينوني اللى عاش في فينسيا في القرن الـ 18، وهي مقطوعة اشتهرت بعد كده واتعمل عليها شغل كثير، وهي في الغالب مقطوعة تفرع منها مقطوعات موسيقية لحد ما بقى فيه تعريف اسمه "الأداجيو" في المزيكا ومرتبط بالموسيقى الحزينة.

من الأول بـ يرميك الكاتب إبراهيم عبد المجيد في حالة من الحيرة، اثنين مسعفين بـ ينقلوا مريضة "ما" لمكان غريب في آخر إسكندرية في منطقة الفيلات في العجمي، وتحس أن البداية لرواية بوليسية أو رعب، لكن سريعًا كل ده بـ يروح من دماغك علشان تكتشف أنك أمام موضوع ثاني خالص موضوع عن الحب، لا مش الحب عن العشق، أو تقدر تقول عن واحد متيم بزوجته، عن سامر اللى أحبها وعاشوا مع بعض أجمل اللحظات واللى بـ يجيد عبد المجيد وصفها وكأنه بـ يوصف لحظات عاشها هو بالفعل في حياتها، ويمكن ده اللى بـ يميزه في كتابته، عن لعبها للبيانو، عن حالتها اللى اختلفت بعد مرضها، عن جنونها وهدوئها عن اسمها اللى بـ تعرفه في الصفحة (15) من الرواية علشان تعرف أن سامر بـ يتكلم عن ريم، وأن ريم جميلة، ولا نقول لكم تعالوا نتكلم عن الشخصيات اللى في الرواية علشان نحبها أكثر ريم شخصية غامضة تعبانة محبة أنيقة جميلة بـ تحب الحياة لكنها عارفة أنها هـ تموت قريب، ذوقها عالي وبـ تختار كل حاجة بنفسها.

سامر.. رجل أعمال غير بقى كل الروايات المعروفة وبـ يخون مراته وكده، لا ده موضوع ثاني محترم وأنيق وبـ يحب مراته جدًا وبـ يلف بها العالم وبـ يعمل كل اللى هي عاوزاها صراحة إبراهيم عبد المجيد هـ يزعل الرجالة من الشخصية دي، سامر كل هدفه في الحياة يشتغل ويسعد ريم.

غادة صديقة نور وعازفة البيانو.. نور ابنتها الصغيرة الجميلة واللى بـ تعزف بيانو برضه، وبـ تعشقها ريم، هـ تلاقوا شخصيات ثانية ثانوية زي صاحب مطعم السمك اللى بـ يحبوا يأكلوا من عنده، واللى كان حرامي وتوقف عن السرقة وعمل مطعم سمك كله حاجات طبيعية والنساء بـ يتباركوا به وبـ يتعشموا بالخصوبة فيه.

نجح الكاتب إبراهيم عبد المجيد في عمل حالة من الحزن أو الأداجيو الحزين في روايته، بأسلوب هادئ ومقنع أحيانًا ولغة رقيقة مناسبة للموضوع وكمان شغل كبير على المعرفة وعلى كثير من الموسيقيين والكتاب والأدباء يخليك عاوز تدور عليهم وتفهم هما مين وبـ يعملوا إيه وتتعرف عليهم.

عن الوفاء والحب والمرض والهموم والعشق لحد آخر الحياة هـ تلاقوا أداجيو.

عجبك ؟ جرب

رواية "عتبات البهجة" لنفس الكاتب.

عن الكاتب

الكاتب الكبير إبراهيم عبد المجيد صاحب ثلاثية "الإسكندرية"، و"هنا القاهرة"، و"عتبات البهجة"، وغيرها من الروايات، ترجمت كثير من أعماله وحصل على جوائز عديدة.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح