The Definitive Guide to Living in the Capital , Cairo , Egypt

كتب
اعرفي راجلك وعلمي عليه

اعرفي راجلك وعلمي عليه.. كتاب لفهم الراجل المصري

إسماعيل فؤاد قاسم اعرفي راجلك وعلمي عليه علاقات عاطفية كتب مكتبات القاهرة
  • إسماعيل فؤاد قاسم
  • مساعدات ذاتية
  • من الآن
  • عربي عربي
  • 70 EGP
تم التقييم بواسطة
Shaimaa El Gammal
قيم
قيم الآن
اعرفي راجلك وعلمي عليه.. كتاب لفهم الراجل المصري

كتير من القراء ممكن يكونوا اتعرفوا على اللايف كوتش إسماعيل فؤاد قاسم من الفيديوهات المنتشرة ليه على السوشيال ميديا إللي بتتكلم بشكل منظم وسلس في نفس الوقت عن العلاقات العاطفية وهو ده إللي بيميز كمان كتاب إسماعيل الأول “اعرفي راجلك وعلمي عليه” وإللي صدر مؤخرًا عن دار نشر روزنامة.

الكتاب عبارة عن 130 صفحة من القطع المتوسط وفكرته الأساسية إن هيساعد الست تفهم الراجل بشكل أفضل.

إسماعيل بيقول في مقدمة الكتاب: “أول ما تبطلي تفكير في تعقيد شخصية الراجل هتكتشفي إنه كائن أقل تعقيدًا بكتير عن الست، وأول ما تستوعبي الفكرة دي هتكوني اتحطيتي على اول الطريق في رحلتك إنك تسيطري عليه وترضيه، وتاخدي كل إللي إنتي عايزاه في نفس الوقت”.

الكتاب متقسم لتلات أجزاء هنستعرضهم على السريع في الفقرات إللي جاية:

الجزء الأول عبارة عن مجموعة من القوانين أو النصائح إللي بتلخص عالم الرجالة وإللي ستات كتير لو فهموهم، العلاقات هتكون أسهل، ومنهم إنه الست مش هتعرف تغير الراجل، وإنه قعدة الصحاب مهمة قوي عند الراجل زي أهمية قعادة مع شريكته، وإنه الراجل بيحب يتدلع ويسمع كلام حلو زيه زي الست تمام وغيرها من الأفكار إللي إحنا شايفينها فعلا منطقية.

والكاتب بيوضح إنه الأفكار المعروضة في الجزء ده هتساعد الست إنها تبني علاقة تحمسها وتبسطها وترضيها مع أي راجل بشرط يكون راجل سوي.. وبيأكد “وحطي تحت سوي دي مليون خط”..

أما الجزء التاني فهو عن أنواع الرجالة، وده الجزء الأكبر والأكثر دسامة في الكتاب.. إسماعيل بيحلل لك 24 نوع من أنواع الرجالة، في البداية بيشرح لك مجموعة من سمات الشخصية إللي هتساعدك تعرفي أكتر عن الشخصية دي ويعدين بيديكي مفتاح التعامل مع الشخصية.. ودي حاجة مهمة لإنها هتساعد كل ست تقدر تفهم شريكها إيه السمات إللي فيه وليه بيبقى متوقع طريقة تعامل معينة وبيحبط لما مش بيلاقيها. ومن أنواع الرجالة إللي بيستعرضهم الكاتب في الكتاب الأناني، القلوق، المؤدب، الممل، الكداب، الطموح، البخيل، الشكاك، الورمانسي، الفرفور وغيرها.

الجزء التالت والأخير في رأينا هو من أهم أجزاء الكتاب وهو بعنوان “آخر كلام” والجزء ده بيستعرض أهم الاسئلة إللي لازم الست تسألهم للراجل او تعرف إجابتهم قبل ما ترتبط في علاقة طويلة الأمد لإنه كل سؤال منهم كفيل إنه يقيم العلاقة كلها ممكن تمشي إزاي ومن الأسئلة دي: إيه موقف كل واحد فيكم من الخلفة، هل فيه خصلة مضايقاكي ومتخيلة إنها هتتغير بعدين؟ إيه موقفكم من الدين والتدين؟

وفي نهاية الكتاب إسماعيل بيقول كلمتين المفروض كل ست تحطهم حلقة في ودانها: ” أهم سلاح في كل الاسلحة إللي ممكن تخطر على بالك هي العقل. معلوماتك، قدراتك، شخصيتك، أفكارك، علمك ، دينك، أحلامك، ضعفك، مخاوفك، كرهك، حقدك، شرك، وخيرك، وحبك.عقلك هو مصدر كل حاجة في دنيتك. نميه وحافظ عليه وريحيه وارحميه ومرنيه وأهممن كل ده استعمليه”.

الكتاب ده من الكتب المفيدة للستات وإللي بتقدم المحتوى بلغة عامية سهلة مريحة، وبننصح بقراءته وبنتمنى في الطعبات القادمة من الكتاب يكون فيه سيرة ذاتية للمؤلف علشات القارئ يتعرف عليه أكتر وكمان قائمة بالمراجع والمصادر إللي استعان بيها الكاتب لإنها ممكن تفيد القارئ المتخصص.

عجبك ؟ جرب

كتالوج سي السيد، إيهاب معوض

عن الكاتب

إسماعيل فؤاد القاسم، رائد أعمال ومدرب حياة في مجال العلاقات العاطفية، حاصل على ماجستير إدارة الأعمال وصاحب نجاح كبير على السوشيال ميديا بالمحتوى إللي بيقدمه عن العلاقات.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح