The Definitive Guide to Living in the Capital , Cairo , Egypt

كتب
البعيد عن العين

البعيد عن العين: قد أفلح من غنى

  • ديوان شعر
  • من الآن
  • عربي عربي
  • 10 EGP
  • مكتبات الهيئة العامة للكتاب ومكتبات وسط البلد
تم التقييم بواسطة
Ahmed Abd El Gawad
قيم
قيم الآن
البعيد عن العين: قد أفلح من غنى

بيقول الشهبانى:

لو حزنك فى القلب مجنزر

اترك ما فاتا ولا تنظر

اثبت ماتبصش ع الماضى

خليه الضل اللى تركته

أو هامش فى هذا المنظر

غنى لفراشة فى بروازك

أو فازة تحمل أزهارًا

افتح شباكك لنهارًا

بين العامية والفصحى بـ يتردد الشهبانى فى ديوان جديد.. حامل لفصيلة دمه الشعرية وبصمته فى الكتابة..واللى بـ يطلع فيه بالجديد فى تقنياته فى الكتابة علشان يقول أن الشاعر قادر على التجديد وعلى تغيير لغته وأساليبه من وقت للثانى.. علشان كده بـ يحارب شهبانى النص وبـ يحرت فيه لحد ما بـ يطلع فى توبه الجديد والأنيق.. فكان ديوانه الحامل للهم والحزن والفرح والأمل والغياب.. “البعيد عن العين”.

العنوان مفارق وبـ يحمل داخله تراث شعبى بـ يخايله وبـ يقول لكل الناس “البعيد عن العين بعيد عن القلب”.. فبـ يخليك تحاور تراثك من أول العنوان علشان تستعيد بذاكرتك بعيد عن القلب.. لكن يا ترى إيه هو البعيد عن القلب فى ديوان سالم الشهبانى ده اللى لازم تكتشفه وأنت بـ تقرأ الديوان؟.. ده المخفى بين سطور البدوى سالم علشان يقول لك:

إزاى تهزى الجزع يا مريم

لا ضل باقى فى الشجر

ولا نخل طارح

الغنوة تهمة

والغنا أصبح مساومة

إنى نذرت

الصمت جهرًا

ما بقتش قادر على المقاومة

هنا لازم تعرف أن الثورة على الحياة وعلى الأوضاع بل وعلى التراث كمان ومحاكاة فعل مريم بفعل الأم المصرية والبنت المصرية واللى بـ يطالبها بفعل ضد فعل مريم لأن النخل انعدم طرحه.. فى ظل الفقر وعدم وجود المدد الربانى –لازم ننذر اليوم صومًا- لأن الفقر أصبح هو السائد.. والظلم لما ساد انتهى معاه طرح النخل وضل الشجر.. ده اللى أصبح بعيد عن القلب.

لغة شهبانى حاملة همها فى ديوانه ده.. لغة بـ تخاطب وجدانك قبل عقلك وبـ ترتكز على التراث بشكل كبير يمكن فى ده محاولة للخروج من سيطرة شهوة الكتابة على الشاعر.. والدخول من باب ثانى يملك سالم مفتاحه بشكل جيد وهو باب التراث الأعظم.

قلبى ندرته سبيل

عدوا بهدوء وسلام

وادخلوا آمنين

ماتسألوش.. عن مين لوث مياه النهر؟

وفيه حس صوفى مرتبط بالتراث أيضًا هـ نلاقى الغريب حاضر عند الشاعر.. وإن لم يكن حاضر فى تعبه ولفه البلاد فهو حاضر فى أثره.

الضوء…

ماهوش فاضح

أثر الغريب واضح

بلا تدليل

فى بلاد الشاعر اللى شايلة الظلم والفقر والاحتياج للمعرفة لازم يبقى الغريب مش محتاج لدليل لازم يبقى الحل فى العشق الأكبر.. “عدوا بهدوء وسلام.. وادخلوا عاشقين” ولازم يعرف أن الحكاية بقيت فى الطريق وفى الغربة اللى صبحت قصد.. فى الصاحب اللى صدق فى الخيانة.. ورماه فى سوق النخاسة.. ولازم فى النهاية يتوجه للعالى إليها فى تجليها..

لمى اللى باقى فى الطرق لمى

أنا روحى زى

قزاز بيتكسر

مدى أيديكى

طبطبى وسمى

ليه تفطمينى يامه ع الصبار

ليه قلبى “يوسف”

فى الجراح

وعنيكى يمى

عجبك ؟ جرب

"كليم الشيخة أم الآه"لفؤاد حداد.

عن الكاتب

سالم فرج عودة الشهبانى، شاعر يكتب بالعامية المصرية، خريج كلية الحقوق جامعة القاهرة، حصل على العديد من الجوائز وشارك فى العديد من المؤتمرات المصرية والعربية، صدر له ثمانية دواوين ومجلد يضم أول خمسة أعمال وتحت الطبع: مقام للضحك.. فى خبر كان.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح