The Definitive Guide to Living in the Capital , Cairo , Egypt

الحفرة

الحفرة: جوه كل واحد فينا

  • روايات
  • من الآن
  • عربي عربي
  • 30 EGP
  • مكتبات وسط البلد ودار نشر المصرى
تم التقييم بواسطة
Ahmed Abd El Gawad
قيم
قيم الآن
الحفرة: جوه كل واحد فينا

"إهداء أول… إلى ابنى محمد.. فكل ما بحياتى ملك له".

أول تصدير فى الرواية للمفكر العالمى فريدريك نيتشه: "إن حدقت بالهاوية طويلًا، فإن الهاوية تحدق بك أيضًا".

يظهر أننا مع رواية مختلفة.. عمومًا هـ نكمل قراءة ونرجع نكتب ثانى.. استنوا خليكم معانا لما نشوف "عادل العجوانى" هـ يعمل إيه.. لكن قبل ما نكمل لازم نعترف بحاجتين: الأولى أن عادل طبيب نفسى أصلًا يعنى لو كتب فى المنطقة دى هـ يبقى فى ملعبه.. والثانية إحنا عاجبنا اسم الرواية.. له وقع غريب كده..

رجعنا بسرعة علشان نقول لكم حاجة مهمة جدًا، أولًا الرجل اللى كتب الرواية.. مجنون.. إحنا ما عندناش شك فى ده، والثانية هـ نقول لكم إيه سبب الجنون، عادل بـ يخليك تتخيل أن فيه شخصية جوه الرواية تشبهك تمام.. وأنها عملت زيك فى كل حاجة فى حياتك.. وأنه حذرها من قراءة كتاب معين لأن اللى بـ يقرأه بـ يتجنن.. لكن الشخصية دى تحدت الكاتب اللى هو ممكن يكون عادل أو الراوى أو حد ثانى خالص والشخصية دى اتجننت والكتاب ده هو الرواية والشخصية دى حضرتك.. وحضرتك مضطر بعد الكلام المجنون اللى فات أنك تكمل الرواية لأنه ببساطة قدر يلعب على نفسيتك ويدخلك فى تحدى مع نفسك والراوى والكاتب والشخصية واللى ممكن فى النهاية يطلعوا كلهم شخص واحد.

الفكرة دلوقت يا ترى حضرتك هـ تكمل الرواية وتتجنن ولا هـ تكملها عادى؟ ولا هـ تسيب تأثير قصير جواك؟ عمومًا هى طريقة فى الكتابة معتبرة، وهدفها دخول الكاتب جوه الرواية وتفاعله معاها وإحساسه أنه مشارك فيها… هـ نكمل ونرجع لكم ثانى.. تمام عدى علينا يومين وإحنا الحمد لله تمام.. إحنا خلصنا الرواية وهى بـ تحكى عن لأ مش هـ نقول لكم طبعًا خلونا نتفق على مجموعة مبادئ:

المبدأ 1: الرواية حلوة وتستاهل القراءة، المبدأ 2: الرواية بـ تحكى عن د. إبراهيم –اللى مش لازم يكون اسمه إبراهيم- واللى ممكن يكون أنت، المبدأ 3: د. إبراهيم مشهور وبـ يعمل كل حاجة حلوة ناجح فى كل حاجة فى محاضراته وفى حياته العملية والثقافية والإعلامية.. شخصية تحبها، المبدأ 4: إبراهيم قرأ الكتاب واختفى.. المبدأ 5: الكتاب اسمه الحفرة.

المبدأ 6: الرواية بـ تغير بالفعل حاجات جواك وبـ تخليك تعيد التفكير فى حياتك وفى نفسك بشكل أخص وفى التعامل معاها وإزاى تقدر تربى نفسك صح، وإزاى الحفرة ممكن تكون جواك وأنت مش شايفها، وعادل العجوانى قدر يلعب على فكرة الراوى بشكل مبهر واستخدامه للغة فى محله.. ومميز فى استخدامه للضمائر اللى طبعًا بـ تلعب دور نفسى ما بين أنا وهو وأنت وإحنا.. وتخلى دماغك تلف.

المبدأ 7: الرواية فيها رسومات وتحليلات وألعاب نفسية وإدراك للوعى ولعالم اللاوعى وشخصيات ثانية وعالم موازى ودنيا محتاجة منك تعمل كوباية شاى وتهدأ… وتبص على الحفرة بالراحة علشان الحفرة بـ تبص عليك.

عجبك ؟ جرب

رواية "الفيل الأزرق" لأحمد مراد.

عن الكاتب

عادل العجوانى طبيب نفسى شاب ولد بفرنسا وتخرج من كلية طب القصر العينى، حصل على ماجيستير الأمراض النفسية والعصبية ويعمل فى مستشفى العباسية.. ويشغل منصب مدير إدارة الإعلام والعلاقات العامة للصحة النفسية.. وهذه هى روايته الأولى.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح