The Definitive Guide to Living in the Capital , Cairo , Egypt

الرجال من بولاق والنساء من أول فيصل

الرجال من بولاق والنساء من أول فيصل: بولاق من المريخ فركة كعب

  • إيهاب معوض
  • أدب ساخر
  • من الآن
  • عربي عربي
  • 25 جم
  • مكتبات ألف- الشروق
تم التقييم بواسطة
Heba Hasab
قيم
قيم الآن
الرجال من بولاق والنساء من أول فيصل: بولاق من المريخ فركة كعب
على اعتبار أن كتاب “الرجال من المريخ والنساء من الزهرة” هو الكتالوج اللى بـ يوضح علاقة الرجل بالست وما يجب أن تكون عليه، قرر إيهاب معوض أنه يقدم لنا نصائحه المماثلة عن علاقة الرجل المصرى بالست المصرية طبعًا لأن حسب ملاحظته المهمة اللى في محلها أن ظروف المصريين المجتمعية مختلفة وخاصة جدًا وعلى هذا فمش أى كتالوج نصائحى هـ ينفع يأخذوه كده زى ما هو ويطبقوه على نفسهم، وده السبب اللى خلى إيهاب يألف الكتاب اللى هـ يسرد فيه رؤيته ووجهة نظره عن معظم المشكلات الزوجية بين الرجل والست واللى بـ تختلف فى جوهرها ومضمونها وبالتالى فى طرق حلولها عن “الرجال من المريخ والنساء من الزهرة”.

قبل ما تعترض على فكرة إيهاب وتقول فى نفسك الرجل رجل فى أى مكان واحتياجاته واحدة والست ست ومشاعرها متشابهة تلاقى رد إيهاب جاء لك فى مقدمة الكتاب فى البحث الميدانى اللى قرر يعمله فى العشوائيات علشان يعرف مدى تأثير الكتاب على الناس، ولك أن تتخيل ردود سكان عزبة الهجانة ولا عزبة أبو حشيش على أسئلة بحث إيهاب.
الكتاب بـ يتكون من 20 فصل كلها فصول صغيرة نسبيًا بـ تتكلم فى صميم المشكلة بين هند وزوجها هنداوى بشكل متسلسل من أول تعارفهم على بعض مرورًا بكل مراحل العلاقة فى شكل كوميدى ساخر مهذب، يعنى مثلاً بـ نلاقى فصول “جاءنا العريس التالى”، و”يا دبلة الخطوبة”، و”ليلة الدخلة”، و”المدام ما بـ تعرفش ترقص”، و”الرجال لا يحبون المفاجآت”، و”جوزى بـ يخوننى”، و”هنداوى عاوز يتجوز عليا”.
معظم البنات والستات هـ تشوف تصرفات كثير جدًا من تصرفات زوجها أو خطيبها بـ يعملها هنداوى وموقفها منها زى موقف هند، لكن إيهاب مش بـ يعرض الموضوع فى شكل تقريرى كأنه بـ يعرض لنا إحنا مخبيين فى بيوتنا وبـ يتمنظر علينا بتحليله للرجل والست، بالعكس تمامًا هو بـ يعرض بشكل كوميدى جدًا يضحكنا على خلافاتنا وكمان بـ يقول حلول بسيطة وسهلة للمشكلات دى وجزء كبير منها منطقى، وبـ نقول “جزء كبير” لأن مش كل الناس هـ تشوف الحلول منطقية أو يبقى عندهم إمكانية تحقيقها.
وفى النهاية نحب نقول لإيهاب أن الكتاب جيد وبـ يتكلم بخفة وبساطة عن مشاكل الرجل والست لكن برضه هـ تفضل مشكلة أن الطبقة اللى إيهاب اختارها عينة للبحث العشوائى بعيدة كل البعد عن الكلام اللى في الكتاب لأنها ببساطة طبقة ما بـ تقرأش ولو كانت وصلت حتى لمجرد السمع عن “الرجال من المريخ والنساء من الزهرة” كان زمانها قرأت “بولاق/ أول فيصل” لكن بالفعل لسه أغلبية الشعب المصرى صعب الوصول إليه من خلال الكتب.
كتاب جيد ننصح كل بنت تحطه في مكتبتها بس من بدرى يعنى مش تستنى لما تقع الفأس فى الرأس وتدور على حل للمشكلة.

عجبك ؟ جرب

"برضه هـ اتجوز ثانى" لنفس المؤلف.

عن الكاتب

مهندس ديكور وكاتب صحفى ومقدم برامج، حاصل على بكالوريوس فنون ودبلومة فى الإرشاد الروحى.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح