The Definitive Guide to Living in the Capital , Cairo , Egypt

كتب

بوكابيكيا: بدل كتبك القديمة بكتب جديدة

تبادل كتب، القاهرة
بوكابيكيا: بدل كتبك القديمة بكتب جديدة
بواسطة
Cairo 360

كتب: محمد طلعت

مافيش أجمل من إنك تقرأ كتاب جديد، وعلشان كده طول الوقت بننزل مكتبات القاهرة ندور على حاجة تستحق القراءة، لكن بعد ما بنقرأ الكتاب نركنه على رف من رفوف المكتبة وننزل نشتري كتاب جديد؟ طب إيه رأيك تبدل كتبك القديمة بكتب جديدة؟

ظهر مؤخرًا مشروع ثقافي اسمه “بوكابيكيا“، وده موقع متخصص في تبادل الكتب بين القراء في مصر والهدف منه نشر ثقافة القراءة بطريقة سهلة وبسيطة.

القائمين على موقع بوكابيكيا لتبديل الكتب عندهم هدف أساسي، وهو مواجهة ارتفاع أسعار الكتب، ومساعدة الناس اللي مابتفضلش تقرأ كتب إلكترونية، ومع إنخفاض مستوى الدخل، وعزوف المواطنين عن القراءة أو تقليلها، كان فيه تأثر شديد الكام سنة اللي فاتوا في سوق الكتب، خصوصًا مع الالتزامات اللي بقت كتير، وكانت التضحية الوحيدة إن محدش يشتري كتب، وتقديم القراءة كقربان لتخفيض النفقات.

ظهر بوكابيكيا كأول موقع يقدم خدمة تبادل الكتب بأسلوب فريد من نوعه، عن طريق عمل مكتبة افتراضية عامة لتبادل الكتب مع أي شخص داخل مصر أو أكثر من فرد في كل مرة، ومتاح للجميع استخدام الموقع بخطوات بسيطة جدًا.

بعد إنشاء حساب وتجهيز كتبك اللي محتاج تبدلها، بتعمل طلب تبرع للموقع بكتبك، وهيكلمك فريق التوصيل اللي بيستلم منك الكتب فى خلال أيام، وبيتم استلام الكتب بعد المكالمة بـ 24 ساعة، وبعد استلام الكتب بيتم إضافة رصيد من عملات متخصصة للموقع في حسابك اللي هيمكنك من شراء أي كتاب اتبرع به قراء زيك، وبالتالي تقدر تشتري برصيدك أي كتاب يعجبك من أي حد، ومش شرط يكون الشخص التاني عاوز كتبك اللي اتبرعت بيها.

وبكده هتتخلص من كتبك القديمة اللي مالهاش أي لازمة عندك،، وكمان هتحصل على كتب تانية تساعدك على القراءة، وكل ده بيحصل بدون أي رسوم شحن كمان.

وطبقًا لعداد الموقع هنلاقي إنه تم تبادل حوالي 10 آلاف كتاب لحد اللحظة دي.

الموقع بشكل كامل بيعتمد على القاريء اللي هو رأس ماله، فكل ما زاد عدد اللي بيبدلوا الكتب كل ما كان دهمؤشر على استمرارية الموقع ونجاحه، وبشكل عام الموقع مهم بالنسبة للي بيدور على كتب قديمة ممكن ماتكونش موجودة في السوق، ودي ممكن تلاقي حد عارضها للبدل لأنه مش محتاجها.

مقترح