The Definitive Guide to Living in the Capital , Cairo , Egypt

حب على حافة الوشم

حب على حافة الوشم: سنوات الضياع

  • من الآن
  • عربي عربي
  • 15 EGP
  • مكتبات وسط البلد، ومع باعة الجرائد
تم التقييم بواسطة
Ahmed Abd El Gawad
قيم
قيم الآن
حب على حافة الوشم: سنوات الضياع

الوشم رسم بـ نستخدمه للزينة على الجسم، يعنى على القدم أو اليد وكده.. لكن الوشم اللى استخدمه الروائى التونسي” فتحى العكرمي” كان له معنى ثاني خالص هو “الماضي” بكل قسوته وده اللى هـ نشوفه واضح فى كل قصص المجموعة وأبطالها اللى كل تجاربهم ألم وعذاب وغربة عن الوطن والكاتب متأثر بأحداث تونس وبالفترة الكبيرة اللى عاشها أهلها فى ذل وقهر.

المجوعة بـ تتكون من 16 قصة منها: “الترحال فى وجع اليتم، الحنين إلى القبر، الرغبة العرجاء، حب على حافة الوشم، حكمة الجنون، صحراء القلب”.

صدقتم كلامنا؟ أنتم شايفين دي عينة من أسماء المجموعة وباين فيها قوي الحزن والألم..

“الترحال فى وجع اليتم” هو صحيح أن اليُتم بـ يوجع.. تمام مافيش كلام بس مش للدرجة اللى بـ يوصلها بطل قصتنا يعنى طفولة وحيدة وشيخوخة حزينه ومافيش أصحاب غير الشقاء وده كله علشان والدته توفيت.

ومن قصة إلى قصة بـ نعيش حالة توهان مع قصص فتحى العكرمى ووجع وراءه وجع فى ذبح واضح لشخصيات مهمشة..

تعالوا نشوف إيه تحليله لـ” حكمة الجنون”.. هى حكاية ست كبيرة فى السن ومجنونة وده العادى طبعًا فى كل أبطال المجموعة.. المهم نرجع لموضوعنا، هى اتجننت ليه؟ البطلة تزوجت من رجل مُسن حرمها من كل حاجة وبقيت مجرد جارية وسجينة لرغباته وهى دي حكمة الجنون.

أما قصة حب على حافة الوشم.. فدى حكاية ثانية عبارة عن ومضة سريعة لاثنين تقابلوا دون ميعاد، تقابلوا على حافة الروح والوشم هنا مش وشم على الجسم.. لأ ده وشم على الروح وشم حزين لبنت –لم يذكر اسمها– فقدت حبيبها، قابلت شخصية ثانية وهى محتارة ما بين عشقها القديم وبين المقابلة الجديدة.. والحبيب الجديد –اللى ما قالش اسمه– محتار ما بين استرجاع ذكرياتها وحبه لها.. الفكرة قائمة على الحوار بين اثنين تقابلوا فجأة فـ حبوا بعض وكل واحد فيهم شايل وشم حزين فى روحه.. يا ترى هـ يمسحوا حزنهم وينقشوا وشم جديد.. الكاتب مش بـ يقول النهاية لكن بـ يسيب اللى بـ يقرأ يعيش الحالة معاهم.

لازم نقول أن اللغة فى القصص جيدة وقوية وفيها تعبيرات كثير جميلة ومبهرة وصوره أغلبها منقوشة من الحزن والأوجاع.. رغم أن القصص كئيبة إلا أن الكاتب التونسي قادر يقول لنا تعالوا معايا فى عالم ثانى هـ أخذكم فيه رغم أى شيء وهـ أوريكم.

عجبك ؟ جرب

"الأسود يليق بك" لأحلام مستغنماني.

عن الكاتب

صحفي تونسي كتب المقالات فى العديد من المواقع الإلكترونية.. وهو قاص نشر كثير من قصصه فى المنتديات الأدبية.. صدر له مجموعة قصصية بعنوان "حب على حافة الوشم".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح