The Definitive Guide to Living in the Capital , Cairo , Egypt

كتب
صنايعية مصر

صنايعية مصر: صنايعية المزاج

  • عمر طاهر
  • سير ذاتية
  • من الآن
  • عربي عربي
  • 50 EGP
  • مكتبات القاهرة
تم التقييم بواسطة
Mustafa Abd Rabu
قيم
قيم الآن
صنايعية مصر: صنايعية المزاج

(التاريخ هو سيرة رجال عظماء)

قدر عمر طاهر إنه يحوّل المقولة السابقة إلى كتاب صنايعية مصر: مشاهد من حياة بعض بناة مصر في العصر الحديث) ومزج بين التاريخ والسيرة الذاتية والمقال والتحقيق الصحفي.

الكتاب عبارة عن مقالات اتنشرت في موقع التحرير ثم في جريدة الأهرام. حذف من القائمة أسماء كثيرة، إما لقلة المعلومات، أو لأن الأشخاص مكانوش أصحاب سبق أو ريادة، وكانوا مجرد شخصيات ناجحة. وبكده نقدر نعرف واحد من أهم الروابط بين الشخصيات اللي اتكلم عنها الكتاب، إنهم جميعا رواد وأصحاب تجربة، كل واحد في مجاله.

ومن الممكن يكون جزء من مهمة الكتاب تعريف الأجيال الجديدة –اللي هما جزء كبير من جمهور الكاتب- على شخصيات مهمة ورائدة. كنوع من إعادة الاعتبار لشخصيات عظيمة تجاهلهم المجتمع ووسائل الإعلام لأسباب كتير.

كلنا عارفين شوكولاتة كورونا وبنحبها، لكن مانعرفش إن مؤسس الشركة هو اليوناني تومي خريستو. ومن خلال حكاية المصنع هنعرف ليه الخواجة خريستو اختار الغزال عشان يبقى رمز للماركة.

خريستو اشترى أرض جنب المصنع عشان العمال يلعبوا فيها كورة، الأرض كان بيظهر فيها غزال شارد، ماحدش عارف هو بتاع مين ولا بييجي منين. وفي مرة اصطدمت الكورة بقوة بدماغ الغزال ومات فورًا. حزن تومي خريستو عليه وقرر يخلد ذكراه، ويحط صورته كشعار على كل منتجات المصنع.

وعلى هامش حكاية صنايعي الشوكولاتة هنتعرف على رجل الأعمال علوي الجزار، صانع أشهر ماركة شاي في مصر حتى نهاية الثمانينات (الشيخ الشريب).

وهنتعرف على سمعان صيدناوي، المهاجر اللبناني اللي أسس امبراطورية صيدناوي، اللي كانت بوصلة الموضة في مصر. ومحمد سيد ياسين رائد صناعة الزجاج، اللي غامر بكل شيء عشان يقدر يقوم صناعة وطنية. وأبو رجيلة رجل الأعمال اللي خدم الدولة أيام السلام وأيام الحرب.

والرابط المشترك بين كل رجال الأعمال اللي اتكلم عنهم الكتاب إنهم كانوا عصاميين وعارفين يعني إيه صناعة وطنية. لكن للأسف كلهم تقريبًا انتهوا بسبب التأميم.

وفي الكتاب هنتعرف على نموذج رجل الدولة (الوزير أو المحافظ) في فصل من أمتع فصول الكتاب اللي اتكلم عن وجيه أباظة. وعن انجازاته لما كان محافظ البحيرة، وتوليه محافظة القاهرة بعدها. وهنتعرف على جزء من سيرة المهندس اللواء صدقي سليمان، اللي تولى بناء السد العالي، في فترة من أصعب الفترات في تاريخ مصر.

وفي فصل مهم جدًا عن اللواء أحمد رشدي، وزير الداخلية في عهد السادات، وواحد من أهم وزراء الداخلية. وازاي نجحت كل خططه في القضاء على الفساد، وفي محاربة تجارة المخدرات.

مزاج عمر طاهر العالي في الكتابة ظاهر في الكتاب كله، لكن ظهر بوضوح في الكتابة عن نجيب المستكاوي، مؤسس الصحافة الرياضية، ويمكن أخف دم ناقد كروي ظهر في مصر لحد دلوقتي. وفصل الضيف أحمد، اللي اسمه على مسمى فعلًا لأنه رحل سريعًا. واللواء باقي ذكي يوسف، صاحب فكرة هدم الساتر الترابي بخراطيم المياه، والمنشد العظيم سيد النقشبندي.

الكتاب مليان بحكايات جميلة، فيها لحظات إنسانية ودراما، تخلي كل قصة تنفع تتعمل فيلم أو رواية.

ملحوظة أخيرة: الصور في نهاية الكتاب أغلبها مش واضحة لأنها بالأبيض والأسود، وغلاف الكتاب ممكن يبقى أحسن من كده.

عجبك ؟ جرب

وجوه لا تنسى – محمود عبد الشكور

عن الكاتب

عمر طاهر كاتب وصحفي مصري من سوهاج حصل على بكالوريوس التجارة وإدارة الأعمال جامعة حلوان عام 1998. صحفي بمؤسسة الأهرام - مجلة نصف الدنيا - المحرر العام لجريدة اضحك للدنيا محرر باب متصاحبين بمجلة علاء الدين للأطفال يكتب للعديد من الصحف والمجلات المصرية.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح