The Definitive Guide to Living in the Capital , Cairo , Egypt

الجملة اللى بها ممكن تخرب أى بيت عمران.. “طلقنى يا سيد”

الجملة اللى اتسمعت أكثر من ملايين المرات.. “طلقنى يا سيد”

جملة العيد وكل عيد.. “طلقنى يا سيد”

الجملة اللى يخاف منها الرجال والستات والأطفال.. أنها “طلقنى يا سيد”.

الكتاب عادى جدًا صراحة.. وواحدة واحدة كده وتعالوا نشوف مع بعض “طلقنى يا سيد” بـ يتكلم عن إيه.

سيد ورقية هما البطلين الكبار للحكاية، هما الأصل فى الحدوتة واللى ما ينفعش نقول عليها رواية هى حدوتة لطيفة.. ممكن تقعد تحكيها مع أصحابك وأنتم بـ تهزروا.

سيد ورقية هما أبطال حكايتنا وباقى الشخصيات سنيدة لهم أو دورهم مش محورى زيهم.. سيد خريج كلية التجارة أو “كلية الشعب” زى ما بـ يسموها وهو شاب مصرى جدع.. وطبعًا بـ يعانى على سلم التوظيف ومستنى الفرج.

رقية بقى هى البنت المصرية البسيطة اللى بـ تبيع الخضار ونفسها تلاقى الزوج اللى يريحها من الشغل والغُلب اللى بـ تشوفه.. كان حلمها تتجوز وتعيش حياة جميلة وتبقى “ست بيت”، هما نموذج بسيط لحكاية بـ تتعاد كل شوية فى المجتمعات الفقيرة والعشوائيات عن ولد بـ يحب بنت.. وعاوزين يتجوزوا وكل واحد فيهم له أحلامه الخاصة عن الزواج والحب والعشرة والحنان، وبـ تيجى الصدمة لما يتجوزوا ويتصدموا على صخرة الواقع وتبدأ المشاكل اللى تنتهى فى النهاية بالطلاق بعد خناق وزعيق.

لما نتكلم عن الكتاب لازم نقول أن لغته بسيطة جدًا قريبة من اللغة العادية وده مش معناه أن د. فيروز عطية الكاتبة بـ تبسط الموضوع لكن معناه أن لغتها شوية فقيرة وبعيدة عن لغة الوصف المبدعة، الكتاب كله بالعامية وألفاظه قريبة فعلًا من الحى الشعبى بس مش للدرجة دى يعنى، مش لدرجة أن الست “تشق هدومها.. وتواصل وصلة الردح” كده إحنا مش بـ نتكلم عن كتاب أكثر من كوننا بـ نتفرج على فيلم من الأفلام الشعبية المنتشرة اليومين دول.

المفيد فى الكتاب هو محاولته نقل الواقع بكل ما فيه.. مشاكل الشغل والشباب والفواتير والجواز وإدارة البيت وإزاى لازم نحسبها كويس ولازم نخلى الحب هو اللى يسيطر على البيت مش الفلوس حى ولو كانت قليلة، المهم فى الموضوع كله هو تغيير العنوان من “طلقنى يا سيد” إلى “حبنى يا سيد”.