The Definitive Guide to Living in the Capital , Cairo , Egypt

رسالتنا للسفاحين:

كل مُنشأة كل موظف كل عامل فى egy – nergy حول العالم هو هدف لنا، إن لم تسقط في هذه اللحظة، فهو عرضة للسقوط في اللحظة التالية.. لا أحد بمأمن إلا من لزم داره وابتعد عن هذا الكيان المجرم..

أما الرؤوس الكبيرة.. فأقول لهم شيئًا واحدًا:أخيرًا.. بدأت القيامة.. قيامتكم.

فهمتوا؟

هاه فهمتوا حاجة من اللي فات، ولا لسه، طيب خلينىي أقولكم أننا قدام الجزء التاني من رواية بتتكلم عن ………….

قديمة برضه إني أقولكم الرواية بتتكلم عن إيه.. وايه فكرتها، ما تجرب تشتري الرواية وتقراها، مش هيبقى أحسن؟ أنا عايز أتكلم معاكم عن الرواية، بس عايزكم برضه تقروها، ومش عارف أكمل كلام ولا تقروا أفضل؟ معضلة دي صراحة.. عمومًا خلونا نتكلم ونشوف مع بعض أحسن.

أحسن:

أقولكم بقى الأحسن.. شريف ثابت روائي شاطر بيعرف يكتب كويس، عمل رواية اسمها أنين، ودي كانت الجزء الأول، وبعدها عمل رواية تانية اسمها (عالم أفضل.. القيامة) اللي هي معانا دلوقتي يعني الجزء التاني، وشكلها برضه مش هتخلص هيعمل جزء تالت، أصل الموضوع كبير..

الموضوع:

برضه جرجرتوني في الكرم لحد ما هحكيلكم الموضوع، طب شوفوا الموضوع باختصار إن مصر مبقتش مصر، الدنيا اتغيرت من بعد الثورة في حالة من الخيال العلمي اللي بيفكرنا كده بروايات الجميل نبيل فاروق، لكنها من وجهة نظر مختلفة، إحنا بنتكلم عن شركة طاقة كبيرة بقت تقريبًا بتتحكم في أغلب مصادر الطاقة اللي في العالم.. وبنتكلم عن حروب ونزاعات، وعن مصر اللي اتبهدلت، والطاقة اللي فيها قربت تختفي، وعن سباق الطاقة المحموم في كل العالم، بنتكلم عن الدنيا لما تتطور والتكنولوجيا والآلة يبقوا مسيطرين، شكل الناس هيبقى عامل إزاي؟ والسياسة لما تتداخل مع المصالح مع التكنولوجيا، بنتكلم عن أن الحروب اللي جاية مش هتبقى على السلاح ومين احتل أرض مين، هتبقى على المصادر، يعني مين اللي بيمتلك المياه، ومين اللي بيمتلك قوة الطاقة.. نتكلم عن شركة وحيدة في العالم بقت تقريبًا متحكمة فيها egy – nergy

كل ده في حالة جيدة من السرد السريع واللي بيتنقل من مشهد للتاني بسهولة.. واللغة الهادية في بعض المناطق، والألفاظ الحادة في مناطق تانية، اللي ممكن ناس تعتبرها خارجة، إحنا عارفين أن الألفاظ دي بتتقال في الشارع لكن السؤال هل الأدب اللي بينقل الواقع محتاج يقول الألفاظ دي في عمل إبداعي؟ ده سؤال مطروح للنقاش مش عايزين نجاوب عليه هنخليكم أنتم تجاوبوا وتوصلوا إجابتكم لشريف..

في المجمل الرواية حالة ومكتوبة حلو، وخيالها أكتر حاجة بتميزها.. اقروها وقولوا لنا رأيكم.