The Definitive Guide to Living in the Capital , Cairo , Egypt

جمال عبد الناصر من القرية إلى الوطن العربي الكبير

كتالوج حياة ناصر: صور نادرة وحكايات مدهشة عن زعيم الأمة العربية

  • صفاء خليفة
  • سير ذاتية
  • من الآن
  • عربي عربي
  • 150 جم
  • كل المكتبات
تم التقييم بواسطة
Rehab Loay
قيم
قيم الآن
كتالوج حياة ناصر: صور نادرة وحكايات مدهشة عن زعيم الأمة العربية

بـ نحتاج من وقت
للثاني نقرأ في سير حياة ناس غيرت التاريخ، سواء أثروا بالخير أو بالشر، دائمًا في
حياتهم بـ يكون فيه حاجة مختلفة و ملهمة، بـ تخلينا نعيد النظر في حاجات كثير في
حياتنا وفي شخصياتنا، وفي طريقة تخطيطنا لمستقبلنا، ومن الناس اللي سيرة حياتهم ملهمة
فعلاً الرئيس الراحل جمال عبد الناصر اللي صدر عنه مؤخرًا كتالوج كبير من الدار
المصرية اللبنانية بـ يحكي قصة حياته، وإنجازاته بالكلمة والصورة بعنوان “جمال
عبد الناصر من القرية إلى الوطن العربي الكبير”.

الكاتالوج عبارة عن
556 صفحة كلها صور نادرة، ومعلومات مرتبة عن الرئيس الراحل، من أول بيته في قرية
بني مر لحد وفاته عام 1970، لما تقلب في الصور تلاقي نفسك بـ تستعيد لذهنك قدرة
غريبة، وإرادة مختلفة على التغيير، لإنسان عاش في وجدان مش الشعب المصري فقط ولكن
الشعب العربي كله من المحيط إلى الخليج، وكلهم لحد دلوقتي بـ يفتكروه بالخير.

طبعًا حياة عبد
الناصر مليانة محطات ومراحل كثيرة، لكن الكتالوج ده بـ يعرض أهم المراحل، وبـ يركز
على أهم المحطات في العلاقات المصرية العربية، وإزاي كانت مصر رائدة للعالم العربي
والإفريقي، وإزاي ساندت شعوب عربية وإفريقية كثير علي التحرر من الاستعمار الأجنبي،
وكمان بـ يلمس مناطق إنسانية جدًا في حياة الزعيم الراحل.

بـ يبدأ الكتالوج
بصورة نادرة لوالد جمال عبد الناصر في قرية بني مر في شرق أسيوط، في بيت من حجرة
واحدة، ورغم أن جمال عبد الناصر ما اتولدش ولا عاش في أسيوط إلا أنه فضل يفتخر بانتماءه
للصعيد طوال عمره، والحقيقة أن جمال عبد الناصر اتولد في الإسكندرية في البيت رقم
18 في شارع أنواتي في حي باكوس يوم 16 يناير سنة 1918.

الكاتالوج فيه صور
تأخذك لزمن جميل، زي مثلاً صورة البطاقة الشخصية لجمال عبد الناصر، عليها أسماء
الموظفين اللي أخذوا بصمته وعملوها، وتاريخ صدورها في أول مارس 1958، والده
الأستاذ عبد الناصر كان موظف على قد حاله في هيئة البريد، ما عندوش أرض ولا ورث،
كل اللي يملكه كان مرتب صغير كل شهر بـ يصرفه على بيته المكون من جمال الابن
الأكبر وأخواته عز العرب والليثي، والوالدة فهيمة محمد حماد بنت تاجر الفحم.

الأب كان بـ يتحرك
كثير في أنحاء مصر، ومعاه أسرته الصغيرة، ومن خلال التنقل الكثير عرف جمال أحوال
بلده عن قرب وحس بمعاناة الشعب.

جمال عبد الناصر ما كانش
طفل عادي، من صغره وجسمه كبير ولما كان سنه 8 سنين كان شكله وكأنه عنده 12 سنة،
وكانت والدته دائمًا تقول عنه أنه غريب عن زمايله، بـ يحب الأنطواء والعزلة والتفكير
وطرح الأسئلة، ومرت الأيام وانتقل جمال للدراسة في القاهرة، لكن حصل حاجة صعبة جدًا،
في الوقت اللي كان فيه في القاهرة بـ يدرس توفيت أمه، وما رضيش والده يقوله أنها توفيت
علشان ما يزعلش، ولما روح البيت وما لقاش لها أثر اتفزع وسكت وما تكلمش ولا قال
حاجة عن وفاة أمه اللي كانت من أقرب الناس له.

بين الصفحات مش بـ تقرأ
فقط تاريخ إنسان مهم مر في حياته بمواقف وحالات صعبة كثير، أنت كمان بـ تقرأ تاريخ
بلد كانت بـ تناضل وتحارب علشان تكون أحسن بلد في الدنيا، وبـ يلمس مواقف يمكن
تكون مرت بك أنت شخصيًا، زي لما كان جمال عبد الناصر عنده 15 سنة، ولقى الناس في
شوارع القاهرة كلها بـ تتظاهر ضد إلغاء دستور 1923 المهم ووضع دستور 1930 المقرر لخدمة
الإنجليز في مصر، ورغم أنه ما يعرفش كل المعلومات دي، ولا ميزة دستور 23 إيه؟ ولا
مساوئ دستور 30 إيه، ولا الناس أصلاً بـ تتظاهر ليه؛ إلا أنه دخل المظاهرات علشان
لقى أولاد بلده في مواجهة السلطة بـ يتضربوا وبـ يتبهدلوا وكلهم يد واحدة ضد حاجة
معينة، هتف ضدها وهو ما يعرفهاش.

من خلال الكتاب بـ
تشوف إزاي دخل الطالب ابن الناس اللي على قد حالهم الكلية الحربية، وقدر في فترة
قصيرة جدًا أنه يكون زعيم الأمة العربية، ويعرف العالم كله قيمة مصر ومكانتها
وقوتها.

عجبك ؟ جرب

«أنا وهؤلاء» لإبراهيم نافع، و«الأيام» لطه حسين.

عن الكاتب

«جمال عبد الناصر من القرية إلى الوطن العربي الكبير (1918-1970)» من تأليف الدكتور خالد عزب والباحثة صفاء خليفة، والاثنين شغالين في مكتبة الإسكندرية، واستعانوا منها بصور نادرة جدًا مش موجودة غير في المكتبة.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح