The Definitive Guide to Living in the Capital , Cairo , Egypt

حقيقي بقينا مبسوطين من وجود كتب باللغة العربية وكتب مصرية بتتكلم عن علاقة الرجل والمرأة وتركيبة الست والراجل الفسيولوجية والنفسية، وواحد من الكتب دي هو “كتالوج سي السيد” لواحد من الكتاب الأعلى مبيعًا في مصر إيهاب معوض.

الجملة المكتوبة على الغلاف الأمامي تحت العنوان: “يحفظ بعيدًا عن متناول أيدي الرجال” وبالتالي كدة واضح جدًأ إنه الجمهور المستهدف للكتاب هو السيدات وعلى قد ما الكتاب جميل ومفيد لكن كلمة الغلاف الخلفي خوفتني في البداية -كواحدة ست- من قراءة الكتاب في الأول.. حسيت إنه كلمة الغلاف الخلفي اتكتبت وكأنها بتؤكد إنه عدم معرفة الست بتكوين الراجل النفسي هو سبب كل المشاكل!

“منى إللى عدت التلاين ولسة ما اتخطبتش” و “سهى إللي اتخطبت سنتين لواحد حفي وراها ورغم كدة هو إللي سابها”  و”نهى إللي جوزها خانها”.. كل ده ممكن يحصل حتى لو قرينا الكتاب وحتى لو عرفنا تكوين الراجل لإننا مش بالضرورة كستات نكون سبب المشكلة أصلًا.. وفكرة إنه منى ما تتخطبش رغم إنها عدت التلاتين وأمورة ومؤدبة مش مشكلة في حد ذاتها علشان نقرأ علشانها أي كتاب يعني هل ممكن نقرأ جملة “أحمد إللي عدى التلاتين من غير جواز رغم إنه وسيم ومؤدب” كمشكلة لازم نوجد لها أسباب وحلول؟

لكن أنا عايزة اعترف إنه بمجرد دخولي المكتبة وتقليبي فيه بسرعة لمدة دقيقة واحدة قررت إنه الكتاب ده مختلف ومهم ويستحق الشراء والقراءة العاجلة.

تقديم الكتاب للكاتبة هبة السواح مؤلفة كتاب سندريلا سيكريت عن دار الرواق واحد من أكثر الكتب نجاحًا في 2017 وإللي بتقول فيها :”الكتاب أكثر من رائع وأعتقد بإذن الله إنه هيغير تاريخ علاقة الرجل والمرأة، لإنه فعلا كتالوج بيشرح بمنتهى الدقة وخفة الدم، ومن خلال حكاوي بنعيشها يوميًا كل تفصيلة عن شخصية الراجل بكل أبعادها، كمان بيدينا لأول مرة أدوات إمتلاك الراجل والسيطرة عليه.. وهو المطلوب طبعًا 🙂 “.

والحقيقة إنه كلمة هبة السواح حقيقية جدًا، الكتاب فعلا ممكن يغني عن قراءة مجموعة من الكتب المهمة إللي اتكلمت عن الراجل وعلاقته بالست زي “الرجال من المريخ والنساء من الزهرة”، Why  ،Why men marry bitches ،men love bitches و Act like a lady think like a man وغيرها من الكتب المشهورة في الموضوع ده وإللي واضح جدًا إعتماد الكاتب عليهم كمصادر في الكتاب وهي نقطة تحسب له إنه يكون فيه استناد على خبرات كتاب وخبراء مشهورين في مجال العلاقات.

الكاتب إيهاب معوض بيحكي لينا في مقدمة الكتاب إزاي جروب “كيف تشقطين عريسًا” كان المحرك ليه علشان يكتب كتاب موجه للستات عن طبيعية الرجالة: “إزاي أخلّي البنات يوصلوا بطريقة مشروعة ومحترمة يقدروا بيها يختاروا شريك حياتهم، مش يفضلوا قاعدين في البيت مستنيين ابن الحلال، وإزاي أخلي الزوجة تحتفظ بجوزها وتحميه وتحمي نفسها من أي خيانة متوقعة”.

الكتاب بيتضمن خمس فصول.  الفصل الأول بيعرض الاحتياجات الأساسية عند الراجل وهي التقدير والغريزة والعاطفة. أما الفصل التاني، فبيستعرض صفات الراجل الأساسية وبيتكلم عن كل صفة بإسهاب زي إنه الراجل صياد بالفطرة، كائن بصري جدًا، ما بيدفعش فلوس في حاجة ممكن ياخدها ببلاش، ما بيحبش المفاجآت بيعشق استرداد ممتلكاته.

وفي الفصل الثالت بنتعرف على مفاهيم الراجل الخاصة زي مثلًا مفهومه عن كلام والأكل وعن النوم والخيانة إلخ.. الفصل الرابع بيساعدنا نتعرف على تركيبة الراجل البيولوجية زي مراحل عمره وتركيبة دماغه وحواسه والهرمونات والناقلات العصبية وغيرها، وأخيرًا الفصل الخامس إللي بيعتبر دليل مختصر لاختيار شريك الحياة المناسب وجواز الصالونات ونعمل إيه في فترة الخطوبة وده الجزء الأخير والخلاصة بعد ما قرأنا الكتاب كله وفهمنا الراجل أكتر.

أسلوب إيهاب معوض سلس ومسلي وساخر، يخليك بتقرأ وأنت مش زهقان.. بصراحة أنا قرأت الـ 300 صفحة في يومين وحسيت إني مستمتعة جدًا واستفدت كتير من الكتاب.

كان نفسنا الكاتب يذيل الصفحات بهوامش فيها مصادر أكتر للرجوع إليها وقراءة كل نقطة باستفاضة أكثر من مصادرها وكتابة بعض المصطلحات كمان باللغة الإنجليزية لتسهيل البحث على الإنترنت في نقط بعينها أو يكون فيه صفحتين في آخر الكتاب  فيهم كل المصادر والمراجع إللي ممكن نقرأ فيها بعد الانتهاء من الكتاب الشيق ده إللي بنعتبره إضافة للمكتبة المصرية في مجال العلاقات.