The Definitive Guide to Living in the Capital , Cairo , Egypt

كتب
معجم المقامات

معجم المقامات: ديوان شعر حاليًا بالمكتبات

  • ديوان شعر
  • من الآن
  • عربي عربي
  • 25 EGP
  • مكتبات وسط البلد.. ومكتبات
تم التقييم بواسطة
Ahmed Abd El Gawad
قيم
قيم الآن
معجم المقامات: ديوان شعر حاليًا بالمكتبات

اسمه معجم المقامات، لكن الحقيقة هو مش معجم بالمعنى المعروف للكلمة.. هو حالة مختلفة تمامًا، هو الديوان الأول للشاعر محمد جعفر.. براحة بقى وتعالوا نبدأ من الأول..

س: بصفة عامة إيه أخطاء الديوان الأول لأي مبدع؟

ج: يعنى مطبعية.. وبيكون الشغل مش عالى قوى.. وساعات بيبقى العنوان غريب ومش ماشى مع اللي جوه

س: وبالنسبة لديوان معجم المقامات؟

ج: نقولكم إحنا بقى.. هو فعلًا من المعروف إن لما شاعر بينزل ديوانه الأول بيبقى مش قوي.. بس جعفر غير وجهة نظرنا عن الموضوع ده صراحة.. وكمان معروف إن اختيار العنوان بيبقى مش مرتبط باللي جوه.. بس برضه جعفر غير الفكرة من جذورها..

جعفر:

يستاهل جعفر إن يبقى له فقرة كاملة لوحده عشان هو صاحب الفرح.. وهو اللي كاتب الديوان الجميل "معجم المقامات" اللي تخطى فيه فكرة العمل الأول، لإنه كان من الواضح الشغل الكتير اللي اشتغله على نفسه واللي عمله في الديوان لحد ما وصل للمرحلة دي.. أما بالنسبة للعنوان، فجعفر حالة مختلفة بجد سواء في فكرة العنوان الجديدة، أو لعبه كمان على المقامات الموسيقية ومزجها ببحور الشعر وبالكتابة في كل مقام بشكل منفرد، هاتحسوا فيه بالرهف الصوفى، والانتشاء مع المزيكا.. الراجل ده سمع مزيكا لحد ما تعب من سماعها.. واتعلق بيها.. وربنا أعطى له من روح الشعر لحد ما بقى شاعر مكتمل الأدوات.. هاتحسوا إنه درويش فى حالة وجد بيتعامل مع الشعر بسلاسة وبقوة وبحلاوة.. في البياتي هو عارف بيعمل إيه.. في الصبا هو الحزين.. فى الحجاز هو بيدندن هناك.. فى كل مقام حالة موسيقية وشعرية مختلفة..

الشعر عنقود كلام

أو عقد خالٍ فى ملمس الماس

أطرب بصوت القبيلة

العازف المنفرد

صليت فى قلبى فسلم

يا صاحبى ف الكرْم

دع عنك لوم الفوارس

يسعد جليس الفرس

حارس حدود السندس

آنس بها من عُرب

من دمع روحنا بكينا، فُكت عراوى الطلسم

فى شعرنا المستبد

والمستحيل للأبد.. (من مقام البياتي)

شفتوا الحالة؟.. بيجيد جعفر رسم الصورة والصياغة بتراكيب لايقة على العامية وقريبة من الفصحى.. تعالوا نختم بالنص ده..

من عين تشق الحجر… لعين تشف القمر.. للصاحبة فى السفر

والظاهرة م القوم

من طاهرة فى البدن.. ل العامرة فى السكن.. للخيرة من عدن..

والساهرة فى النوم

دب الحمام ع الكلا

صب السلام ع الملا

شب الكلام فى الفلا.. فاستبشروه العرايب

داب السحاب فى الحبايب.. طاب التراب العليل

صاب الغياب الرطايب.. فاستحيا منها الخليل

حل الضيا واللهايب.. فى خصر أخضر نحيل

فأسرت منها سلايب.. خمرٍ وعسلٍ ونيل

مقام الصبا..

عجبك ؟ جرب

ديوان "كزهر اللوز أو أبعد" لمحمود درويش.

عن الكاتب

محمد جعفر شاعر عامية وصحفي ومترجم مصري، عمل في كثير من المواقع الثقافية والجرائد المصرية والعربية، وله ديوان واحد بعنوان (معجم المقامات).

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح