The Definitive Guide to Living in the Capital , Cairo , Egypt

كتب

نصائح مفيدة قبل ما تشتري كتاب من مكتبات القاهرة

نصائح مفيدة قبل ما تشتري كتاب من مكتبات القاهرة
بواسطة
Ahmed Abd El Gawad

لو بتحب الكتب والقراءة، وحابب تتعرف على أهم الأماكن اللي بتبيع الكتب فى القاهرة يبقى لازم تقرأ الموضوع ده، كايرو360 بتقدم لك نصائح لما تحب تشترى كتاب من مكان كويس فيه تنوع في الكتب.

حدد:

لازم تعرف الأول انت نازل تشتري إيه، يعني تبقى محدد: أنا عايز كتب في التنمية البشرية مثلًا، ولا هشتري دواوين شعر أو روايات، ولا من كل نوع هشتري حاجة، وبعدين ركز شوية قبل ما تشتري علشان النصائح اللي جاية مهمة.

 

استنى الخصم:

لازم تبقى مشترك في صفحات أهم المكتبات في القاهرة، خصوصًا اللي بتعمل خصومات، عشان لما تعرف وقت الخصومات تقدر تنزل تشتري وأنت متطمن، وتوفر فلوس كمان، وأكتر وقت خصومات بيبقى في الصيف، وأيام الإمتحانات علشان وقت الإمتحانات الشباب مشغولة والبيع بيبقى قليل.

 

اعرف:

لازم تبقى عارف مين الكاتب اللي نازل تشتري له، يعني تدور على بروفايله على الفيس بوك، وتقرأ عن كتبه وتشوف الناس كاتبة إيه عليه، وعلى كتابه، ومش لازم طبعًا يبقى رأي الناس كله صح، بس على الأقل خد فكرة، علشان ما تجيبش كتاب وترجع تقول يا خسارة يا ريتني ما جبته، إلا لو كان ده بقى كاتبك المفضل وأنت بتشتري له كل حاجة، ساعتها انزل هات الكتاب على طول.

 

المعرض:

فترة المعارض مهمة قوي وبتبدأ من شهر يناير وبتفضل مستمرة تقريبًا لحد شهر أبريل، وهي فترة مهمة لو أنت حابب تعمل مكتبة، عشان بيبقى فيها كل أنواع الكتب اللي أنت عايزها، وكمان خصومات كتير عشان المكتبة تعرف تبيع وسط الزحمة اللي بتبقى في المعرض، لكن نصيحتنا، هات ورقة وقلم، واكتب الكتب اللي أنت عايزها، وأسماء دور النشر بتاعتها، علشان لما تنزل المعرض تبقى فاهم أنت رايح فين، وعلشان (الميزانية) كمان، ولو اتبقى معاك فلوس ابتدي بقى دور على اللي محتاجه.

 

أصحابك:

آه أصحابك العنوان مش غلط، بص أصحابك دول بيبقوا كنز بس أنت مش واخد بالك، يعنى لازم تركز جدًا، لأن في منهم اللى بيبقى عارف أماكن بيع الكتب المخفضة، ومنهم اللي عارف المكتبات اللي بتعمل خصم، ومنهم اللي معاه الكتاب اللي أنت عايزه وممكن تعملوا تبادل كتب، شفت بقى مهمين قد إيه؟ بس أنت دور.

 

المكتبات:

هنا هنجيب لك لينكات أهم المكتبات وأشهرهم اللي بيعملوا خصومات وموجودين في أماكن كتير عشان تتواصل معاهم..

مكتبات "ألف"

مكتبات "ديوان"

مكتبات "الشروق"

مكتبة "عمر بوك ستور"

مكتبة "البلد"

مكتبة "مدبولي"

مكتبة "ليلى"

مكتبات "فيرجن"

 مكتبة "الكتبجية"

مكتبة ودار "آفاق"

مكتبة "الكتب خانة"

مكتبة ودار "ميريت"

مكتبة ودار "دون"

مكتبات "بوكس أند بينز"

 

مقترح