The Definitive Guide to Living in the Capital , Cairo , Egypt

النظرية:

قبل أى حاجة أول ما قرأنا العنوان افتكرنا على طول الفنان الراحل/ يوسف عيد اللى كان طالع في مشهد كوميدى رائع علقت مع الناس جملته المشهورة: "مش النظرية يا عم الحج".. وطبعًا كلنا عارفين أن كلمة النظرية موجودة على لساننا كثير مش بمعناها الأكاديمى إنما بمعناها المجرد.. بمعنى مش هي دي الفكرة اللي عاوز أقولها لك إنما النظرية (ويكمل الراجل كلامه) ومن هنا نقدر نقول أن فكرة النظرية متأصلة فى الوجدان المصرى.

الإهداء:

على غير عادة المجموعات القصصية اللي بـ تتصدر بكلمات مختلفة بـ يقدم خالد عودة الله مجموعته بالآية الشريفة "والذين جاهدوا فينا لنهدينهم سبلنا وإن الله لمع المحسنين"، وبعدين بـ يصدر المجموعة بمقولة المبدع شوقى بزيع: "لكأننى الأضداد فى رجل تقاتله وحوش يديه".

إهداء أو تصدير لازم يكون له معنى متماشى مع القصة.. متماشى مع حالة الضد اللى بـ يشتغل عليها خالد.. وحالة الهداية اللى بـ يدور عليها واللى عارف أنها مش سهلة، هى مرتبطة باللى جاهدوا في الله جاهدوا أنفسهم والمجتمع والحياة والناس والشهوات علشان يوصلوا.

العناوين:

يجب الاعتراف بأن العناوين مختلفة تمامًا فى نظرية اللعبة.. منها اللى ينفع قصة وده طبعًا زى المبدع يحيى الطاهر عبد الله اللى سمى واحدة من قصصه "الرجل الذى هده التعب حتى نام تحت حائط المسجد القديم" فى نفس الخط بـ نلاقى قصة "عندما بدأ الشيخ زكريا يضل طريقه إلى المسجد"، وعلشان حضرتك تقدر توصل لفكرة إزاى الشيخ ضل طريقه هـ تدخل فى متاهات كثيرة من القصص القصيرة المتضفرة بعناية جوه القصة الكبيرة.

التيمة:

التيمة اللى بـ يلعب عليها أو اللعبة اللى عاوز خالد يوصل لها فى قصصه هى القصص المنسوجة براحة جدًا جوه القصة الكبيرة واللى فى الغالب مرتبطة بالواقع لكن من الناحية الثانية، من ناحية الواقعية السحرية وحكايتها، وخذ عندك:

الشيخ اللى ضل طريقه كان كفيف وكان بـ يعرف طريقه عن طريق رائحة البشر.

فيه جثة مجهولة بـ تتوصف بكل تفاصيلها فى المغارة. (والمغارة لها قصة).

المحقق أيمن هو اللى بـ يتولى الموضوع (وله قصة).

الرائحة النتنة منتشرة فى القرية (ودى قصة).

الشيخ والقرية كلها مش عارفين يتخلصوا من الرائحة طوال الوقت (قصة ثانية).

الوحيد اللى هرب من الرائحة كان (أبو الذيب) وله قصة.

اللعبة:

اللعبة لها شروط، والشروط فى عناصر سريعة هـ نقولها:

اللغة مختلفة باختلاف الأماكن لأن الحكايات بـ تدور فى فلسطين.. وبالتالى عندك أسماء جديدة ومناطق مختلفة وتعاملات مع الاحتلال ونظرة الناس له، النظرة الأصلية البعيدة عن السياسيين.

العناوين بـ تعمل مردود هايل فى فهم القصة زى الشيخ زكريا.. خمسة سنتيمترات مربعة من التياتنيوم.. نظرية اللعبة.. عائدًا إلى يافا.. وكلها مناطق ودواير بـ توصل لبعضها.

المصطلحات اللى بـ يستخدمها واضح أنها بـ تعبر عن اهتمامه زى "الحياة منزوعة الثنائيات" مناطق ما بعد النزاعات .. الشرق أوسطية.. ما بينيات.. بصوا الراجل ده سياسى شاطر ومتخفى فى زى كاتب.