The Definitive Guide to Living in the Capital , Cairo , Egypt

هو وهي

هو وهى: شباك على دنيا العلاقات

  • من الآن
  • عربي عربي
  • 20 EGP
  • مكتبات وسط البلد
تم التقييم بواسطة
Rasha Zeidan
قيم
قيم الآن
هو وهى: شباك على دنيا العلاقات

بـ نحب يا ناس نكذب لو قولنا ما بـ نحبش..

بـ نحب يا ناس والدنيا يا ناس

من غير الحب ما تتحبش

فاكرين الأغنية دى.. طبعًا كلنا بـ نحب، واللى يقول غير كده كذاب، علشان الحب ده بحره واسع، يعنى حب الزوج لزوجته، والأم لأولادها، حب العمل وحب الله، ولو صادفت ومافيش كل ده يبقى حبك لنفسك، أو حبك لوالديك.

حكايتنا النهارده عن هى وهو، عن العلاقات والمشاعر والمشاكل وكل الحاجات الحلوة اللى بـ تجمعهم.. حكايات هـ تلاقى نفسك فيها، أكيد هـ تلاقى موقف أو أكثر تعرضت له أو عدى عليك أو حكى لك واحد من أصحابك أو جيرانك أو قرايبك عنه، حكايات تحس أنها من الواقع بـ يجمعها كلها حاجة واحدة أنها فيها ولد وبنت.

الكتاب بـ يراجع اختياراتنا كانت صح ولا غلط، بـ يخليك تشوف رد فعلك كان عامل إزاى، الكتاب اختبار نفسى علشان تفهم أنت اختارت صح ولا غلط فى المواقف المختلفة، وتقعد تفكر يا ترى كان فيه حل ثانى ولا كان الحل مستحيل، كان الأصح أنك تسيبها، أو كان الأصح أنها تسيبه، أو الأصح أن هما الاثنين يسيبوا بعض، ولا يكملوا، طب لما يكملوا هل فعلًا نجحوا فى حياتهم، الكتاب شباك على دنيا العلاقات بـ يخليك تعيد التفكير فيها وتقول ها مين اللى عاوز يكمل العلاقة مع الثانى، وإيه هى فكرة العلاقة أصلًا، ومين اللى بـ يخلى العلاقة تنجح أو تفشل.

"هو وهى" بـ تحكى عن مشاعرنا وحياتنا اللى مافيش حد فينا ما عداش على موقف أو أكثر منها، المهم أنك تشوف أى موقف منهم أثر فى حياتك وعلم على قلبك وخلى روحك سعيدة أو خلاها حزينة.

الكتاب عبارة عن أسكتشات قصيرة بين اثنين بـ يحبوا بعض جدًا والدنيا بـ تعمل فيهم هى والظروف اللى هى عاوزاه، يعنى ممكن تلاقى اثنين بـ يحبوا بعض بس الظروف ما سمحتش لهم يجتمعوا مع بعض.. وغيرهم وغيرهم.

د. كمال المبشر كاتب شاطر طريقته سهلة فى الكتابة وبـ يعمل حوارات بين الشخصيات أكثر من وصف المشاهد، يعنى بـ يحب الحوار أكثر من أى حاجة ثانية، وده بـ يخلى طريقة الكتاب سهلة وبـ توصل بسرعة للقارئ، كمان أن الكتاب عن الولد والبنت بـ يخلى شريحة الناس اللى بـ يقروه كثيرة لأنه مهتم أوى بالعلاقة دى وبتفاصيلها الكثير، السؤال اللى عاوزين نقوله للكاتب، هو أنت عدت بك العلاقات دى ولا إيه؟

عجبك ؟ جرب

"فقه الحب" ليوسف زيدان.

عن الكاتب

د. كمال المبشر، بكالوريوس طب وجراحة الفم والأسنان جامعة الأزهر 2011، معيد فى كلية طب الأسنان جامعة النهضة، مؤسس مبادرة شفاء للإسعافات الأولية والتوعية الطبية، صدر له كتابه الأول "هو وهى".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح